Faollik ko‘rsatgan imomlar taqdirlandi
Yurtimizning ma’naviyat va ma’rifat ravnaq topishi, aholimizning diniy bilim va ma’naviy dunyoqarashini yuksaltirishda ommaviy axborot vositalarining o‘rni beqiyos. Xususan, O‘zbekiston musulmonlari idorasi tomonidan chop etib kelinayotgan «Hidoyat», «Mo‘minalar» jurnallari hamda «Islom nuri» gazetasi ham xalqimiz ko‘nglidan joy olgan nashrlar hisoblanadi.
Ushbu nashrlarni keng kitobxonlar ommasiga targ‘ib qilishda faollik ko‘rsatgan bir guruh soha xodimlari «Shamsuddinxon Boboxonov» nashriyoti jamoasi tomonidan taqdirlandi.
Farg‘ona viloyati vakilligida o‘tkazilgan mazkur tadbirda viloyat bosh imom-xatibi Ubaydulloh domla Abdullayev va nashriyot mas’ul kotibi Tolibjon Nizomov ishtirok etib, e’tibor va e’tirofga sazovor bo‘lgan imomlarni samimiy tabriklashdi. Shuningdek, ularga nashriyot sovg‘alari topshirildi.
Tadbir davomida «Hidoyat», «Mo‘minalar» jurnallari hamda «Islom nuri» gazetalarining aholini ma’rifiy tarbiyalashdagi o‘rni, yoshlar ongini sog‘lom g‘oyalar bilan boyitishdagi ahamiyati alohida ta’kidlandi. Ma’naviyat va ma’rifat yo‘lidagi bu kabi tashabbuslar xalqimizning ilmga, axloqiy qadriyatlarga va milliy an’analarga sadoqatini yanada mustahkamlashi qayd etilib, kelgusi mavsumda ham targ‘ibot ishlarida faol bo‘lishga chaqirildi.
O‘zbekiston musulmonlari idorasi
Farg‘ona viloyati vakilligi
Matbuot xizmati
Rossiya OAV: O‘zbekiston islom sivilizatsiyasi merosini o‘rganish va raqamlashtirishda yangi bosqichni boshlamoqda
Toshkent va Samarqand shaharlarida bo‘lib o‘tgan “Islom sivilizatsiyasi: yangi nigoh, yangi kashfiyotlar” xalqaro mediaforum Rossiyaning yetakchi ommaviy axborot vositalarida keng yoritildi, deb xabar bermoqda “Dunyo” AA muxbiri.
Xususan, “MIR 24”, “Sputnik Uzbekistan”, “Islam News”, “Daydjest Moskva-Baku”, “TRT na russkom”, “CGTN-Russkiy” kabi yirik ommaviy axborot vositalarida mediaforum haqida turkum materiallar e’lon qilindi.
Manbalarda forumning ahamiyati haqida alohida to‘xtalib o‘tilgan. Tadbirlarda 50 ga yaqin mamlakatdan 300 nafarga yaqin soha mutaxassislari va xalqaro media yetakchilari ishtirok etdi. O‘zbekistondagi Islom sivilizatsiyasi markazining tarixiy manbalarni raqamlashtirish va sun’iy intellekt imkoniyatlarini joriy etishdagi innovatsion o‘rni yuqori baholangan.
Rossiya media olamida O‘zbekistondagi o‘zgarishlar faqat tarixiy yodgorliklar va sayyohlik salohiyati bilan cheklanib qolmay, balki IT sohasi, qurilish, tibbiyot va iqtisodiy taraqqiyotdagi muvaffaqiyatlar orqali yangicha talqinda namoyon bo‘layotgani alohida ta’kidlangan.
Anjuman doirasida Rossiya, O‘zbekiston va Ozarbayjon hamkorligida “Shamoyili nabaviyya” qo‘lyozmasini nashr etish va Katta Langar Qur’onini atroflicha tadqiq qilish kabi aniq amaliy loyihalarga start berilgani e’tirof etildi.
Shuningdek, Rossiyaning “Rossiya” milliy markazi va Toshkentdagi Islom sivilizatsiyasi markazi o‘rtasida o‘zaro “Rossiya va O‘zbekiston kunlari”ni o‘tkazish bo‘yicha muhim kelishuvga erishilgani xabar qilindi.
Rossiya axborot maydonida O‘zbekiston boy qo‘lyozma va ilmiy meros sohibi, tarixiy manbalarni raqamlashtiruvchi markaz hamda gumanitar-madaniy sohada ishonchli va tashabbuskor hamkor sifatida gavdalandi.
O‘zbekiston musulmonlari idorasi Matbuot xizmati