Sariosiyoda 210 nafar bolajonga bayramona sovg‘alar ulashildi
Mamlakatimiz mustaqilligining 34 yilligi munosabati bilan O‘zbekiston musulmonlari idorasi Surxondaryo viloyati vakili Rasuljon domla Abdullayev va Sariosiyo tumanidagi “Xoja Alouddin Attor” jome masjidi imom-xatibi Abduqodir domla Mirzaqulovlar tashabbusi bilan "Vatan uchun, millat uchun, xalq uchun!" shiori ostida o‘tgazilgan xayrli ish ham yuzlab oilalarga bayramona kayfiyat ulashdi.
Hayrli tadbir davomida Sariosiyo tumanining chegara hududida joylashgan 7 ta mahallada istiqomat qiluvchi kam ta’minlangan oilalarning 210 nafar farzandiga maktab kiyimlari, milliy liboslar, do‘ppilar sovg‘a qilindi.
Ko‘rsatilgan e’tibor va ko‘makdan mamnun bo‘lgan ota-onalar hadya ulashganlar haqqiga duolar qilishdi.
O‘z navbatida tadbir tashkilotchilari ham kelajak vorislarini vatani, xalqi faravonligi uchun munosib xizmat va hayrli amallar qiladigan insonlar bo‘lishlarini tilashdi.
O‘zbekiston musulmonlari idorasi
Surxondaryo viloyati vakilligi
Matbuot xizmati
Imom Buxoriy majmuasi yaqinida besh yulduzli birinchi mehmonxona ochildi
Samarqanddagi Imom Buxoriy majmuasi hududida besh yulduzli “Hadith Hotel” mehmonxonasining ochilish marosimi bo‘lib o‘tdi.
O‘zA xabariga ko‘ra, tadbirda Samarqand viloyat hokimi Adiz Boboyev, Turizm qo‘mitasi raisi Abdulaziz Aqqulov, Indoneziya Respublikasining Haj va Umra vaziri Muhammad Irfan Yusuf so‘zga chiqib, Prezident Shavkat Mirziyoyev tashabbusi bilan yangidan bunyod etilgan Imom Buxoriy majmuasi yurtimizda ziyorat turizmini rivojlantirishda muhim qadam bo‘lganini ta’kidladi.
Majmua qayta qurilishi jarayonida uning atrofida yigirmadan ortiq mehmonxona, sayyohlar uchun zamonaviy infratuzilma tashkil etildi.
240 o‘rinli “Hadith Hotel” indoneziyalik investorlar bilan hamkorlikda barpo etilgan bo‘lib, Imom Buxoriy majmuasi atrofidagi joylashtirish vositalarining eng yirigi, shu bilan birga, ilk besh yulduzli mehmonxona hisoblanadi. Mehmonxonada zamonaviy xizmat ko‘rsatish tizimi yo‘lga qo‘yilib, xalqaro mehmonxona standartlari milliy mehmondo‘stlik an’analari va ziyoratgoh odobi bilan uyg‘unlashtirilgan.
Tadbir doirasida Samarqand viloyat hokimi Adiz Boboyev hamda Indoneziya Haj va Umra vaziri Muhammad Irfan Yusuf o‘rtasida uchrashuv bo‘lib o‘tdi. Uchrashuvda indoneziyalik ziyoratchilarni Samarqandga keng jalb qilish, “Umra+” dasturi asosida maxsus avia qatnovlarni yo‘lga qo‘yish va boshqa masalalar muhokama qilindi.
Bundan avval majmua hududida barpo etilgan mehmonxonalardan biri indoneziyalik tadbirkor tomonidan sotib olinib, ushbu davlatdan keladigan ziyoratchilarni qabul qilish uchun imkoniyatlar yaratilgan edi.
O‘zbekiston musulmonlari idorasi Matbuot xizmati