1. Birgina so‘rashish uchun gunohlar kafforat etiladi.

Rasululloh sollallohu alayhi vasallam: “Qachon ikki musulmon uchrashib, qo‘l olib so‘rashsalar, Allohga hamd aytsalar va U zotga istig‘for aytsalar, ikkovlari mag‘firat qilinadi”, dedilar (Imom Abu Dovud rivoyati).

2. Ota-onaning yuziga qarash ham – ibodat.

Ota-onaning yuziga shafqat bilan boqishning savobi haqida Rasululloh sollallohu alayhi vasallam bunday deganlar: “Kim ota-onasining yuziga shafqat va marhamat bilan boqsa, Alloh taolo uning uchun maqbul bo‘lgan bir hajning savobini yozadi” (Imom Bayhaqiy rivoyati).

Boshqa hadisda Rasululloh sollallohu alayhi vasallam: “Ona-otasining yuziga marhamat bilan boqqan kishiga haj va umraning savobi yoziladi”, dedilar.

– Kunda ming marta boqsa ham shundaymi? – deb so‘radilar.

– Kunda yuz ming marta boqsa ham, – dedilar (Imom Bayhaqiy rivoyati).

Yana bir hadisda bunday deyiladi: “Ota-onaning yuziga sevgi bilan boqish ibodatdir” (Imom Daylamiy, Abu Nuaym rivoyati).

Davron NURMUHAMMAD