Qo‘limizdagi mol bizniki emas
Bismillahir Rohmanir Rohiym
Bismillahir Rohmanir Rohiym.
Alloh taologa bitmas-tuganmas hamdu sanolar bo‘lsin.
Payg‘ambarimizga mukammal va batamom salavotu durudlar bo‘lsin.
Nabiy sollallohu alayhi vasallamning uylarida qo‘y so‘yildi. Uni sadaqa qilib yuborishni buyurdilar. So‘ngra bir ish bilan uydan chiqib ketdilar. Qaytib kelgach, Oisha roziyallohu anhodan so‘radilar:
- Undan nima qoldi?
Oisha onamiz roziyallohu anho dedilar:
- Faqat qo‘li qoldi.
Shunda Nabiy sollallohu alayhi vasallam:
غير كتفها بقى كلها
- Qo‘lidan boshqa hamma joyi qolibdi! dedilar (Imom Termiziy rivoyati).
Buyuk insonning buyuk javobi!
Rasululloh sollallohu alayhi vasallam doimo insonlarga dunyoning oxirat ekinzori ekanini ta’kidlar edilar. Bugun faqat ekish bor. Hosil olish yo‘q. Oxiratda esa hosil yig‘ishtirish bor, ekish yo‘q!
Rasululloh sollallohu alayhi vasallam imkon tug‘ilgani zahoti darrov paytni g‘animat bilib, dunyoning foniyligini, oxiratning boqiyligini insonlarga singdirishga harakat qilar edilar. Yuqoridagi savol-javob ham barcha uylarda bo‘lib turadigan oilaviy suhbat edi. Er xotinidan uydagi chiqim va ovqat haqida so‘rayapti. Nabiy sollallohu alayhi vasallam oddiy suhbatni g‘ayrioddiy darsga aylantiryaptilar! U kishi Oisha onamiz roziyallohu anhodan dunyo savolini so‘rayaptilar:
- Undan nima qoldi?
Oisha onamiz ham dunyo javobini beryaptilar
- Faqat qo‘li qoldi.
Oisha roziyallohu anhoning javoblaridan so‘ng Rasululloh sollallohu alayhi vasallam darrov oxirat darslaridan muhim bir darsni beryaptilar:
- Qo‘lidan boshqa hamma joyi qolibdi!
Qo‘limizdagi mol bizniki emas.
Bizning haqiqiy molimiz erta qiyomatda topishimiz uchun bugun Allohning huzurida zaxira qilayotgan molimizdir!
Qo‘yning qo‘li yeb tugatiladi. Ammo undan chiqarilgan sadaqa Allohning huzurida saqlanib qoladi. Alloh O‘zining karami bilan e’tibor beradigan oxiratdagi «bank»da saqlanadi!
Bu haqda Rasululloh sollallohu alayhi vasallam yana bunday deganlar:
من تصدق بعدل تمرة من كسب طيب - ولا يقبل الله إلا الطيب - فإن الله يقبلها بيمينه ثم يربيها لصاحبها كما يربى أحدكم فلوه حتى تكون مثل الجبل
«Kim halol topgan molidan xurmo miqdoricha sadaqa qilsa — Alloh taolo faqat halol, pok narsani qabul qiladi - albatta, Alloh uni o‘ngi bilan qabul qilib, sizlar kichkina toychoqni parvarish qilganingiz kabi o‘stirib parvarishlaydi. Hatto o‘sha sadaqasi tog‘ barobar bo‘lib ketadi» (Imom Buxoriy va Imom Muslim rivoyati).
«Bank»ning ajoyibligini qarang! Zaxiraning barakasini qarang! Allohning roziligini istab qilingan xurmo miqdoridagi sadaqangizni Allohning O‘zi qabul qilib olib, uni o‘stirar ekan. Ertaga oxirat kunida Allohning huzuriga borsangiz, uni xuddi tog‘ kabi kattalashib ketgan holda topar ekansiz!
Sulton Sulaymon Qonuniy o‘lim to‘shagida yotganida atrofidagilarga: «Agar vafot qilsam, qo‘limni tobutdan chiqarib qo‘yinglar. Insonlar ko‘rsinki, sulton dunyodan ikki qo‘li bo‘sh holatda ketmoqda!» deb tayinlagan ekan.
Sadaqa qilaylik! Kafanning cho‘ntagi yo‘q!
«Nabaviy tarbiya» kitobi asosida tayyorlandi
“Azzaman” gazetasi: Yangi O‘zbekistonda keng qamrovli islohotlar amalga oshirilmoqda
Iroqning “Azzaman” gazetasida “O‘zbekiston mustaqilligining o‘ttiz besh yilligi: Davlat barpo etishdan Uchinchi Renessans sari” nomli maqola e’lon qilindi, deb xabar bermoqda “Dunyo” AA.
Maqolada ta’kidlanishicha, O‘zbekistonning mustaqillik yillarida bosib o‘tgan taraqqiyot yo‘li, amalga oshirilgan keng ko‘lamli islohotlar hamda mamlakatning xalqaro maydondagi nufuzi tobora yuksalib bormoqda.
1991 yilda qo‘lga kiritilgan mustaqillik O‘zbekiston xalqi hayotida tarixiy burilish yasab, milliy davlatchilik asoslarini shakllantirish, iqtisodiy taraqqiyot poydevorini yaratish va ijtimoiy barqarorlikni ta’minlash jarayonini boshlab berdi.
2016 yildan boshlab Prezident Shavkat Mirziyoyev rahbarligida mamlakatda “Yangi O‘zbekiston” tamoyili asosida keng qamrovli islohotlar amalga oshirilmoqda. Ushbu jarayonda O‘zbekiston Markaziy Osiyoda izchil va muvozanatli rivojlanish yo‘lidan borayotgan davlat sifatida e’tirof etilmoqda.
Muallif O‘zbekistonda so‘nggi yillarda iqtisodiyotni liberallashtirish, investitsiyalarni jalb etish, savdo-iqtisodiy aloqalarni kengaytirish, infratuzilmani modernizatsiya qilish, raqamlashtirish va tadbirkorlik muhitini yaxshilash borasida amalga oshirilgan chora-tadbirlarga e’tibor qaratgan.
Maqolada aholini ijtimoiy himoya qilish tizimini takomillashtirish, ta’lim va sog‘liqni saqlash xizmatlari sifatini oshirish, yoshlar hamda xotin-qizlarning jamiyatdagi faolligini kuchaytirishga qaratilgan islohotlar haqida ham alohida fikr yuritilgan.
Nashrda Prezident Shavkat Mirziyoyev tomonidan ilgari surilgan “Uchinchi Renessans” g‘oyasi O‘zbekiston taraqqiyotining muhim strategik yo‘nalishlaridan biri sifatida baholangan. Unda Xorazmiy, Beruniy, Ibn Sino, Imom Buxoriy va Imom Termiziy kabi buyuk allomalar yetishib chiqqan yurt bugungi kunda ilm-fan, innovatsiya, texnologiya va inson kapitalini rivojlantirish orqali yangi uyg‘onish davrini yaratishga intilayotgani qayd etilgan.
Iroq matbuoti O‘zbekistonning islom sivilizatsiyasi tarixidagi o‘rniga ham to‘xtalib, mamlakatda boy ilmiy-ma’rifiy merosni o‘rganish va targ‘ib qilishga qaratilgan loyihalar amalga oshirilayotganini ta’kidlagan. Jumladan, Toshkent shahrida bunyod etilgan Islom sivilizatsiyasi markazi Movarounnahr allomalarining jahon tamadduniga qo‘shgan ulkan hissasini namoyish etuvchi muhim ilmiy-madaniy maskan sifatida qayd etilgan.
O‘zbekiston musulmonlari idorasi Matbuot xizmati
