Farg‘onada "Viloyat hokimi kubogi” o‘tkazildi
Farg‘ona viloyatida diniy soha vakillari o‘rtasida sportning mini-futbol turi bo‘yicha “Farg‘ona viloyati hokimi kubogi” bo‘lib o‘tdi.
Unda O‘zbekiston musulmonlari idorasining Farg‘ona viloyati vakilligi tizimidagi masjidlarda faoliyat ko‘rsatayotgan diniy soha vakillari hamda viloyatdagi noislomiy diniy tashkilotlarda faoliyat ko‘rsatayotgan diniy konfessiyalar vakillaridan tashkil topgan 16 ta jamoa ishtirok etdi.
Musobaqaning hal qiluvchi bosqichida Buvayda, Dang‘ara, Bag‘dod tumani va Quvasoy shahri jamoalari g‘oliblik uchun kurashdilar. Finalda Buvayda tumani jamoasi turnir g‘olibligini qo‘lga kiritdi. Dang‘ara tumaniga ikkinchi, Bag‘dod tumaniga esa uchinchi o‘rin nasib qildi.
Musobaqa g‘oliblari va faol ishtirokchilari Viloyat hokimligining qimmatbaho sovg‘alari bilan taqdirlandilar.
Farg‘ona viloyati vakilligi Matbuot xizmati
Mustaqillik bayrami arafasida Qashqadaryoda bosh imomlar yig‘ilishi bo‘lib o‘tdi
O‘zbekiston musulmonlari idorasining Qashqadaryo viloyati vakilligida shahar va tumanlar bosh imom-xatiblari ishtirokida yig‘ilish o‘tkazildi.
Tadbirni viloyat bosh imom-xatibi Rahmatillo domla Usmonov kirish so‘zi bilan ochib, yig‘ilganlarni yaqinlashib kelayotgan Mustaqilligimizning 35 yillik bayrami bilan samimiy muborakbod etdi. Uchrashuvda davlatimiz Rahbarining tegishli Farmoni bilan bir guruh diniy soha xodimlari «Imom Buxoriy» ordeni bilan taqdirlangani yurtimizda ma’naviy-ma’rifiy sohaga ko‘rsatilayotgan yuksak e’tibor va tarixiy voqea ekani alohida e’tirof etildi.
Yig‘ilishda «Yagona Vatan, yagona xalq bo‘lib, yangi hayot va kelajak yaratamiz!» ezgu shiori ostida vohada amalga oshirilayotgan xayrli ishlar, yoshlarni Vatanga sadoqat va milliy-diniy qadriyatlarga hurmat ruhida tarbiyalash borasidagi faoliyat sarhisob qilindi.
Shuningdek, tadbir davomida imom-xatiblarga quyidagi ustuvor vazifalar yuklatildi:
-
Ehtiyojmand, boquvchisini yo‘qotgan va yakka-yolg‘iz keksalar holidan muntazam xabar olish;
-
Oilalar totuvligini mustahkamlash va mahallalarda ijtimoiy-ma’naviy muhit barqarorligini ta’minlash;
-
Masjidlar, qadamjolar va qabristonlarni obodonlashtirish hamda tozalik tadbirlarida faollik ko‘rsatish.
Yig‘ilish yakunida diniy soha xodimlarining kelgusi faoliyatiga muvaffaqiyatlar tilandi.
O‘zbekiston musulmonlari idorasi
Qashqadaryo viloyati vakilligi
Matbuot xizmati