Erkaklar va ayollar uchun Hatimda namoz o‘qish vaqtlari
Hatim yoki boshqacha nomi Hijri Ismoil, Makka shahridagi Masjidi Haramda joylashgan yarim oy shaklidagi hudud bo‘lib, Qa’baning bir qismi hisoblanadi.
Payg‘ambarimiz alayhissalomning yigitlik davrida Ka’ba qayta qurilganda, mablag‘ yetmay qoladi va Ka’ba poydevori avvalgi holatida kichik qilib tiklanadi. Hozirda o‘sha qurilmay qolgan joy, odam bo‘yi qadar yarim doira shaklida devor bilan o‘rab qo‘yilgan.
Hatim ham Ka’ba tarkibiga kiradi, u yerda o‘qilgan namoz Ka’ba ichida ibodat qilgandek bir xil. Shuning uchun ham ziyoratchilar Hatimda namoz o‘qishga intiladilar.
Hatim hududiga kirish erkaklar va ayollar uchun alohida vaqtlarda tashkil etilgan bo‘lib, ziyoratchilarning tartibli va xotirjam ibodat qilishi ta’minlangan.
Erkaklar uchun namoz vaqtlari, tunda: 22:00 dan 02:00 gacha.
Erkaklar Hatimda kechki payt soat 22:00 dan 02:00 gacha namoz o‘qishlari mumkin. Bu vaqtlarda gavjumlik nisbatan kam bo‘ladi.
Ayollar uchun namoz vaqtlari, kunduzi: 07:30 dan 11:00 gacha.
Ayollarga Hatimda namoz o‘qish uchun maxsus vaqt, soat 07:30 dan 11:00 gacha.
Ziyoratchilar Hatim hududiga g‘arbiy tomondagi eshikdan kiradilar. Hatimda 10 daqiqa bo‘lish tavsiya etiladi.
Hatim Ibrohim va Ismoil alayhumussalom tomonidan qurilgan ilk Ka’ba binosidan bir qismi sifatida qadrlanadi. U yerda namoz o‘qish savobli amal hisoblanadi va ko‘plab hojilar hamda umra ziyoratchilari Hatimga kirib ibodat qilishga intiladilar.
Ba’zi paytlarda tozalash yoki texnik sabablarga ko‘ra vaqtlarda kichik o‘zgarish bo‘lishi mumkin. Ziyoratga borayotganlar Hatimga kirish vaqtlari haqidagi so‘nggi ma’lumotlarni oldindan tekshirib olishlari tavsiya etiladi.
T.Azimov
tayyorladi
Bir guruh diniy-ma’rifiy soha fidoyilariga "O‘zbekiston Respublikasi mustaqilligining 35 yilligi" esdalik nishonlari topshirildi
27 avgust kuni O‘zbekiston Respublikasi mustaqilligining 35 yilligi munosabati bilan diniy-ma’rifiy sohada samarali mehnat qilib kelayotgan fidoyi yurtdoshlarimizni taqdirlashga bag‘ishlangan tantanali tadbir bo‘lib o‘tdi.
Tadbirda O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov kirish so‘zi bilan ishtirok etdi.
Kirish nutqida mamlakatimizda mustaqillik yillarida, ayniqsa, so‘nggi yillarda diniy-ma’rifiy sohani rivojlantirish, jamiyatda tinchlik-totuvlik, millatlararo hamjihatlik va diniy bag‘rikenglikni mustahkamlash borasida amalga oshirilayotgan islohotlar, shuningdek, sohada faoliyat yuritayotgan ulamolar, imom-xatiblar, mudarrislar va fidoyi xodimlarning munosib hissasi haqida alohida ta’kidlandi.
Tantanali tadbir davomida diniy-ma’rifiy sohada ko‘p yillardan buyon samarali mehnat qilib, yurtimizda ma’naviy barqarorlikni ta’minlash, yosh avlodni milliy va umuminsoniy qadriyatlar ruhida tarbiyalash, aholi o‘rtasida ma’rifiy tushuntirish ishlarini olib borishga munosib hissa qo‘shib kelayotgan bir guruh fidoyi yurtdoshlarga "O‘zbekiston Respublikasi mustaqilligining 35 yilligi" esdalik nishonlari tantanali ravishda topshirildi.
Esdalik nishonlarini topshirish marosimida O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov, Din ishlari bo‘yicha qo‘mita raisi Sodiq Toshboyev, O‘zbekiston musulmonlari idorasi raisi, muftiy Shayx Nuriddin Xoliqnazar hazratlari, O‘zbekistondagi Islom sivilizatsiyasi markazi direktori Firdavs Abduhalikov, O‘zbekiston Respublikasi Vazirlar Mahkamasi mas’ul xodimi Orifxon Zokirovlar ishtirok etdilar.
Taqdirlash marosimida ta’kidlanganidek, mazkur esdalik nishoni mamlakatimiz taraqqiyotiga, uning tinchligi va barqarorligiga, jamiyatda millatlararo totuvlik va diniy bag‘rikenglik muhitini mustahkamlashga, yosh avlodni milliy va umuminsoniy qadriyatlar ruhida tarbiyalashga munosib hissa qo‘shayotgan fidoyi insonlarga bildirilgan yuksak ehtirom va e’tirof ramzidir.
Tadbir yakunida taqdirlanganlar o‘zlariga bildirilgan yuksak ishonch va e’tibor uchun minnatdorlik bildirib, mamlakatimiz tinchligi va ravnaqi yo‘lidagi ezgu faoliyatlarini yanada sidqidildan davom ettirishlarini ta’kidladilar.
Barcha mukofot sohiblarini samimiy muborakbod etamiz!
Mustaqilligimizning 35 yilligi muborak bo‘lsin!
O‘zbekiston musulmonlari idorasi Matbuot xizmati
