Ehtiyojmand oilaga “Vaqf” uyi topshirildi
Ijara haqini o‘z vaqtida to‘lolmaganingiz uchun bor budingiz, bolalaringiz bilan ko‘chaga haydalganmisiz?
Ba’zi-ba’zida uy topolmay ko‘chalarda, bekatlarda yotib qolganmisiz?
Farzandlaringiz «qachon bizning ham uyimiz bo‘ladi», deya sovol berganida qanday javob berishni bilmay, ularning ko‘ziga qarashga botinolmay qolgan paytlaringiz bo‘lganmi?
Bugun sizga aytmoqchi bo‘layotgan bu oila, bu ona bunday kunlarni ko‘p bora boshidan o‘tkazgan. Turmush o‘rtog‘i uch nafar qizi bilan tashlab ketganidan keyin ona ne-ne qiyinchiliklarni ko‘rmadi deysiz? Qishning qirovli kunlarida, yozning jaziramalarida bir xonali bo‘lsada uyimiz, boshpanamiz bo‘lsaydi, deya orzu qilishdi. Allohga hamd bo‘lsinki, bugun o‘sha kunlar ortda qoldi.
«Vaqf» xayriya jamoat fondining Buxoro viloyati filiali tomonidan mazkur oilaga e’tibor qaratilib, har tomonlama yordam ko‘rsatilishi belgilandi. Birinchi o‘rinda oilaning uy-joyga muhtojligi hisobga olinib, ko‘p qavatli uydan ta’mirlangan yashashga tayyor bir kvartira ajratildi. «Vaqf» fondi balansida bo‘lgan ushbu uy ona va bolalarga bir umrga tekin foydalanishga berildi. Filial tomonidan oilaga zarur oziq-ovqat mahsulotlari ham topshirildi.
Bugundan boshlab hech kim bu uydan chiq, deb eshik tepib kelmaydi. Ona, ayniqsa bolalar juda xursand. Shunday uyni sovg‘a qilgani, xursandchilik ulashgani uchun «Vaqf» fondi va homiylarni duo qilishmoqda.
Aslida bu dunyo, mol-mulk hammamizdan qolib ketadi, azizlar! Hali ham nimanidir o‘zgartirish, kimgadir yordam qilish uchun juda ko‘p imkoniyatimiz bor. Faqat siz xohlasangiz, chin qalbdan istasangiz bo‘lgani.
O‘zbekiston musulmonlari idorasi
"Vaqf" fondi
Matbuot xizmati
Jannatning misoli
“Taqvodorlarga va’da qilingan jannatning misoli shuki, uning ostidan anhorlar oqadi, mevalari va soyalari doimiydir. Shu taqvo qilganlarning oqibatidir. Kofirlarning oqibati esa do‘zaxdir” (Ra’d surasi, 35-oyat).
Bu oyat taqvodorlarga va’da qilingan jannatni sifatlab berish ma’nosida bo‘lishi mumkin. Oyat “taqvodorlarga va’da qilingan jannat kofirlarga va’da qilingan do‘zaxga o‘xshash bo‘ladimi?” degan ma’noda bo‘lishi ham mumkin. Ya’ni jannat bilan do‘zax birbiriga o‘xshash emas.
Alloh taolo boshqa bir oyatda jannat haqida bunday marhamat qiladi: “Taqvodorlarga va’da qilingan jannatning misoli: ichida aynimagan suvli anhorlari, ta’mi o‘zgarmagan sutli anhorlari, ichuvchilar uchun lazzatbaxsh xamrli anhorlari, musaffo asalli anhorlari bor. Ular uchun unda barcha mevalar va Rabbilaridan mag‘firat bordir. Ular do‘zaxda mangu qoladigan, o‘ta qaynoq suv bilan sug‘orilib, ichaklari titilib ketadigan kimsa (kofirlar)ga o‘xsharmidi?” (Muhammad surasi, 15-oyat).
Alloh taolo bu oyatda bunday demoqda: “Sifati shunday doimiy ne’matlar ichra bo‘lgan kishilar mudom azoblanadigan, sifatlari ana unday bo‘lgan kimsalar kabi bo‘lurmi?” Ya’ni jannatiylar do‘zaxiylar kabi bo‘lmaydi. Shundan oldin kelgan oyat ham ushbu oyatga qiyos qilinadi.
“Uning ostidan anhorlar oqadi, mevalari doimiydir”. Ya’ni jannatning mevalari doimiy bo‘lib, aslo tugab qolmaydi. Ular dunyo mevalari va uning ne’matlariga o‘xshamaydi. Dunyo mevalarining har qanday turi vaqti bilan tugab qoladi. Shuning uchun ham Alloh taolo oxirat jannatining mevalari va undagi jamiki ne’matlar uzluksiz, doimiy ekanini hamda kofirlarga oxiratning azobi ham bardavom ekanini xabar qildi.
“Va soyalari…” Alloh taolo jannatning soyasi ham uzluksiz ekani, unda botishi bilan soyasi ham yo‘qoladigan quyosh bo‘lmasligini bayon etib, undagi barcha ne’matlarning davomiyligi va manfaatli bo‘lishini bildirdi. Soyada manfaat bor, lekin zarar yo‘q, quyoshda esa foyda bilan birga zarar ham bordir. Xuddi shunday, dunyo hayotida barcha narsalarda foydali taraflari bilan birga zararli jihatlar ham bo‘ladi. U ne’matlar kelishi vaqti bilan to‘xtab, zavol topadi. Alloh taolo oxiratdagi soya, jannatdagi barcha ne’matlar zararsiz, uzluksiz, boqiy bo‘lishini va ular dunyodagi soyaga va ne’matlarga o‘xshamasligini xabar qildi.
“Shu taqvo qilganlarning oqibatidir. Kofirlarning oqibati esa do‘zaxdir”. Ya’ni kofirlarning jazosi do‘zaxdir. Bu oyat ning zohirini e’tiborga oladigan bo‘lsak, go‘zal oqibat shirkdan saqlanganlarga bo‘lishi aytildi. Chunki Alloh taolo kofirlarning oqibati do‘zax ekanini zikr qildi. Ya’ni ular ning oqibati, jazosi do‘zaxdir. Jannat esa shirkdan saqlanganlarning mukofotidir.
“Kofirlarning oqibati esa do‘zaxdir”. Ya’ni kofirlarning jazosi do‘zaxdir. Yoki ushbu iboraning ma’nosi: “Taqvo qilganlar ning oqibati jannatdir, kofirlarning oqibati esa do‘zaxdir”.
Mufassirlardan ba’zilari Alloh taoloning “Bu taqvo qilganlarning oqibatidir” oyatining ma’nosini bunday bayon qiladi: “Ularning amallari, yaxshiliklarining oqibati jannatdir. Alloh taoloning yagonaligiga kufr keltirgan kimsalar amallarining oqibati esa do‘zaxdir”.
Imom Abu Mansur MOTURIDIYning “Ta’vilotul Qur’on” asaridan
Abdulatif ALLOQULOV tarjima qildi.
“Hidoyat” jurnalining 2025 yil 9-sonidan
http://hidoyatuz.taplink.ws