Bugun, 8 dekabr kuni Makka shahridagi “Marmara” mehmonxonasida Bosh qomusimiz O‘zbekiston Respublikasi Konstitutsiyasining 33 yilligi munosabati bilan ayni kunlarda Makkai mukarramada toatu ibodatlar bilan bo‘lib turgan 240 nafardan ziyod ziyoratchilarimiz uchun bayram tadbiri tashkil etildi.
Unda Jidda shahridagi bosh konsul Sirojiddin Shamsuddinov, “Haj” va “Umra” bo‘yicha attashe Shuhrat Amoniy, O‘zbekiston musulmonlari idorasi hamda Din ishlari bo‘yicha qo‘mitasi Ishchi guruh vakillari ishtirok etdi.
Mutasaddi vakillarimiz umra safarida bo‘lib turgan hamyurtlarimizni qomusimiz qabul qilingan kun bilan muborakbod etib, yurtimizda so‘nggi yillarda bo‘y ko‘rsatayotgan keng ko‘lamli islohotlar, erkinlik ne’mati, uni asrab-avaylash va qadrlash barcha yurt farzandlarining burchi ekanini alohida ta’kidlab o‘tishdi.
Ma’naviy-ma’rifiy uchrashuvda keyingi yillarda barcha sohalar qatori diniy-ma’rifiy sohada ham ulkan o‘zgarishlar ro‘y bergani, jumladan, umra ziyorati bir necha yuz ming nafarga, Haj kvotasi esa 15 ming nafargacha oshirilgani, ularga xizmat ko‘rsatish, mavjud sharoitlar havas qiladigan darajaga ko‘tarilgani, bunga hozirda umra amalini ado etayotgan hamyurtlarimiz bevosita guvoh bo‘layotgani qayd etildi.
Tadbirda ishtirokchilarni yaxshi tilak va duolar bilan qutlash barobarida bayram shirinliklari ham ulashildi. Ko‘taringki va samimiy ruhda o‘tgan tadbir ziyoratchilarda katta taassurot qoldirdi.
Alloh taolo yurtimizni tinch va farovon, xalqimizni xotirjam va baxtiyor aylasin!
O‘zbekiston musulmonlari idorasi Matbuot xizmati
Malayziyada xayriya sohasida ilg‘or tajribalar o‘rganilmoqda
Malayziyada o‘tkazilayotgan xalqaro anjuman doirasida O‘zbekiston vakillari ta’lim, ilm-fan, vaqf, xayriya va ziyorat turizmi yo‘nalishlarida xalqaro tajriba almashmoqda.
Xususan, O‘zbekiston musulmonlari idorasi raisi o‘rinbosari, «Vaqf» fondi rahbari Zayniddin domla Eshonqulov Kuala-Lumpur shahrida o‘tkazilgan «Islomiy iqtisodiyot haftaligi»da ishtirok etdi. Unda Islom hamkorlik tashkilotiga a’zo 57 ta davlat vakillari qatnashdi.
Shuningdek, Jahon vaqf forumining navbatdagi onlayn majlisida ishtirok etilib, unda yurtimizdagi «Vaqf» fondi faoliyati, sohani raqamlashtirish hamda xayriya mablag‘laridan maqsadli va samarali foydalanish borasida amalga oshirilayotgan ishlar bo‘yicha o‘zaro tajriba almashildi.
Bundan tashqari, Malayziya Vaqf bosh boshqarmasi rahbariyati bilan muloqot o‘tkazilib, vaqf va xayriya sohasida samarali ish mexanizmlarini joriy etish, xayriya mablag‘larini manzilli yo‘naltirish hamda o‘zaro hamkorlikni kengaytirish masalalari muhokama qilindi.
Muloqotlarda davlatimiz Rahbari tashabbusi bilan mamlakatimizda diniy-ma’rifiy sohaga qaratilayotgan e’tibor, ijtimoiy himoyaga muhtoj aholi, xususan, bemorlarga ko‘rsatilayotgan yordamlar hamda keng ko‘lamli xayriya tadbirlari haqida so‘z yuritildi.
O‘z navbatida, mazkur yo‘nalishlarda O‘zbekistonda yo‘lga qo‘yilgan tajriba anjuman ishtirokchilari tomonidan yuqori baholandi.
Shuningdek, Kedah shtati soha vakillari bilan bo‘lib o‘tgan uchrashuvda mablag‘larni yig‘ish va ularni manzilli tarzda o‘z o‘rniga yetkazish masalalari ko‘rib chiqildi. Xususan, elektron tizimlar bo‘yicha zamonaviy tajribani joriy etish, kam ta’minlangan oilalarni qo‘llab-quvvatlashga qaratilgan loyihalarga e’tibor qaratildi.
Safar davomida Al-Buxoriy xalqaro universiteti rahbariyati bilan ham ilmiy aloqalarni kengaytirish bo‘yicha kelishuvlarga erishildi.
Shu bilan birga, mazkur oliygohda tahsil olayotgan o‘zbekistonlik talabalar bilan samimiy suhbat bo‘lib o‘tdi. Uchrashuvda yoshlarga zamonaviy ilmlarni puxta egallab, kelgusida Vatanimiz taraqqiyotiga munosib hissa qo‘shadigan yetuk mutaxassis bo‘lib yetishish bo‘yicha iliq tilaklar bildirildi.
O‘zbekiston musulmonlari idorasi Matbuot xizmati