Bugun dunyo bir maqsad yo‘lida birlashmoqda: global chaqiriqqa aylangan sana
9 dekabr – Xalqaro korrupsiyaga qarshi kurash kuni
Bu sana alohida belgilangani bejiz emas. Bu kun jamiyat, iqtisodiyot va davlat boshqaruviga jiddiy xavf soluvchi illat sanalmish korrupsiyani yodga solish, uning oqibatlarini yana bir bor anglash, eng muhimi esa unga qarshi qat’iy kurashishda har bir kishi mas’ul ekanini eslatib turish uchun nishonlanadi.
Tarixga nazar solsak, 2003 yil 9 dekabrda Meksikaning Merida shahrida BMT tashabbusi bilan o‘tkazilgan xalqaro konferensiyada 100 dan ortiq davlat “Korrupsiyaga qarshi xalqaro konvensiya”ni imzolab, global miqyosda birlashgan holda harakat qilishga kelishib olgan. Korrupsiya taqdiri bir davlat muammosi emas, balki butun dunyo xavfsizligi va barqaror rivojlanishi bilan bog‘liq masala.
Shu konferensiyaning birinchi kuni Xalqaro korrupsiyaga qarshi kurash kuni sifatida e’lon qilindi. 2004 yildan buyon dunyo mamlakatlari ushbu sanani jamoatchilikni xabardor qilish, muhokama madaniyatini kuchaytirish va sohaga doir chora-tadbirlarni tizimlilashtirish maqsadida nishonlab kelmoqda.
Rezolyutsiyada ta’kidlanishicha, bu kunning asosiy maqsadi korrupsiyaning tub mohiyatini chuqur anglash, uni oldini olish choralarini mustahkamlash va barcha darajada qat’iy kurashishdir.
O‘zbekistonda ham korrupsiyaga qarshi kurashish davlat siyosatining eng ustuvor yo‘nalishlaridan biri sifatida belgilangan. So‘nggi yillarda barcha sohalarda ochiqlik, shaffoflik, hisobdorlik tamoyillarini kuchaytirish, byurokratik to‘siqlarni qisqartirish, “yashirin iqtisodiyot”ga chek qo‘yish bo‘yicha keng ko‘lamli islohotlar amalga oshirilmoqda.
Davlat va jamiyat hayotida raqamlashtirish jarayonlari tezlashib, xizmatlarni elektron shaklga o‘tkazish korrupsiyaviy omillarni kamaytirishda muhim vositaga aylandi. Eng muhimi, korrupsiya bilan kurash faqat davlat muassasalari yoki alohida idoralar vazifasi emas. Bu har bir fuqaroning fuqarolik burchidir.
Agar har birimiz qonunlarga rioya qilsak, shaffoflikni talab qilsak va huquqiy madaniyatimizni oshirsak, jamiyatni rivojlantirishga ulkan hissa qo‘shgan bo‘lamiz.
Bahodir Kirgizov,
“Mikrokreditbank” aksiyadorlik tijorat banki
Korrupsiyaga qarshi nazorat departamenti direktori,
UzA.
Janubiy Koreyaning nufuzli telekanali O‘zbekistonning sayyohlik salohiyatini keng yoritdi
O‘zbekiston sayyohlik salohiyatini Janubiy Koreyada keng targ‘ib etish maqsadida nufuzli “EBS” telekanali tomonidan mamlakatimiz turizm imkoniyatlariga bag‘ishlangan maxsus teledastur efirga uzatildi, deb xabar bermoqda “Dunyo” AA.
Sayyohlar orasida katta auditoriyaga ega bo‘lgan “Buyuk Ipak yo‘li bo‘ylab sayohat” teledasturi orqali janubiy koreyalik tomoshabinlarga O‘zbekistonning ekoturizm, gastronomik, ziyorat, tog‘ va landshaft turizmi borasidagi imkoniyatlari haqida keng ma’lumot berildi.
O‘zbekistonga tashrif buyurgan “EBS” telekanali ijodiy guruhi mamlakatimizning mashhur sayyohlik yo‘nalishlari, YUNЕSKOning Butunjahon merosi ro‘yxatiga kiritilgan Samarqand, Buxoro, Xiva va Toshkent shaharlarining qadimiy me’moriy yodgorliklari, turli hududlardagi zamonaviy ko‘ngilochar markazlar, milliy hunarmandchilik, o‘zbek milliy taomlari hamda yurtimizning betakror tabiat manzaralari haqida hikoya qildi.
Ko‘rsatuvda janubiy koreyalik sayyohlar uchun O‘zbekiston bo‘ylab sayohat qilishning afzalliklari ham keng yoritildi. Xususan, bugungi kunda Toshkentdan mamlakatimizning tarixiy shaharlariga zamonaviy va qulay “Afrosiyob” tezyurar poyezdi orqali Ipak yo‘li yo‘nalishlari bo‘ylab sayohat qilish mumkinligi ta’kidlandi.
“EBS” telekanali muxbiri Toshkentning o‘ziga xos me’moriy qiyofasiga alohida e’tibor qaratgan. Uning fikricha, poytaxt me’morchiligida o‘rta asrlarga oid tarixiy obidalar, zamonaviy ko‘p qavatli binolar va sobiq ittifoq davri me’morchiligi an’analari o‘ziga xos uyg‘unlik kasb etgan.
Dasturda O‘zbekiston bo‘ylab sayohat qilish imkoniyatlari haqida so‘z yuritilar ekan, mamlakat poytaxtidan tarixiy shaharlarga avtomobil yo‘llari bilan bir qatorda temir yo‘l orqali ham qulay safar qilish mumkinligi ma’lum qilingan.
“Yilning barcha faslida ertalab va kechqurun Toshkentning bosh vokzalidan Buxoro va Samarqand yo‘nalishida qulay tezyurar “Afrosiyob” poyezdlari qatnaydi. Maksimal tezligi 230 km/soat bo‘lgan ushbu poyezd Toshkentdan Buxorogacha bo‘lgan qariyb 600 kilometrlik masofani uch soatu 40 daqiqada bosib o‘tadi. Bu aviaparvozga nisbatan qulay va arzonroq”, – deya qayd etilgan teledasturda.
Ko‘rsatuvda Samarqand va Buxoro shaharlari Markaziy Osiyoning muhim madaniy durdonalari sifatida e’tirof etilgan.
“Buxoro shahri 2500 yildan ortiq tarixga ega. Eski shahar markazida Buxoroning eng diqqatga sazovor yodgorliklaridan biri – 1127 yilda qurilgan Minorai Kalon joylashgan. Uning balandligi 47 metr, poydevori esa 10 metrni tashkil etadi”, – deya ma’lumot beriladi manbada.
Samarqand haqida so‘z yuritilar ekan, uning 2750 yillik tarixga ega ekani, dunyodagi eng qadimiy shaharlardan biri sifatida asrlar davomida turli bosqinlar va vayronagarchiliklarga guvoh bo‘lganiga qaramay, o‘zining betakror va ertaknamo ulug‘vorligini saqlab qolgani ta’kidlangan.
Teledasturning yana bir muhim jihati – unda O‘zbekistonning qadimiy shaharlaridagi tarixiy va me’moriy obidalar bilan bir qatorda, milliy hunarmandchilik, urf-odatlar, milliy taomlar hamda mamlakatning turli hududlaridagi go‘zal tabiat manzaralari haqida batafsil ma’lumot berilganidir.
Ko‘rsatuvda O‘zbekistonning mehmondo‘stligiga ham alohida urg‘u berilgan.
“Sayyoh sifatida qayerga bormang, xoh mehmon uylarida, xoh bozorlar yoki shunchaki ko‘chada mahalliy aholi bilan uchrashsangiz, samimiy mehmondo‘stlik va iliqlikni his qilasiz”, – deydi “EBS” telekanali ijodiy guruhi.
Umuman, Janubiy Koreyaning yetakchi telekanallaridan biri bo‘lgan “EBS” orqali O‘zbekistonning boy tarixiy-madaniy merosi, betakror tabiati, milliy taomlari, mehmondo‘stligi va zamonaviy turizm infratuzilmasi keng auditoriyaga namoyish etilgani mamlakatimizning ushbu davlat sayyohlik bozoridagi jozibadorligini yanada oshirishga xizmat qiladi.
O‘zbekiston musulmonlari idorasi Matbuot xizmati