“Inson qadri” asarini o‘qib...
Inson yer yuzidagi eng go‘zal yaratiq hisoblanadi. Zero, Alloh taolo Qur’oni karimda bunday degan: “Batahqiq, Biz insonni eng yaxshi suratda yaratdik” (Tiyn surasi, 4-oyat).
Shunday ekan, nega zamon taraqqiy etgani sayin insonlar bir-birini yetarlicha qadrlamay qo‘ymoqda. Bari inson uchun xizmat qilishga yaratilgan boylik, tilla-temir va boshqa matohlar ba’zan insondan ko‘ra ko‘proq avaylab-asralmoqda. Bir chinni idishni avaylaganchalik bir ko‘ngilni avaylamaydigan nasllar paydo bo‘lyapti...
Shayx Nuriddin Xoliqnazar hazratlari qalamiga mansub “Inson qadri” asarini o‘qir ekanman, shular haqida o‘yladim. Ushbu asar aziz va mukarram qilingan insonning qadr-qimmati bilan bog‘liq muammolar muolajasiga xizmat qiladi. Unda odamiylik fazilatlariga rioya qilish, inson sha’nini yuksaltirish, unga munosib ehtirom ko‘rsatish, yomon xulq va fitnalardan uzoq yurish yo‘l-yo‘riqlari ko‘rsatiladi.
Zero, bugun axborot to‘qnashuvi avj olgan, yer yuzining turli nuqtalari bir zumda aloqa bog‘lay oladigan bir paytda insoniyat nizo va mojarolar girdobida qolmoqda. Shunday ekan, hozirgi taraqqiyot davrida odamiylik mezonlariga rioya etish, o‘zaro ahillik muhiti yaratib, saodatli hayot kechirish yo‘lida ushbu asar ham bir mayoq vazifasini o‘taydi, inshoalloh.
“Inson qadri” kitobi har bir vatandoshimizga muborak va manfaatli bo‘lsin!
Akbarshoh Rasulov
Xorazmda diniy ta’lim muassasalariga kirish imtihonlari boshlandi
Bugun, 7 avgust kuni O‘zbekiston musulmonlari idorasi tasarrufidagi oliy va o‘rta maxsus diniy ta’lim muassasalariga 2026-2027 o‘quv yili uchun 4-hudud — Xorazm viloyati bo‘yicha kirish test sinovlariga start berildi.
Imtihonlar Urganch tumanidagi Bilim va malakalarni baholash agentligining Xorazm viloyati bo‘limi binosida yuqori saviyada tashkil etilmoqda. Ma’lumotlarga ko‘ra, mazkur hudud bo‘yicha test sinovlarida jami 289 nafar abituriyent ishtirok etishi belgilangan.
Mazkur jarayonlarning ochiq, adolatli va tasdiqlangan nizomlar asosida o‘tishini ta’minlash maqsadida O‘zbekiston musulmonlari idorasi rahbariyati, Din ishlari bo‘yicha qo‘mita mas’ullari, diniy ta’lim muassasalari rahbarlari, soha mutaxassislari hamda mustaqil kuzatuvchilar jalb etilgan.
Manzil: Urganch tumani, Yuqoriovul QFY, Yuqorido‘rmon MFY. Murojaat uchun telefon: +99 899 775 93 45
Qabul jarayonlari bo‘yicha rasmiy kanal: t.me/qabulmuslimuz
O‘zbekiston musulmonlari idorasi
Matbuot xizmati
