Islom ta’lim muassasalari bitiruvchilari bilan uchrashuv
Samarqand viloyati bosh imom-xatibining o‘rinbosarlari Xayrullo domla Sattarov hamda Nursultonxon domla Abdumannonovlar 2024–2025 o‘quv yilida islom ta’lim muassasalarini muvaffaqiyatli tamomlagan 28 nafar bitiruvchi bilan uchrashuv o‘tkazdi.
Uchrashuvda bitiruvchilarning bandligini ta’minlash, ularni munosib ish joylari bilan ta’minlash hamda zarur mehnat sharoitlarini yaratish masalalari muhokama qilindi.
Shuningdek, yosh imom-xatiblar va imom-noiblar bilan bo‘lib o‘tgan samimiy suhbatda kelgusidagi xizmat faoliyatida mas’uliyat, sadoqat va doimiy ravishda bilim va malaka oshirib borish muhim ekani alohida ta’kidlandi.
Uchrashuv o‘zaro fikr almashuv hamda amaliy tavsiyalar bilan yakunlandi.
Sammuslim.uz
Diniy ta’lim sohasida ilk bor Respublika anjumani bo‘lib o‘tadi
Joriy yilning 19-20 avgust kunlari O‘zbekiston musulmonlari idorasi tasarrufidagi oliy va o‘rta maxsus diniy ta’lim muassasalari professor-o‘qituvchilarining «Zamonaviy diniy ta’lim: pedagogika, ilm-ma’rifat va innovatsiya» nomli I ilmiy-amaliy anjumani Islom sivilizatsiyasi markazida bo‘lib o‘tadi.
Davlatimiz Rahbari tomonidan har jabhada olib borilayotgan yangilanish va islohotlarga hamohang tarzda Diniy idora tarixida ilk bor o‘tkazilayotgan ushbu tadbirda jami 700 nafar pedagog va soha mutaxassisi, jumladan, 300 nafar ishtirokchi bevosita anjuman zalida, 400 nafar ishtirokchi esa hududlardan videoselektor orqali qatnashadi.
Anjumandan ko‘zlangan maqsad sohadagi istiqbolli rejalarni muhokama qilish, diniy ta’limda pedagogik va kasbiy mahoratni oshirish, ta’lim jarayoniga zamonaviy texnologiyalarni yanada keng tatbiq etish hamda diniy ta’limni yangi bosqichga olib chiqishdir.
Dastur doirasida soha rahbarlari ishtirokida tahliliy ma’ruzalar, taniqli professorlar tomonidan mahorat darslari, ilmiy-metodik mashg‘ulotlar bo‘lib o‘tadi. Shuningdek, ishtirokchilar O‘zbekiston musulmonlari idorasi, Islom sivilizatsiyasi markazi bilan yaqindan tanishib, Hazrati Imom majmuasidagi tarixiy qadamjo va obidalarni ziyorat qilishadi.
O‘zbekiston musulmonlari idorasi Matbuot xizmati