Qashqadaryo yosh soha xodimlari bilan ochiq muloqot
Bugun Qashqadaryo viloyatida 2024–2025 o‘quv yilida diniy ta’lim muassasalarini muvaffaqiyatli tamomlagan yosh soha xodimlari bilan ochiq muloqot uchrashuvi bo‘lib o‘tdi. Uchrashuvda viloyat bosh imom-xatibi Rahmatillo domla Usmonov soha xodimlarining hol-ahvoli va xizmat faoliyatini o‘rganib, ularni qo‘llab-quvvatlash, bilim va tajribalarini oshirish masalalariga alohida e’tibor qaratdilar.
Muloqot chog‘ida yosh imomlarga:
-
jamoat bilan muomala madaniyati, ma’naviy-ma’rifiy tadbirlarni zamonaviy talablarga muvofiq tashkil etish,
-
diniy bilimlarni muntazam oshirish, kitob mutolaasi va axborot makonida faol bo‘lish,
-
turli yot g‘oyalarga ma’rifat bilan javob berish,
borasida muhim tavsiyalar berildi.
Viloyat bosh imom-xatibi yosh imomlar sohaning kelajakdagi tayanchi ekanini ta’kidlab, ulardan doimiy izlanish, halollik, sabr-toqat va fidoyilik talab etilishini qayd etdilar. Uchrashuv yakunida soha xodimlari maslahatlarni amaliyotda qo‘llashga tayyorliklarini bildirdilar.
O‘zbekiston musulmonlari idorasi
Qashqadaryo viloyati vakilligi
Matbuot xizmati
Aholi bilan ochiq muloqot: murojaatlar yechim topmoqda
O‘zbekiston musulmonlari idorasi tomonidan aholi bilan yo‘lga qo‘yilgan ochiq va samimiy muloqot tizimi fuqarolarning murojaatlarini atroflicha o‘rganish hamda ularga tezkor yechim topishda muhim omil bo‘lmoqda.
12 avgust kuni Diniy idora raisi o‘rinbosari Zayniddin domla Eshonqulov navbatdagi fuqarolar qabulini o‘tkazib, yurtdoshlarimizning arz, taklif va murojaatlarini tingladilar. Yuzma-yuz suhbat jarayonida masjidlar holati va faoliyati, imom-xatiblar ishi, Haj va Umra ziyoratlarini tashkil etish, oilaviy munosabatlarni tartibga solish hamda moddiy yordam ko‘rsatishga oid ko‘plab masalalar chuqur tahlil qilinib, ularning aksariyati joyida ijobiy hal etildi.
Eslatib o‘tamiz, bu kabi qabullar va fuqarolar bilan muloqot tadbirlari Diniy idoraning hududiy vakilliklari hamda yurtimizdagi barcha jome masjidlarda har haftaning chorshanba kuni imom-xatiblar tomonidan o‘tkazib kelinmoqda.
O‘zbekiston musulmonlari idorasi
Matbuot xizmati
