Shayx Yusufxon to‘ra Shokirov – Toshkent islom institutining birinchi rektori
Toshkent islom institutida taniqli ulamo, Oliy ma’hadning birinchi rektori Shayx Yusufxon to‘ra Shokirov tavalludining 100 yilligiga bag‘ishlangan ma’rifiy tadbir bo‘lib o‘tdi.
Tadbirda Shayx hazratning farzandi — Muhammadakmalxon domla Shokirov ishtirok etib, padari buzrukvorining ibratli hayoti va faoliyati haqida so‘zlab berdi. Davra suhbati davomida Oliy ma’hadning tashkil etish jarayoni, ilk rektor sifatidagi fidokorona xizmatlari, pedagogik mahorati va yuksak insoniy fazilatlariga oid nodir faktlar tilga olindi.
Institut jamoasi hamda «Xadichai Kubro» ayol-qizlar o‘rta maxsus islom ta’lim muassasasi ustozlari qatnashgan uchrashuvda Shayx Yusufxon to‘ra Shokirovning nafaqat din xodimi, balki mehribon oila boshlig‘i va ilm-fan rivojiga hissa qo‘shgan buyuk sulola vakili sifatidagi siymosi gavdalantirildi. Tadbir yakunida mazmunli suhbat uchun Muhammadakmalxon domlaga institut rektori tomonidan tashakkurnoma va esdalik sovg‘alari taqdim etildi.
Shayx Yusufxon to‘ra hayotiga bag‘ishlangan turkum tadbirlar davom etmoqda:
Yubiley doirasida talabalar uchun quyidagi mavzularda suhbatlar tashkil etilmoqda:
-
Uyg‘un domla G‘afurov (TII rektori): «O‘zbekiston musulmonlari idorasi Xalqaro aloqalar bo‘limining tashkil etilishi va undagi Shayx Yusufxon to‘raning faoliyati»;
-
Shayx Abdulaziz Mansur (Faxriylar kengashi raisi): «Shayx Yusufxon to‘raning pedagogik va shaxsiy fazilatlari»;
-
Foziljon domla Ubaydullayev (Mirza Yusuf masjidi imom-xatibi): «Shayx Yusufxon to‘raning Diniy idora masjidlar bo‘limidagi faoliyati».
Bu kabi xotira tadbirlari ajdodlar va avlodlar o‘rtasidagi ma’naviy rishtani bog‘lashga, talaba-yoshlar qalbida ulug‘ ustozlarga nisbatan ehtirom va ilmga muhabbat uyg‘otishga xizmat qiladi.
Yoqubjon Buxarboyev,
TII prorektori
"Imom Buxoriy" ordeni — yuksak ehtirom ramzi!
Kuni kecha mamlakatimiz mustaqilligining 35 yilligi munosabati bilan muhtaram Prezidentimiz tomonidan yuksak davlat mukofotlariga sazovor bo‘lgan bir guruh vatandoshlarimiz taqdirlandi.
Eng quvonchlisi shuki, tadbirda diniy-ma’rifiy sohada fidokorona xizmat qilib kelayotgan, xalqimizning ma’naviy yuksalishiga beqiyos hissa qo‘shayotgan taniqli ulamolarimiz va faxriylarimizning zahmatli mehnatlari yuksak darajada e’tirof etildi!
Xususan, Diniy idora tizimida uzoq yillardan beri samarali xizmat qilib kelayotgan ustozlardan O‘zbekiston musulmonlari idorasi raisining birinchi o‘rinbosari Homidjon domla Ishmatbekov, O‘zbekiston musulmonlari idorasi Faxriylar kengashi raisi Shayx Abdulaziz Mansur, Samarqand viloyati Payariq tumani "Imom al-Buxoriy" jome masjidi faxriy imomi Mahmudjon domla Ibodullayev, Buxoro viloyati Kogon tumani "Bahouddin Naqshband" jome masjidi imom-xatibi Abdug‘ofur domla Razzoqov "Imom Buxoriy" ordenini Davlatimiz Rahbaridan qabul qilib olishdi.
Ustozlarning ilmiy-ma’rifiy faoliyati, xalq ichida ma’rifat ulashishdagi fidoyiliklari davlatimiz tomonidan yuksak qadrlangani butun diniy-ma’rifiy sohada mehnat qilayotganlar uchun katta faxr va sharafdir.
Ushbu voqea Yangi O‘zbekistonda diniy-ma’rifiy sohaga, milliy qadriyatlarimizni avaylab-asrash hamda rivojlantirishga qaratilayotgan izchil va xayrli siyosatning amaliy ifodasidir.
Xalqimizda qadimdan ma’rifat ahlini ulug‘lash, ularning zahmatli mehnatini qadrlash ezgu an’ana sanaladi. Islom ta’limotida ham ilm egalariga alohida maqom va hurmat bilan qaraladi. Zero, Imom Termiziy bobomiz rivoyat qilgan hadisi sharifda: «Ulamolar payg‘ambarlarning merosxo‘rlaridir», deyilgan.
Ulamolarga ko‘rsatilayotgan bunday e’tiborning nechog‘li xayrli ekani quyidagi hikmatda ham o‘z ifodasini topgan. Ulug‘ zotlardan biri Tovus rahmatullohi alayh otasidan quyidagicha rivoyat qilgan: «To‘rt kishini hurmat qilish sunnatdir: olim, yoshi ulug‘ inson, podshoh va ota» (Imom Abdurazzoq rivoyati).
Mazkur yuksak mukofot milliy va diniy qadriyatlarimizni tiklash, Islom ma’rifatini keng targ‘ib etish, jamiyatda bag‘rikenglik va tinchlik-omonlikni bardavom saqlash yo‘lidagi ko‘p yillik xayrli xizmatlarning munosib e’tirofidir.
Davlatimizning bunday e’tibori diniy soha xodimlariga yanada ulkan mas’uliyat yuklaydi, ma’naviy yuksalish yo‘lidagi xayrli xizmatlar ko‘lamini yanada kengaytirishga xizmat qiladi, insha Alloh.
O‘zbekiston musulmonlari idorasi Matbuot xizmati
- «
- »