Rasululloh ﷺ yaxshi ko‘rgan ism
Bismillahir Rohmanir Rohiym
Rasululloh sollallohu alayhi vasallam uchun ayollarning ismidan eng mahbubi Zaynab bo‘lgan. U zot o‘zlarining to‘ng‘ich qizlariga shu ismni qo‘yganlar.
Imom Muslim Zaynab bint Abu Salamadan quyidagilarni rivoyat qiladilar: «Mening ismim Barra edi. Rasululloh sollallohu alayhi vasallam uni “Zaynab” deb o‘zgartirdilar. Zaynab binti Jahshning ismi ham Barra edi. Rasululloh sollallohu alayhi vasallam uni ham “Zaynab” deb o‘zgartirdilar».
Muhammad ibn Amr ibn Ato roziyallohu anhudan rivoyat qilinadi: «Qizimni Barra deb nomladim. Zaynab binti Abu Salama menga: «Rasululloh sollallohu alayhi vasallam bu ismdan nahiy qilganlar. Men Barra deb nomlangan edim. Rasululloh sollallohu alayhi vasallam: «O‘zingizni o‘zingiz pok demang. Sizlardan kim yaxshilik ahli ekanini Alloh biluvchidir», dedilar. «Uni nima deb nomlaylik?» deyishdi. «Zaynab deb nomlanglar», dedilar».
Go‘zal va xushbo‘y bir daraxt ham “zaynab” deb ataladi.
O‘zbekiston Islom sivilizatsiyasi markazi noyob Qur’oni karim nusxasini yaratish bo‘yicha jahon xattotlar tanlovini e’lon qildi
26 avgust kuni O‘zbekistondagi Islom sivilizatsiyasi markazida “Islom sivilizatsiyasi: yangi nigoh, yangi kashfiyotlar” xalqaro mediaforumning “Asrlarni birlashtiruvchi meros. Islom sivilizatsiyasining ma’naviy mazmun-mohiyati” mavzusidagi uchinchi yalpi sessiyasi bo‘lib o‘tdi, deb xabar qilmoqda “Dunyo” AA.
Sessiya doirasida Qur’oni karim merosi, qadimiy qo‘lyozmalar, islom xattotligi, hujjatli kino hamda tarixiy manbalarni o‘rganishda sun’iy intellektdan foydalanishga bag‘ishlangan xalqaro loyihalar taqdim etildi.
Xususan, “114 Qur’on: islom olami xattotligining 114 durdonasi”, “Katta Langar Qur’oni: haqiqat va afsonalar”, “Allohning 99 ismi: Uning go‘zal ismlari orqali Yaratganni anglash”, “Sun’iy intellekt – qadimiy qo‘lyozmalarni o‘qishning raqamli kaliti” loyihalari hamda “Yagona tarixiy meros sahifalari” loyihasi doirasida yaratilgan “Masjid” hujjatli filmi namoyish etildi.
Xalqaro muhokamalarda Islom hamkorlik tashkiloti, shuningdek, Jazoir, O‘mon, Pokiston, Saudiya Arabistoni, Iroq, Mali va O‘zbekistonning yetakchi ommaviy axborot vositalari vakillari ishtirok etib, islomofobiya va mavjud stereotiplarni bartaraf etishda medianing o‘rni haqida fikr almashdi.
Sessiya yakunida turli mamlakatlar va xattotlik maktablarining an’analarini birlashtiruvchi noyob Qur’oni karim nusxasini yaratish bo‘yicha Xattotlar umumjahon tanlovi e’lon qilindi.
Eslatib o‘tamiz, mazkur xalqaro mediaforumning asosiy tadbirlari O‘zbekiston Islom sivilizatsiyasi markazida o‘tkazilib, unda qariyb 50 mamlakatdan media va ekspert hamjamiyatining 300 nafarga yaqin vakili — media kompaniyalar, axborot agentliklari va telekanallar rahbarlari, jurnalistlar, prodyuserlar, olimlar hamda kreativ industriya mutaxassislari ishtirok etmoqda.
O‘zbekiston musulmonlari idorasi Matbuot xizmati