Surxondaryo imomlari ishtirokida “yashil belbog‘” barpo etilmoqda
#yashil_makon #yangilik
Obodlik ko‘ngildan boshlanadi. Buni yaxshi anglagan mehnatsevar xalqimiz hamisha bu zaminni obod qilishga intiladi. Atrofning go‘zalligi, yashillikka burkanishi, kishilarda bahoriy kayfiyat uyg‘otadi. Bunday xayrli amallar, avvalo, insonlar salomatligi va ruhiyatiga ijobiy ta’sir qiladi.
Muhtaram Prezidentimiz 2025 yilning 26 dekabr kuni Oliy Majlis va O‘zbekiston xalqiga qilgan Murojaatnomasida ekologik muvozanatni ta’minlash, “yashil” energetikani rivojlantirish va suv resurslaridan oqilona foydalanish masalalariga alohida e’tibor qaratilib, Surxondaryo viloyatida chang-to‘zonlarning oldini olish maqsadida o‘n ming gektar maydonda yashil makon barpo etish borasidagi topshiriqlari ham shu yo‘nalishdagi ezgu tashabbuslarning mantiqiy davomi bo‘ldi.
Surxondaryo viloyati hokimligi hamda O‘zbekiston musulmonlari idorasi Surxondaryo viloyati vakilligi yurtboshimizning xayrli tashabbuslarini qo‘llab-quvvatlagan holda viloyatda muntazam esadigan changli shamollarning salbiy ta’sirini kamaytirish, yashil belbog‘lar barpo etishga kirishdi. Viloyatning Angor va Termiz tumanlarini bog‘lovchi M-39 xalqaro avtomagistral yo‘li bo‘yida joylashgan uch gektar yer maydonda ko‘kalamzorlashtirish ishlari olib borilmoqda. Ushbu tadbir oldi jonliq so‘yilib, xayrli duolar qilindi. So‘ng hududda yapon tuti, jiyda, katalpa va sosna kabi mevali va manzarali ko‘chatlar ekilib, “yashil belbog‘” barpo etilmoqda.
Ana shunday xayrli ishlarga barchamiz o‘z hissamizni qo‘shib, yurtimiz obodligiga hissa qo‘shaylik, azizlar.
O‘zbekiston musulmonlari idorasi
Matbuot xizmati
Muqaddas maskanga munosabat qanday bo‘lishi kerak?
Imom Buxoriy majmuasi nafaqat O‘zbekiston, balki butun islom olami uchun ulug‘ va muqaddas qadamjolardan biri hisoblanadi.
Hazrat Imom Buxoriydek buyuk muhaddis nomi bilan bog‘liq ushbu majmua bugun yurtimizning eng yirik ma’naviy va madaniy markazlaridan biriga aylangan. Har kuni minglab ziyoratchilar bu yerga kelib, ajdodlar merosi, ma’rifat va muqaddas tarix bilan yuzlashmoqda.
Majmua nafaqat ziyoratgoh, balki xalqimizning boy ma’naviy merosi, milliy me’morchiligi va islom sivilizatsiyasidagi o‘rnini namoyon etuvchi noyob madaniy ob’yektdir. Uni barpo etish uchun katta mehnat, yuksak mahorat va qimmatbaho qurilish materiallari sarf etilgan. Shu bois bu qutlug‘ maskanni asrab-avaylash har birimiz uchun muhim vazifadir.
Yaqinda Madaniy meros agentligi tomonidan ayrim ziyoratchilarning majmua hududida beparvo munosabatda bo‘layotgani haqida ma’lumot berildi. Ayrim holatlarda ustunlar, ayvonlar va muzey eksponatlariga ehtiyotsiz munosabatda bo‘lish, chiqindilarni duch kelgan joyga tashlash kabi holatlar kuzatilmoqda. Bu esa nafaqat ziyoratgoh ko‘rkiga, balki uning ma’naviy muhitiga ham salbiy ta’sir ko‘rsatadi.
Bu holat barchamizni sergaklikka chaqirishi kerak. Zero, muqaddas qadamjoga kelgan inson avvalo o‘zini munosib tutishi, tozalik va tartib-qoidalarga amal qilishi lozim. Chunki ziyoratgoh — oddiy sayrgoh emas. Bu yerda asrlar nafasi, buyuk ajdodlar ruhi va ma’rifat ziyosi mujassam.
Tozalik esa inson madaniyatining eng muhim ko‘rsatkichlaridan biri. Islom ta’limotida ham poklikka alohida ahamiyat berilgan. Payg‘ambarimiz Muhammad alayhissalom “Tozalik — iymonning yarmidir”, deya ta’kidlaganlar. Demak, ziyoratgoh hududida ozodalikni saqlash nafaqat fuqarolik burch, balki ma’naviy mas’uliyat hamdir.
Ayniqsa, chet ellik mehmonlar O‘zbekiston haqidagi ilk taassurotni aynan shunday muqaddas maskanlar orqali oladi. Agar ziyoratgoh ozoda, tartibli va fayzli bo‘lsa, bu xalqimizning yuksak madaniyati va ma’naviyatini namoyon etadi. Aksincha, beparvolik va tartibsizlik mamlakatimiz nufuziga salbiy ta’sir ko‘rsatishi mumkin.
Yosh avlodni ziyoratgoh madaniyati ruhida tarbiyalash ham muhim ahamiyatga ega. Bolalar kattalardan ibrat oladi. Agar ota-ona muqaddas joyda tartibga amal qilsa, ehtiyotkor bo‘lsa, farzand ham shu ruhda tarbiya topadi. Shu bois har bir inson o‘z harakati bilan boshqalarga namuna bo‘lishi kerak.
Imom Buxoriy majmuasi — millatimiz g‘ururi va ma’naviy boyligi. Uni asrash, tozaligini saqlash va ehtirom bilan munosabatda bo‘lish har bir insonning vijdoniy burchidir. Ziyoratgohlarga bo‘lgan munosabatimiz orqali biz o‘z madaniyatimiz, ma’naviyatimiz va ajdodlar merosiga bo‘lgan hurmatimizni namoyon etamiz.
Asliddin Mustafoyev, majmua axborot xizmati rahbari.
O‘zbekiston musulmonlari idorasi Matbuot xizmati