Mir Arabda talabalarni qo‘llab-quvvatlash uchrashuvi o‘tkazildi
Joriy yilning 17 yanvar kuni Mir Arab oliy madrasasida uchrashuv tashkil etildi. Unda Buxoro viloyati bosh imom-xatibi o‘rinbosari Otabek domla Avezov hamda mas’ul xodimlar ishtirok etdi. Mazkur tadbir hududiy vakilliklar hamda madrasalar o‘rtasida uzviy hamkorlikni yo‘lga qo‘yish, o‘zaro bog‘liqlikni mustahkamlash maqsadida tashkil etildi.
Uchrashuv davomida talabalar bilan ochiq va samimiy muloqot olib borilib, ularning ta’lim jarayoni, yashash sharoitlari, shuningdek, ijtimoiy va ma’naviy ehtiyojlari bilan yaqindan tanishildi.
Shu bilan birga, bitiruvchi talabalarni kelgusida hududlarda munosib faoliyat bilan ta’minlash, ularning ilmiy va amaliy salohiyatini to‘liq ro‘yobga chiqarish masalalariga alohida e’tibor qaratildi.
Tadbir yakunida homiylar ko‘magida faol va iqtidorli talabalar rag‘batlantirildi.
O‘zbekiston musulmonlari idorasi
Buxoro viloyati vakilligi
Matbuot xizmati
Buxoroda Qur’on musobaqasi o‘tkazildi
O‘zbekiston Respublikasi Davlat mustaqilligining 35 yilligi munosabati bilan Buxoro viloyatida faoliyat olib borayotgan imom-xatib va imom-noiblar o‘rtasida “Qur’on tinchlikka buyuradi” shiori ostida Qur’on musobaqasi o‘tkazildi.
Ochilish marosimida Buxoro viloyati bosh imom-xatibi Jobir domla Elov so‘zga chiqib, mazkur ma’rifiy tadbirning ahamiyati haqida so‘zlab, ishtirokchilarga muvaffaqiyat tiladi.
Musobaqani o‘tkazishdan ko‘zlangan maqsad diniy soha xodimlarining Qur’oni karim bo‘yicha bilim va mahoratini yanada oshirish, ular o‘rtasida o‘zaro hamjihatlik muhitini shakllantirishdir.
Bellashuvda viloyatning tuman va shaharlarida faoliyat yuritayotgan 10 nafar imom-xatib va imom-noib ishtirok etib, Qur’oni karimni o‘qish va yoddan bilish borasidagi bilim va mahoratini namoyish etishdi.
Birinchi o‘ringa Peshku tumani “Chiqirchi” jome masjidi imom-noibi Afzal Shavkatov sazovor bo‘ldi. Ikkinchi o‘rin Buxoro shahridagi “Volidi Abdulazizxon” jome masjidi imom-noibi Abduvohid Akramovga, uchinchi o‘rin Jondor tumani “Raboto‘g‘lon” jome masjidi imom-xatibi Shuhrat Sherovga nasib etdi.
G‘oliblarga diplom va qimmatbaho sovg‘alar topshirildi.
O‘zbekiston musulmonlari idorasi
Matbuot xizmati
