Farzandni urib tarbiyalash to‘g‘rimi?
Savol: Allohga shukr, bir emas ikki kelinim bor. Ularga qo‘limdan kelgancha, bilganlarimni o‘rgatyapman. Xuddi ona-boladek bo‘lishga harakat qilyapman. Lekin shu kichik kelinimning bir ishidan ko‘nglim ranjidi. Nabiralarimni ko‘p uradi. Qancha nasihat qildim, hatto qattiq gapirib ham ko‘rdim, hech foydasi bo‘lmadi. Baribir o‘z bilganidan qolmaydi. Sababini so‘rasam, tushuntirib berolmaydi. Kelinimning qilayotgan ishi to‘g‘rimi?
Javob:
Bismillahir Rohmanir Rohim.
Bolani urish bu, tarbiya berishda mahoratsizlik belgisi hisoblanadi. Chunki haqiqiy solih insonlar bolalarini shirin so‘zlar bilan tarbiyalaydi. Farzand noto‘g‘ri ish qilganida tanbeh berish, urish-so‘kish tarbiyadagi noto‘g‘ri uslubdir.
Inson zoti doimo mehr-muhabbatga ehtiyojli bo‘ladi. Ayniqsa, bolalar bu narsaga juda ham muhtojlar. Aslida, mehr-muhabbat dini bo‘lmish Islom, shuning uchun ham bolalarga mehr-muhabbat ko‘rsatishni ota onalarga vazifa etib yuklagan.
Abu Hurayra roziyallohu anhudan rivoyat qilinadi: «Rasululloh sollallohu alayhi vasallam o‘z huzurlarida Aqra’ ibn Hobis Taymiy o‘tirganda Hasan ibn Alini o‘pdilar. Shunda Aqra’: «Mening o‘nta bolam bor. Ulardan birortasini o‘pganim yo‘q», – dedi. Shunda Rasululloh sollallohu alayhi vasallam unga nazar soldilar-da, so‘ng: «Rahm qilmaganga rahm qilinmas», – dedilar» (Buxoriy, Abu Dovud va Termiziy rivoyat qilganlar).
Shunday ekan biz ham Alloh taolo bizga ato qilgan farzand deb atalmish ne’matning qadriga yetishimiz, farzandimizning odobini go‘zal qilishimiz, kelajakda uni o‘zi uchun hamda yashab turgan jamiyatiga foyda keltiruvchi qilib tarbiyalashimiz lozim. Vallohu a’lam.
O‘zbekiston musulmonlari idorasi
Fatvo markazi
Fidokorona xizmat e’tirofsiz qolmaydi
O‘zbekiston musulmonlari idorasi tasarrufidagi "Ko‘kaldosh" o‘rta maxsus islom ta’lim muassasasida ko‘p yillar halol va fidokorona mehnat qilgan xodimamiz Ahmadjonova Nilufar Habibullayevnaning 50 yoshlik yubileyi munosabati bilan ta’lim muassasasi hamda kasaba uyushmasi tomonidan tadbir o‘tkazildi.
Tadbirda ta’lim muassasasi mudiri M. Erkayev, o‘quv ishlari bo‘yicha mudir o‘rinbosari N. Djalolov va manaviy-ma’rifiy ishlar bo‘yicha mudir o‘rinbosari, ta’lim muassasasi kasaba uyushmasi raisi A.G‘aniyev ishtirok etishdi. Muassasa mudiri M. Erkayev muhtarama opamizni shaxsan o‘zi tabriknoma bilan taqdirladi. Esdalik sovg‘alari bilan ham mukofotlandi.
Nilufar opa har kuni tong sahardan ilm dargohiga kelib, uning ozoda, shinam va pokiza bo‘lishiga yillarida sabr, ixlos va sadoqat bilan o‘z hissasini qo‘shib kelmoqda. Bunday kamtarin, ammo qadri baland mehnat barchamiz uchun ibrat namunasidir.
Payg‘ambarimiz sollallohu alayhi vasallam: "Pokizalik iymondandir", deb marhamat qilganlar. Ilm va marifat maskanining ta’minlash — talabalar ustozlarning tinch, toza va barakali ilm olishiga munosib hissa qo‘shadigan ezgu ishdir. Ana beminnat xizmat har qanday e’tirof va ehtiromga loyiqdir.
Bilim yurtimiz o‘z yordamga g‘amxo‘rlik qilishni muhim burch deb biladi. Zero, ilm dargohiga qilingan har bir xizmat — Allohning roziligi yo‘lidagi savobli amaldir. Kim ilm ahliga va ilm maskaniga xizmat qilsa, o‘sha ilmdan taralayotgan ezgulikning ajridan bahramand bo‘lishi umid qilamiz.
Muhtarama opamizga mustahkam sog‘lik-salomatlik, uzoq umr, oila baxti va ishlarida baraka tilaymiz. Alloh taolo halol mehnatlarini ajru mukofotsiz qoldirmasin, qilgan ezgu ishlari va mehnatlarining rohatini ko‘rish uzoq yillar davomida nasib etsin!
"Ko‘kaldosh" o‘rta maxsurs islom ta’lim muassasasi
matbuot xizmati
