Muftiy hazrat Misrdagi talaba-yoshlar bilan muloqot qildilar
Xorij safari davomida O‘zbekiston musulmonlari idorasi raisi, muftiy Shayx Nuriddin Xoliqnazar hazratlari Misrda ta’lim olayotgan talaba-yoshlar bilan dildan suhbat qildilar.
Muftiy hazratlari O‘zbekiston va Misr o‘rtasida yaqin hamkorlik aloqalari izchil rivojlanib borayotgani, ayniqsa, diniy-ma’rifiy sohadagi hamkorlik yangi bosqichga ko‘tarilganini qayd etdilar. Ayniqsa, O‘zbekiston musulmonlari idorasi va Misrning diniy muassasalari – Azhari sharif, Vaqflar vazirligi va Dorul ifto o‘rtasidagi hamkorlik aloqalari jadal rivojlangani, xususan, diniy ta’lim yo‘nalishida malakali kadrlarni jalb qilish, imom-xatiblar malakasini oshirish, xalqaro anjuman-ko‘rgazmalarda ikki tomonlama faol ishtirok va hamkorlik qilinayotgani kabilarga to‘xtaldilar.
Shayx Nuriddin Xoliqnazar hazratlari davlatimiz Rahbari tashabbuslari bilan mamlakatimizda so‘nggi yillarda diniy-ma’rifiy sohadagi yangilik va o‘zgarishlar, mo‘min-musulmonlarga berilayotgan imkoniyatlar, xususan, Fatvo markazi faoliyati, masjid-madrasalar ochilishi, mavjudlari obod qilinishi, o‘lkamizda faoliyat olib borayotgan Qur’oni karim va tajvid kurslari, madrasalar faoliyati va ta’lim sifati tubdan yaxshilayotgani haqida so‘zlab, mana shunday xayrli ishlarda al-Azhar kabi dorulfununlarni tamomlagan ahli ilmlar ham kamarbasta bo‘lishlari zarurligini ta’kidladilar.
Shuningdek, oxirgi yillarda diniy soha xodimlariga e’tibor tubdan yaxshilangani, kasbiy salohiyatni oshirish va ijtimoiy qo‘llab-quvvatlash ishlariga katta e’tibor qaratilayotganini qo‘shimcha qildilar.
O‘z navbatida ona Vatanga muhabbat, milliy qadriyatlarga sodiqlik, e’tiqod mustahkamligini saqlash va belgilangan tartib-qoidalarga rioya etish zarurligi alohida qayd etildi.
Uchrashuv yakunida talaba-yoshlar mana shunday samimiy muloqotlar, davlatimizning doimiy e’tibor va g‘amxo‘rligi uchun minnatdorlik izhor etib, kelajakda yurt rivoji va xalqimiz farovonligi uchun xizmat qilishlarini bildirdilar.
O‘zbekiston musulmonlari idorasi
Matbuot xizmati
“Network News Pakistan”: 2025 yilda O‘zbekiston Markaziy Osiyo aholisi uchun eng ommabop sayohat yo‘nalishi bo‘ldi
Pokistonning “Network News Pakistan” elektron nashri “O‘zbekiston turizmi o‘sish bo‘yicha Markaziy Osiyoda birinchi o‘rinni egalladi” sarlavhali axborot maqolani e’lon qildi, deb xabar qilmoqda “Dunyo” AA.
Unda Butunjahon sayohat va turizm kengashining (World Travel & Tourism Council – WTTC) “Sayohat va turizmning 2026 yilga qadar iqtisodiy ta’sirini o‘rganish” hisobotiga ko‘ra, 2025 yilda Markaziy Osiyo dunyoning eng tez rivojlanayotgan sayyohlik mintaqasiga aylangani ta’kidlangan.
“WTTC o‘z tadqiqotlarini dunyoni 13 ta yirik mintaqaga bo‘lgan holda olib boradi. 2025 yil yakunlariga ko‘ra, Markaziy Osiyo turizm sohasini rivojlantirishning bir nechta asosiy ko‘rsatkichlari bo‘yicha dunyoda birinchi o‘rinni egalladi. Shu bilan birga, O‘zbekiston bu ko‘rsatkichlarning barchasi bo‘yicha Markaziy Osiyo mamlakatlari orasida yetakchiga aylandi”, – deyilgan manbada.
Nashrda qayd etilishicha, 2025 yilda turizmning Markaziy Osiyo yalpi ichki mahsulotiga qo‘shgan umumiy hissasi 17,7 foizga, sohaning bevosita hissasi esa 19,6 foizga oshgan. Mintaqada turistik xizmatlar eksporti (visitor exports) yil davomida 26,4 foizga o‘sib, 9,9 milliard AQSH dollarini tashkil etdi.
Mintaqadagi turistik xizmatlar eksporti umumiy hajmining deyarli yarmi O‘zbekiston hissasiga to‘g‘ri keladi. Jumladan, 2025 yilda O‘zbekistonga 4,8 milliard AQSH dollari miqdorida turistik xizmatlarni eksport qilgan. WTTC ma’lumotlariga ko‘ra, 2025 yilda O‘zbekiston Markaziy Osiyo aholisi uchun eng ommabop sayohat yo‘nalishi bo‘ldi.
“Umuman olganda, bu ko‘rsatkichlar turizmning mintaqaviy xarakterga ega ekanini anglatadi. Markaziy Osiyo aholisi ko‘pincha o‘z mintaqasi ichida sayohat qiladi”, – deyiladi maqolada.
“Network News Pakistan” WTTC prognoziga tayanib yozishicha, 2036 yilga borib turizm sohasining Markaziy Osiyo iqtisodiyotiga qo‘shadigan umumiy hissasi 29,7 milliard AQSH dollariga yetadi.
O‘zbekiston musulmonlari idorasi Matbuot xizmati