Ilm yo‘lidagi yoshlarga e’tibor va e’tirof
Imom Buxoriy nomidagi Toshkent islom institutida Namangan viloyatidan kelib tahsil olayotgan talabalar uchun “Masofalarni yaqin qiluvchi muloqot” shiori ostida davra suhbati o‘tkazildi.
Tadbir O‘zbekiston musulmonlari idorasi Namangan viloyati vakilligi tashabbusi bilan tashkil etildi.Namangan viloyati bosh imom-xatibining birinchi o‘rinbosari Obidxon domla Ikromov 30 nafar talaba bilan yuzma-yuz suhbatlashib, odob-axloq, ustozga hurmat va ilm yo‘lida oliy himmatli bo‘lish haqida ma’naviy-hayotiy nasihatlar berdi.
Tadbir yakunida 30 nafar talabaga esdalik sovg‘alari topshirildi. Shuningdek, eng faol 4 nafar talabaga to‘lov-shartnomalarini qoplash uchun 10 million so‘mdan maxsus sertifikatlar taqdim etildi.
***
22-yanvar kuni «Ko‘kaldosh» o‘rta maxsus islom bilim yurtida Namangan viloyatidan kelib tahsil olayotgan talabalar uchun «Masofalarni yaqin qiluvchi muloqot» shiori ostida davra suhbati o‘tkazildi.
O‘MI Namangan viloyati bosh imom-xatibining o‘rinbosari Akmalxon domla Ahmedov 12 nafar talaba bilan ochiq muloqot o‘tkazib, ilm olishda to‘g‘ri niyat, islomiy odob-axloq va ustozlarga hurmat masalalariga e’tibor qaratdi.
Tadbir yakunida talabalarga esdalik sovg‘alari topshirildi.
Bu kabi uchrashuvlar yoshlar uchun moddiy-ma’naviy madad va yurt ravnaqi yo‘lida xizmat qilishga katta rag‘bat bo‘lib xizmat qiladi.
O‘zbekiston musulmonlari idorasi
Matbuot xizmati
2027 yil uchun diniy-ma’rifiy nashrlarga obuna boshlandi
O‘zbekiston musulmonlari idorasi tasarrufidagi “Shamsuddinxon Boboxonov” nashriyot-matbaa ijodiy uyining “Hidoyat” va “Mo‘minalar” jurnallari hamda “Islom nuri” gazetasiga 2027 yil uchun obuna mavsumiga start berildi.
Shu munosabat bilan tashkil etilgan ma’rifiy tadbirda soha mutasaddilari, imom-xatiblar va otinoyilar ishtirok etdi. Unda so‘z olganlar jamiyatda sof ma’rifatni yoyish, aholi, ayniqsa, yoshlarning ma’naviy-ma’rifiy saviyasini yuksaltirishda diniy-ma’rifiy nashrlarning o‘rni beqiyos ekanini ta’kidladilar.
Tadbir davomida yakunlanayotgan mavsumda obuna ishlarini namunali tashkil etgan faol diniy soha xodimlariga minnatdorlik bildirilib, yangi yilda ham bu xayrli ishlarni yuqori saviyada davom ettirish yuzasidan fikr-mulohazalar almashildi.
Barcha yurtdoshlarimizni “Hidoyat”, “Mo‘minalar” jurnallari hamda “Islom nuri” gazetasiga 2027 yil uchun obuna bo‘lishga, xonadonlarga ziyo ulashishdek savobli tashabbusda faol ishtirok etishga chorlaymiz.
O‘zbekiston musulmonlari idorasi
Matbuot xizmati
