Buxoroda imomlar o‘rtasida sport musobaqalari o‘tkazildi
2026 yil 26 yanvar kuni Buxoro viloyatida sog‘lom turmush tarzini targ‘ib etish, jismoniy tarbiya va sportni ommalashtirish, shuningdek, diniy soha xodimlari o‘rtasida jamoaviy hamjihatlik va sog‘lom raqobat muhitini mustahkamlash maqsadida imom-xatib va imom-noiblar o‘rtasida shaxmat, shashka, stol tennisi hamda voleybol bo‘yicha viloyat bosqichi musobaqalari tashkil etildi.
Tadbir belgilangan reja va sport qoidalari asosida o‘tkazilib, viloyatning tuman va shahar masjidlarida faoliyat yuritayotgan imom-xatib va imom-noiblar faol ishtirok etdilar.
G‘oliblar:
Shaxmat:
1-o‘rin — Odilov Haydarjon (Ko‘gon t., “Xo‘ja Ka’bul Axbor Vali”)
2-o‘rin — Isoyev Mustaqim (Shofirkon t., “Qori Fazliddin”)
3-o‘rin — Ismoilov Ismat (Qorako‘l t., “Qobulota”)
Shashka:
1-o‘rin — Rahmonov Bobojon (Vobkent t., “Miri Xurd Vobkandiy”)
2-o‘rin — Avezov Abdulloh (Qorako‘l t., “Bozorxo‘ja”)
3-o‘rin — Najmiddinov G‘ayrat (Romitan t., “Mahallai-bolo”)
Stol tennisi:
1-o‘rin — Boboqulov Sadam (Peshku t., “Xo‘ja Peshko‘”)
2-o‘rin — Najmiddinov Asatillo (Buxoro sh., “Umar ibn Xattob”)
3-o‘rin — Bozorov Vahobiddin (Peshku t., “Chiqirchi”)
Voleybol:
1-o‘rin — “Bahovuddin Naqshband” jamoasi
2-o‘rin — “Najmiddin Kubro” jamoasi
3-o‘rin — “Jaloliddin Manguberdi” jamoasi
Musobaqalar diniy soha xodimlari o‘rtasida sog‘lom turmush tarzini qaror toptirish, sportga qiziqishni oshirish hamda o‘zaro do‘stlik va hamjihatlikni mustahkamlashda muhim ahamiyat kasb etdi. G‘olib va sovrindorlar diplom hamda esdalik sovg‘alari bilan taqdirlandi.
Tadbirni tashkil etishda Mir Arab oliy madrasasi hamda viloyat sport federatsiyasi yaqindan amaliy yordam ko‘rsatdi.
O‘zbekiston musulmonlari idorasi
Matbuot xizmati
Qariyb 50 mamlakat jurnalistlari yangi Imom Buxoriy majmuasi va Samarqandning asosiy yodgorliklarini ziyorat qiladi
«Islom sivilizatsiyasi: yangi nigoh — yangi kashfiyotlar» Xalqaro mediaforumi ishtirokchilari 27 avgust kuni Samarqandga yo‘l oladi. Ular yangidan bunyod etilgan Imom Buxoriy yodgorlik majmuasi, Imom Buxoriy xalqaro ilmiy-tadqiqot markazi hamda Imom Buxoriy nomidagi Innovatsion muzey bilan tanishadi. Kunning ikkinchi yarmida esa ishtirokchilar uchun shaharning tarixiy-madaniy meros obyektlari, jumladan, YUNЕSKOning Jahon merosi ro‘yxatiga kiritilgan yodgorliklar bo‘ylab maxsus dastur tashkil etiladi, xabar bermoqda iccu.uz.
Yodgorlik majmuasi Samarqand viloyati Payariq tumanida, buyuk muhaddis va ilohiyotshunos Muhammad al-Buxoriyning (810–870) dafn etilgan joyida joylashgan. U «Sahihi Buxoriy» to‘plami muallifi bo‘lib, mazkur asar sunniy islomdagi eng mo‘tabar hadis to‘plamlaridan biri hisoblanadi.
Keng ko‘lamli rekonstruksiyadan so‘ng majmua 2026 yil bahorida ziyoratchilar uchun qayta ochildi. Uning umumiy hududi 45 gektarni tashkil etadi. Bu yerda 10 ming kishilik masjid, ma’muriy va xizmat ko‘rsatish binolari, 154 ustunli ayvon, 14 ta moviy gumbaz va balandligi 75 metr bo‘lgan to‘rtta minora barpo etilgan. Rekonstruksiyadan so‘ng majmuaning kunlik qabul qilish quvvati 12 ming nafardan 65 ming nafargacha oshdi.
Majmuaning markaziy qismlaridan biri — to‘qqizta pavilondan iborat yangi Imom Buxoriy Innovatsion muzeyidir. Ekspozitsiya allomaning hayoti, hadisshunoslik tarixi va uning ilmiy merosiga bag‘ishlangan. Shuningdek, muzeyda Qur’onda zikr etilgan payg‘ambarlar, Payg‘ambarimiz Muhammad sollallohu alayhi vasallamning Makka va Madinadagi hayoti hamda yozma hadis to‘plamlarining shakllanish tarixi haqida ma’lumotlar berilgan.
Majmua yaqinida Imom Buxoriy xalqaro ilmiy-tadqiqot markazi ham faoliyat yuritadi. Markaz islom ilmiy va qo‘lyozma merosini, jumladan, Markaziy Osiyoning o‘rta asr olimlari asarlarini o‘rganish, ilmiy tadqiqotlar va tarjimalar tayyorlash, shuningdek, xalqaro ilmiy almashinuvni rivojlantirish bilan shug‘ullanadi.
Majmuaga tashrifdan so‘ng forum ishtirokchilari tarixiy Samarqand bilan tanishadi. Shaharning asosiy me’moriy yodgorliklari qatoriga Registon, Bibixonim masjidi, Shohi Zinda majmuasi va Go‘ri Amir maqbarasi kiradi. YUNЕSKO ushbu to‘rt obyektni 2001 yilda «Samarqand — madaniyatlar chorrahasi» nomi bilan Jahon merosi ro‘yxatiga kiritilgan tarixiy shaharning asosiy yodgorliklari sifatida e’tirof etadi.
Samarqand bosqichi 24–28 avgust kunlari Toshkent va Samarqand shaharlarida bo‘lib o‘tadigan «Islom sivilizatsiyasi: yangi nigoh — yangi kashfiyotlar» Xalqaro mediaforumi dasturining bir qismi bo‘ladi.
Press-slujba Upravleniya musulman Uzbekistana
- «
- »