Ramazon uchun xatmi Qur’on tadbirlariga qorilar tanlanmoqda
O‘zbekiston musulmonlari idorasi raisi, muftiy Shayx Nuriddin Xoliqnazar hazratlari tashabbusi bilan Ramazon oyida o‘tkaziladigan Xatmi Qur’on tadbirlarida ishtirok etadigan qorilarni suhbatdan o‘tkazish an’anasi yo‘lga qo‘yildi.
Mazkur an’anani davom ettirish maqsadida 2026/1447-hijriy yil Ramazon oyida respublikamiz bo‘ylab o‘tkaziladigan Xatmi Qur’on tadbirlarida qatnashadigan qorilarni saralash uchun barcha viloyat vakilliklarida suhbatlar tashkil etish rejalashtirilgan.
Jumladan, bugun — 2026 yil 2 fevral kuni Toshkent viloyati, Andijon, Jizzax, Qashqadaryo va Surxondaryo viloyatlaridagi masjidlarda xatm o‘qiydigan qorilar ishtirokida suhbatlar bo‘lib o‘tdi.
Suhbat davomida ustoz qorilardan iborat hay’at tomonidan ishtirokchilarning Ramazon oyiga tayyorgarlik darajasi sinovdan o‘tkazilib, ularga zarur tavsiyalar berildi.
Al-Quran.uz
Yurtimiz bo‘ylab 6000 nafarga yaqin obodonlashtirish xodimlariga bayram hadyalari ulashildi
Mustaqilligimizning 35 yillik bayrami arafasida O‘zbekiston musulmonlari idorasi huzuridagi “Vaqf” xayriya jamoat fondi mahalliy hokimliklar bilan hamkorlikda yurtimiz ozodaligiga beqiyos hissa qo‘shib kelayotgan 2500 nafardan ortiq obodonlashtirish xizmati xodimlariga oziq-ovqat jamlanmalari tarqatdi.
Tadbirlardan ko‘zlangan asosiy maqsad mashaqqatli va sharafli mehnati har doim ham ko‘zga ko‘rinavermaydigan soha xodimlarining mehnatini e’tirof etish, ularning qalbiga bayram shukuhi, xonadonlariga quvonch kiritishdir.
Inson qadrini ulug‘lash va ijtimoiy himoyaga muhtoj qatlamni qo‘llab-quvvatlashga qaratilgan bu kabi xayrli ishlar shu kunlarda yanada keng quloch yozib, mamlakatimizning barcha hududlarida o‘tkazildi.
Shuningdek, homiylar tomonidan Respublikamiz bo‘ylab 3500 nafarga yaqin ana shunday fidoyi xodimlarning ko‘ngli xushnud etildi.
Bu kabi xayr-saxovatga yo‘g‘rilgan bayram tadbirlari o‘lkamizning barcha go‘shalarida davom etmoqda.
O‘zbekiston musulmonlari idorasi Matbuot xizmati
- «
- »