Muhabbat dalillari
Agar biror kishi “Hazrat, Alloh taoloning bandalariga muhabbatining biror dalili bormi?” deb so‘rasa, ya’ni Alloh taolo bandalariga mehribondir, karamlidir, lekin muhabbatli ekanligiga biror dalil bormi? Bunga ulamolar ko‘plab dalillarni keltirganlar. Misol uchun, barcha birdek tushunadigan oddiy misol: “Agar bandada muhabbat bo‘lsa, u o‘z mahbubiga qancha ko‘p yaxshilik qilsa ham uni oz deb biladi. Qachonki mahbubidan biror arzimas va oz tuhfa olsa ham uni qadrli va juda ko‘p deb biladi. Bunday holat Alloh taolo va banda orasida ham uchrashi Qur’oni karimda bayon etilgan. Alloh taolo bandalariga dunyoda minglab, balki undan-da ziyoda ne’matlar bilan siylagan bo‘lsa ham, lekin Qur’oni karimda bunday deyiladi:
﴿قُلْ مَتَاعُ الدُّنْيَا قَلِيلٌ﴾
«Sen: “Dunyoning matohi oz” deb ayt» (Niso surasi, 77-oyat).
Mahbub tarafidan bo‘lgani uchun bandalar qisqa umrlarida o‘z hojatlaridan ortib, Alloh taoloni yod qilsalar, ibodatni to‘kis ado etsalar, murodlariga erishadilar. Alloh taolo bunday marhamat qiladi:
﴿يَا أَيُّهَا الَّذِينَ آمَنُوا اذْكُرُوا اللَّهَ ذِكْرًا كَثِيرًا﴾
«Ey, imon keltirganlar! Allohni ko‘p zikr qilinglar» (Ahzob surasi, 41-oyat).
Subhanalloh! Mahbubidan bo‘lgan amalni ko‘p deb, o‘zi bergan ne’matlarini oz deb marhamat qilyapti. Bu Alloh taoloning o‘z bandalariga bo‘lgan muhabbatining dalilidir.
Yana Qur’oni majidda Alloh taolo o‘z muhabbatini izhor qilib marhamat qiladi:
﴿اللَّهُ وَلِيُّ الَّذِينَ ءَامَنُو﴾
«Alloh imon keltirganlarning do‘stidir» (Baqara surasi, 257-oyat).
Subhanalloh! Qanday baxt va saodat, Alloh taoloning marhamatiki, bir so‘z bilan Buyuk Robbimizga imon keltirganlarga O‘zining muhabbatini e’lon qilyapti.
"Ilohiy ishq" kitobidan
Nodir Odinayev tarjimasi
Tarixni buzib ko‘rsatmaslik uchun
Vazirlar Mahkamasi huzuridagi Imom Buxoriy xalqaro ilmiy-tadqiqot markazida "Islom ma’rifati, hadis ilmi va Imom Buxoriy merosi" o‘quv kursi o‘tkazildi. Mutaxassislar tomonidan yodgorlik majmuasi gid-ekskursovodlari uchun o‘tkazilgan mashg‘ulotlar doirasida ekskursiya faoliyati bilan bog‘liq huquqiy, nazariy va amaliy masalalar ko‘rib chiqildi, xabar bermoqda “Samarkandskiy vestnik” nashri.
- Bu yerga tashrif buyurgan har bir ziyoratchi faqat ibodat qilish uchun emas, balki ma’naviy "oziq" olish uchun ham borishi kerak, - deydi Imom Buxoriy xalqaro ilmiy-tadqiqot markazi direktori Sh.Ziyodov. - Bu yerda faoliyat yuritayotgan gidlarning malakasini oshirish tizimini yo‘lga qo‘yar ekanmiz, ularga Imom Buxoriyning bizga qoldirgan merosini, bu merosning tarixiy manbalarini chuqur o‘rgatishimiz shart.
Kurs doirasida majmuaga birinchi marta tashrif buyurgan mehmonlar bilan muloqotning o‘ziga xos xususiyatlari muhokama qilindi. Xorijlik ziyoratchilarga nafaqat Imom al-Buxoriy hayotidagi faktlar va diniy qadriyatlarimizni yetkazish, balki boy madaniy merosimizni asrab-avaylash va yetkazish kabi dolzarb masalalar ko‘tarildi.
Gid-ekskursovodlar ham o‘z tajribalari bilan o‘rtoqlashib, kelgusidagi ishlarni tashkil etish bo‘yicha takliflar berdilar. Bu bevosita ekskursiyalarni o‘tkazish paytida yuzaga keladigan masalalarni muhokama qilish imkonini berdi.
Kurs O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mita, Diniy ta’lim sohasida kadrlar malakasini oshirish va qayta tayyorlash instituti, Imom Buxoriy xalqaro ilmiy-tadqiqot markazi, viloyat hokimligi hamda Imom Buxoriy yodgorlik majmuasini saqlash va uning atrofini obodonlashtirish departamenti tomonidan tashkil etildi.
Tarixiy obidalar va ziyoratgohlar turizm salohiyatining muhim qismi bo‘lgan Samarqand viloyati uchun malakali mutaxassislarni tayyorlash alohida ahamiyatga ega. Mehmonga tashrif buyuriladigan joyning tarixi qanchalik to‘liq va tushunarli ochib berilishi gidning professionalligiga bog‘liq. Shuning uchun ham gid-ekskursovodlarning malakasini muntazam oshirib borish, ularning kasbiy bilim va ko‘nikmalarini takomillashtirish hamda zamonaviy xizmat ko‘rsatish standartlarini joriy etish Samarqandda turizm xizmatlari sifatini oshirishda ustuvor yo‘nalishlardan biri bo‘lib qolmoqda.
O‘zbekiston musulmonlari idorasi Matbuot xizmati
- «
- »