Saralash musobaqalari qizg‘in bellashuvlarga boy bo‘ldi
#xabar #musobaqa
Avval xabar berganimizdek, bugun O‘zbekiston xalqaro Islomshunoslik akademiyasi va Shayxontohur sport maktabida diniy soha xodimlari o‘rtasida sportning voleybol va shaxmat turlari bo‘yicha “O‘zbekiston musulmonlari idorasi kubogi” musobaqasining respublika bosqichi saralash o‘yinlari bo‘lib o‘tdi. (https://t.me/muslimuzportal/44428)
Mazkur musobaqada dastlab 16 ta jamoa nimchorak final bahslariga kirishdi. Qizg‘in bellashuvlar natijasida O‘zbekiston musulmonlari idorasi, Samarqand, Qashqadaryo, Namangan, Farg‘ona, Buxoro, Toshkent viloyatlari hamda Qoraqalpog‘iston Respublikasi jamoalari chorak final yo‘llanmasini qo‘lga kiritdi.
Chorak final uchrashuvlaridan so‘ng Qashqadaryo, Samarqand, Navoiy viloyatlari va Qoraqalpog‘iston Respublikasi jamoalari yarim finalga chiqishga muvaffaq bo‘ldi.
Final yo‘llanmasi uchun kechgan bahslar esa yanada keskin tus oldi. Unda Qashqadaryo — Samarqand hamda Qoraqalpog‘iston — Navoiy jamoalari o‘rtasida murosasiz o‘yinlar bo‘lib o‘tdi. Yakuniy natijalarga ko‘ra, Qashqadaryo va Qoraqalpog‘iston jamoalari final yo‘llanmasini qo‘lga kiritgan bo‘lsa, Navoiy va Samarqand jamoalari uchinchi o‘rin uchun bahs olib boradigan bo‘lishdi.
Shunday qilib, ertaga — 10 fevral kuni mazkur jamoalar ishtirokida hal qiluvchi o‘yinlar bo‘lib o‘tadi.
Shuningdek, shaxmat bo‘yicha bahslar ham qizg‘in va murosasiz kechdi. Ayniqsa, O‘zbekiston musulmonlari idorasi Fatvo markazi ulamosi Abduvohid domla Ahmadaliyev, Toshkent viloyatidan Abdulazizxon domla Ahmadxo‘jayev, Qoraqalpog‘iston Respublikasi vakili Abdulkabir domla Idrisov hamda Farg‘ona viloyati vakili Niyozbek domla Payg‘amov mohirona yurishlar qilishdi.
Musobaqalar tafsilotini kanalimizda kuzatib boring.
O‘zbekiston musulmonlari idorasi
Matbuot xizmati
Ma’naviy-ma’rifiy soha fidoyilari taqdirlandi
Vatanimiz mustaqilligining 35 yilligi munosabati bilan Surxondaryo viloyati Qumqo‘rg‘on tumanida diniy-ma’rifiy sohada samarali faoliyat yuritayotgan, jamiyatda sog‘lom ma’naviy muhitni mustahkamlash va yoshlarni yot g‘oyalardan asrash yo‘lida fidokorona mehnat qilayotgan bir guruh soha xodimlari taqdirlandi.
Tadbirda Qumqo‘rg‘on tumani hokimining birinchi o‘rinbosari Z.Eshqobilov ishtirok etib, yig‘ilganlarni qutlug‘ bayram bilan samimiy muborakbod etdi hamda ularning el-yurt osoyishtaligi va ma’naviy-ma’rifiy ishlar samaradorligini oshirishdagi xizmatlarini yuqori baholadi.
Marosimda fidoyi soha xodimlariga tuman hokimligining tashakkurnomalari va bayram esdalik sovg‘alari tantanali ravishda topshirildi.
O‘zbekiston musulmonlari idorasi
Matbuot xizmati
