Sizda ulkan ne’matlar bor
Garchi ko‘rinsada senga masofa eng uzoq, Kelar U zot rahmati ko‘z yumishingdan tezroq.
Singilginam, albatta, qiyinchilikdan keyin yengillik, ko‘z yoshdan so‘ng tabassum bor va qorong‘u zulmatdan so‘ng tong otadi. Allohning izni ila tez orada g‘am bulutlari tarqaladi, qayg‘u zulmati yorishib ketadi, baxtsizlik nari ketadi va xafaliklar tugaydi.
Shuni bilingki, siz savobga erishasiz. Agar siz ona bo‘lsangiz farzandlaringizga go‘zal tarbiya berasiz hamda Islom yordamchilari, din xodimlari va millat qahramonlari bo‘lib yetishadi. Ular sajdalarida va sahar vaqtlarida haqqingizga duo qilishadi. Shunday ekan, sizning rahmdil ona bo‘lishingiz eng katta ne’matdir. Muhammad sollallohu alayhi vasallamning onalari bu dunyoga ulug‘ imom va yo‘lboshchini hadya etgan ayol ekani sizga faxr va sharaf uchun kifoya qiladi.
Sizning o‘zingiz kabi ayollar orasida yaxshi so‘z, go‘zal mav’iza va boshqa yaxshiliklar ila da’vatchi bo‘lish imkoningiz bor. Chunki ayol kishi o‘zining go‘zal xulqi va yaxshi amallari bilan ko‘plab xatiblar, ma’ruzachilar va mudarrislar qila olmaydigan ishlarni qilishi mumkin. Qanchadan-qancha mahallalarda birgina ayoldan din, ibo, go‘zal xulq, qo‘shnilarga yaxshilik qilish va eriga itoat etish kabi yaxshi amallar tarqalgan. Natijada, uning muattar hayot tarzi doim eslanadigan, insonlarga hikoya qilib beriladigan bo‘lgan va u ayollar uchun go‘zal namunaga aylangan.
Shu’lasi: Kun kelib, rayhonlar gul ochadi, mahzunlik yiroq ketadi va yupanch keladi.
Doktor Oiz al-Qarniyning
"Dunyodagi eng baxtli ayol" kitobidan
O‘zbekiston sayyohlik salohiyati Malayziyadagi nufuzli ko‘rgazmada namoyish qilindi
Malayziyada bo‘lib o‘tgan “MATTA Fair” yirik sayyohlik ko‘rgazmasida O‘zbekiston Turizm qo‘mitasi tomonidan milliy pavilon tashkil etildi, deb xabar bermoqda “Dunyo” AA muxbiri.
Malayziya xalqaro savdo va ko‘rgazmalar markazida namoyish etilgan milliy pavilon mamlakatimizning Kuala-Lumpur shahridagi elchixonasi ko‘magida amalga oshirildi.
Ko‘rgazmada O‘zbekistonning turizm salohiyatiga bag‘ishlangan taqdimotlar o‘tkazildi. Tadbir ishtirokchilariga respublikada turizm sohasida olib borilayotgan keng ko‘lamli islohotlar, ziyorat turizmini jadal rivojlantirish va ziyoratchilar uchun qulay shart-sharoitlar yaratish bo‘yicha amalga oshirilayotgan chora-tadbirlar haqida ma’lumot berildi.
So‘nggi yillarda viza rejimi soddalashtirilishi natijasida 90 dan ortiq xorijiy davlatlar, jumladan, Malayziya fuqarolari uchun ham mamlakatga vizasiz kirish tartibi amal qilayotgani alohida ta’kidlandi.
Sayyohlar Buxoro, Samarqand, Xorazm, Qashqadaryo viloyatlari va Toshkent shahrining tarixiy va zamonaviy sayyohlik markazlari, boy madaniyati, betakror arxitekturasi va san’ati, milliy an’analari bilan yaqindan tanishish imkoniga ega bo‘ldi.
Milliy pavilonda Turizm qo‘mitasi, Qashqadaryo viloyati hokimligi, “Uzbekistan Airways” aviakompaniyasi vakillari hamda respublikaning qator turkompaniyalari tomonidan ziyorat turizmi, tarixiy-madaniy turizm, gastronomik turizm, Umra+, qishki turizm kabi sayyohlik dasturlari “B2B” va “B2C” formatlarida keng targ‘ib qilindi.
“Uzbekistan Airways” aviakompaniyasi vakillari mamlakatimizga sayohat qiluvchilar uchun yaratilgan qulayliklar, jumladan, Toshkent va Kuala-Lumpur shaharlari o‘rtasida to‘g‘ridan to‘g‘ri aviaqatnovlar mavjudligi haqida axborot berdi.
Tadbir davomida ikki mamlakat turoperatorlarining to‘g‘ridan to‘g‘ri hamkorligi doirasida respublikaga sayyohlar oqimini oshirish bo‘yicha aniq kelishuvlarga erishildi.
O‘zbekiston musulmonlari idorasi Matbuot xizmati
