Surxondaryo viloyati otinoyilari uchun seminar o‘tkazildi
#xabarlar
Joriy yilning 16 fevral kuni Surxondaryo viloyati otinoyilari uchun "Yurtimizda ijtimoiy-ma’naviy muhitni sog‘lomlashtirishda otinoyilarning o‘rni" mavzusida seminar o‘tkazildi. Uni Surxondaryo viloyati bosh otinoyiisi X. Kosimova ochib berdi. Unda O‘zbekiston musulmonlari idorasining xotin-qizlar masalalari bo‘yicha bo‘limi boshlig‘i D.Egamova va mazkur bo‘lim yetakchi mutaxassisi M.Abubakirovalar ma’ruza qildilar.
Seminarda otinoyilarning jamiyatdagi o‘rni va mas’uliyati, otinoyining odob-axloq qoidalari, malaka talablari, ma’ruza qilish me’yorlari mavzularida suhbat bo‘ldi.
Shuningdek, ma’raka va marosimlarda bid’atlarga yo‘l qo‘ymaslik, isrof va dabdabadan tiyilish, dinimizning sof ta’limotlariga amal qilish haqida atroflicha tushunchalar berildi.
Yosh avlodni turli yot g‘oyalardan asrash, ularni to‘g‘ri yo‘lga boshlashda otinoyilarning ibratli so‘zi va amali muhim ekanligi qayd etildi.
O‘zbekiston musulmonlari idorasi Surxondaryo viloyati vakilining Xotin kizlar masalalari bo‘yicha o‘rinbosarning yordamchisi Hasanova Maftuna Xolmatjonovna 2025 yildagi fidokorona mehnati va diniy-ma’rifiy ishlar samaradorligini oshirishda qo‘shgan hissasi uchun "ENG FIDOKOR XODIM" maqtov yorlig‘i bilan taqdirlandi.
Shuningdek, bosh otinoyining faoliyatidagi hujjatlar yuritilishi o‘rganildi va zarur tavsiyalar berildi.
Mumina.uz
"Imom Buxoriy" ordeni — yuksak ehtirom ramzi!
Kuni kecha mamlakatimiz mustaqilligining 35 yilligi munosabati bilan muhtaram Prezidentimiz tomonidan yuksak davlat mukofotlariga sazovor bo‘lgan bir guruh vatandoshlarimiz taqdirlandi.
Eng quvonchlisi shuki, tadbirda diniy-ma’rifiy sohada fidokorona xizmat qilib kelayotgan, xalqimizning ma’naviy yuksalishiga beqiyos hissa qo‘shayotgan taniqli ulamolarimiz va faxriylarimizning zahmatli mehnatlari yuksak darajada e’tirof etildi!
Xususan, Diniy idora tizimida uzoq yillardan beri samarali xizmat qilib kelayotgan ustozlardan O‘zbekiston musulmonlari idorasi raisining birinchi o‘rinbosari Homidjon domla Ishmatbekov, O‘zbekiston musulmonlari idorasi Faxriylar kengashi raisi Shayx Abdulaziz Mansur, Samarqand viloyati Payariq tumani "Imom al-Buxoriy" jome masjidi faxriy imomi Mahmudjon domla Ibodullayev, Buxoro viloyati Kogon tumani "Bahouddin Naqshband" jome masjidi imom-xatibi Abdug‘ofur domla Razzoqov "Imom Buxoriy" ordenini Davlatimiz Rahbaridan qabul qilib olishdi.
Ustozlarning ilmiy-ma’rifiy faoliyati, xalq ichida ma’rifat ulashishdagi fidoyiliklari davlatimiz tomonidan yuksak qadrlangani butun diniy-ma’rifiy sohada mehnat qilayotganlar uchun katta faxr va sharafdir.
Ushbu voqea Yangi O‘zbekistonda diniy-ma’rifiy sohaga, milliy qadriyatlarimizni avaylab-asrash hamda rivojlantirishga qaratilayotgan izchil va xayrli siyosatning amaliy ifodasidir.
Xalqimizda qadimdan ma’rifat ahlini ulug‘lash, ularning zahmatli mehnatini qadrlash ezgu an’ana sanaladi. Islom ta’limotida ham ilm egalariga alohida maqom va hurmat bilan qaraladi. Zero, Imom Termiziy bobomiz rivoyat qilgan hadisi sharifda: «Ulamolar payg‘ambarlarning merosxo‘rlaridir», deyilgan.
Ulamolarga ko‘rsatilayotgan bunday e’tiborning nechog‘li xayrli ekani quyidagi hikmatda ham o‘z ifodasini topgan. Ulug‘ zotlardan biri Tovus rahmatullohi alayh otasidan quyidagicha rivoyat qilgan: «To‘rt kishini hurmat qilish sunnatdir: olim, yoshi ulug‘ inson, podshoh va ota» (Imom Abdurazzoq rivoyati).
Mazkur yuksak mukofot milliy va diniy qadriyatlarimizni tiklash, Islom ma’rifatini keng targ‘ib etish, jamiyatda bag‘rikenglik va tinchlik-omonlikni bardavom saqlash yo‘lidagi ko‘p yillik xayrli xizmatlarning munosib e’tirofidir.
Davlatimizning bunday e’tibori diniy soha xodimlariga yanada ulkan mas’uliyat yuklaydi, ma’naviy yuksalish yo‘lidagi xayrli xizmatlar ko‘lamini yanada kengaytirishga xizmat qiladi, insha Alloh.
O‘zbekiston musulmonlari idorasi Matbuot xizmati
- «
- »