Hamdardlik bildiramiz
O‘zbekiston musulmonlari idorasi jamoasi Sirdaryo viloyati vakilligining "Haj-umra" masalalari bo‘yicha mutaxassisi, Guliston shahar "Iso ug‘li Muso" jome masjidi imom-xatibi Bahodir domla Suyunboyevga padari buzrukvori Sodiqjon hoji otaning vafoti munosabati bilan ta’ziya bildiradi.
Alloh taolo marhum otaxonning oxiratlarini obod aylab, jannatdagi darajalarini yuksak qilsin.
Haq taolo marhum otaxonning barcha yaqinlariga, xususan, Bahodir domla Suyunboyevga chiroyli sabr bersin.
Janoza bugun, 23 fevral kuni soat 14:00 da Yangiyo‘l tumani "Saxovat" mahallasi Yangi turmush ko‘chasida marhumning xonadonida o‘qiladi.
Innaa lillaahi va innaa ilayhi roji’uun.
«Musibat yetganda “Albatta, biz Allohnikimiz va albatta, biz Unga qaytuvchimiz”, degan sabrlilarga xushxabar bering».
O‘zbekiston musulmonlari idorasi
Muslim.uz
Qashqadaryoda imom va noiblar uchun navbatdagi qiroat mashg‘ulotlari boshlandi
O‘zbekiston musulmonlari idorasi raisi, muftiy Shayx Nuriddin Xoliqnazar hazratlarining tashabbuslari bilan tizimda faoliyat yuritayotgan imom-xatiblar va imom noiblarining kasbiy mahoratini oshirish hamda Qur’oni karim qiroatini yanada mukammallashtirishga qaratilgan tizimli o‘quv mashg‘ulotlari davom etmoqda.
Mazkur loyiha soha xodimlarining nafaqat ilmiy salohiyatini yuksaltirish, balki tajvid qoidalarini amaliyotda go‘zal va bexato qo‘llash ko‘nikmalarini puxtalashga xizmat qilmoqda.
Reja asosida tashkil etilayotgan navbatdagi darslar bugun Qashqadaryo viloyatida yuqori saviyada o‘tkazilmoqda. Qur’on va tajvidni o‘rgatish hamda Masjidlar bilan ishlash bo‘limlari hamkorligida tashkil etilgan ushbu mashg‘ulotlarni malakali mutaxassisi – Mamasoliyev Samandar qori aka olib bormoqda.
Ushbu o‘quv jarayonidan ko‘zlangan asosiy maqsad — masjidlardagi qiroatlar sifatini yuqori bosqichga ko‘tarish va soha xodimlarining tajvid ilmi bo‘yicha nazariy hamda amaliy bilimlarini yanada mustahkamlashdir.
Bu kabi amaliy saboqlar imom-xatib hamda imom noiblarining ma’naviy va ilmiy rivojida muhim pog‘ona bo‘lib xizmat qiladi.
O‘zbekiston musulmonlari idorasi Matbuot xizmati