Mir Arabda tahsil olayotgan talabalar holidan xabar olindi
Buxoro viloyatida joylashgan Mir Arab o‘rta maxsus islom bilim yurtida Farg‘ona viloyati bosh imom-xatibi o‘rinbosari Alisher domla Naimov va talabalar bilan uchrashuvi tashkil etildi.
Muloqotda yurtimizda Davlat rahbari boshchiligida amalga oshirilayotgan keng ko‘lamli islohotlar, ayniqsa, diniy-ma’rifiy sohadagi yangilanishlar haqida atroflicha so‘z yuritildi.
Ta’kidlanganidek, so‘nggi yillarda diniy ta’lim tizimiga alohida e’tibor qaratilib, ta’lim muassasalarining moddiy-texnik bazasi mustahkamlanmoqda, talabalar uchun yanada qulay va zamonaviy sharoitlar yaratilmoqda. Bu esa kelajakda yuksak bilimli, keng dunyoqarashga ega mutaxassislarni tayyorlashda muhim ahamiyat kasb etadi.
Shuningdek, uchrashuvda ta’lim dargohida tahsil olayotgan farg‘onalik talabalarning o‘qish jarayoni, yashash sharoiti va kelgusi rejalari bilan qiziqilib, ularga ilmiy izlanishlarda yanada faol bo‘lish, vaqtdan unumli foydalanish hamda yuksak odob-axloq sohibi bo‘lib yetishish borasida tavsiyalar berildi.
Tadbir doirasida talabalar uchun dasturxon yozilib, samimiy suhbatlar davom etdi. Bunday e’tibor talabalarning ko‘nglini ko‘tarib, ularni yanada ilhomlantirdi.
Shu bilan birga, ta’lim muassasasiga zamonaviy o‘quv jarayonini qo‘llab-quvvatlash maqsadida smart doska sovg‘a qilindi.
Ushbu jihoz ta’lim sifatini yanada oshirish, darslarni zamonaviy usullarda tashkil etishga xizmat qilishi ta’kidlandi.
Farg‘ona viloyati vakilligi
Matbuot xizmati
O‘zbekistonda jahon xattotlar tanlovi 26 avgustda e’lon qilinadi
O‘zbekistonda noyob Qur’on yaratish bo‘yicha jahon xattotlar tanlovi 26 avgust kuni O‘zbekistondagi Islom sivilizatsiyasi markazida e’lon qilinadi. Tanlov «Islom sivilizatsiyasi: yangi nigoh — yangi kashfiyotlar» xalqaro mediaforumi doirasida o‘tkaziladi, xabar bermoqda UzDaily.uz.
«Dunyo Qur’oni: xattotlik an’analaridan — kelajak merosi sari» loyihasini xattot va Islom sivilizatsiyasi markazi huzuridagi Xattotlik maktabi direktori Habibullo Solih taqdim etadi. Bu haqda tadbir tashkilotchisi xabar berdi.
Tanlov doirasida turli mamlakatlar va xattotlik maktablarining islomiy xattotlikdagi eng yaxshi an’analarini birlashtirgan noyob Qur’on yaratish ko‘zda tutilgan.
Tanlovning tantanali e’loni «Asrlarni birlashtiruvchi meros. Islom sivilizatsiyasining ma’naviy mazmunlari» mavzusidagi yalpi sessiyaning yakuniy qismi bo‘ladi. Sessiya 26 avgust kuni soat 09:30 dan 12:00 gacha o‘tkaziladi.
Tadbir doirasida ommaviy axborot vositalarining stereotiplar va islomofobiyani yengishdagi roliga bag‘ishlangan xalqaro muhokama ham bo‘lib o‘tadi. Unda Islom hamkorlik tashkiloti, Jazoir, Ummon, Pokiston, Saudiya Arabistoni, Iroq, Mali va O‘zbekistonning davlat tuzilmalari hamda OAV vakillari ishtirok etadi.
Forum dasturidan Qur’oniy va qo‘lyozma merosga bag‘ishlangan loyihalar ham o‘rin olgan. Ular orasida «114 Qur’on: islom olamining 114 xattotlik durdonasi», «Katta Langar Qur’oni: haqiqat va rivoyatlar» xalqaro loyihasi hamda «Sun’iy intellekt — qadimiy qo‘lyozmalarni o‘qishning raqamli kaliti» loyihasi bor.
O‘zbekistonda xattotlikni rivojlantirishga institutsional darajada ham e’tibor qaratilmoqda. Islom sivilizatsiyasi markazi huzurida Prezident Shavkat Mirziyoyev tashabbusi bilan tashkil etilgan Xattotlik maktabi faoliyat yuritmoqda. Maktabda suls, nasx, nasta’liq, ruq’a, devoniy va kufiy kabi an’anaviy yozuv uslublarini o‘rgatish rejalashtirilgan.
Xattotlik san’ati Samarqand viloyatidagi yangi Imom al-Buxoriy majmuasida ham namoyon etilgan. Majmua peshtoqlari va ayvonlari devorlari «Sahih al-Buxoriy»dan olingan hadislar bitilgan yozuvlar bilan bezatilgan. Majmua huzurida Imom Buxoriy xalqaro ilmiy-tadqiqot markazi va Hadis ilmiy maktabi ham faoliyat yuritadi.
Xalqaro mediaforumning asosiy maydoni O‘zbekistondagi Islom sivilizatsiyasi markazi bo‘ladi.
Tadbirda qariyb 50 mamlakatdan media va ekspertlar hamjamiyatining 300 ga yaqin vakili ishtirok etadi. Ular orasida mediakompaniyalar, axborot agentliklari va telekanallar rahbarlari, jurnalistlar, prodyuserlar, olimlar hamda kreativ industriya mutaxassislari bor.
O‘zbekiston musulmonlari idorasi matbuot xizmati