Bo‘lajak diniy soha xodimlari ishga taqsimlandi
“Xoja Buxoriy” o‘rta maxsus islom ta’lim muassasasida bitiruvchi talabalarni ishga taqsimlashga bag‘ishlangan uchrashuv bo‘lib o‘tdi
Mamlakatimizda yosh avlodni har tomonlama qo‘llab-quvvatlash va ularning salohiyatini yuzaga chiqarish borasidagi davlat siyosatining izchil davomi sifatida, 2026 yil 8 aprel kuni "Xoja Buxoriy" o‘rta maxsus islom ta’lim muassasasida muhim tadbir tashkil etildi. Unda O‘zbekiston musulmonlari idorasining Kadrlar, Ta’lim va ilmiy-tadqiqot hamda Masjidlar bilan ishlish bo‘limlari mas’ul xodimlari ishtirok etdilar.
Mehmonlar dastlab ta’lim muassasasida talabalar uchun yaratilgan zamonaviy shart-sharoitlar bilan yaqindin tanishib, so‘ng bitiruvchi kurs talabalari bilan ochiq muloqot o‘tkazdilar. Uchrashuv davomida yurtimizda diniy-ma’rifiy sohada amalga oshirilayotgan keng ko‘lamli islohotlar va soha oldida turgan istiqbolli vazifalar haqida atroflicha ma’lumot berildi.
Muloqotning asosiy qismi bitiruvchilarni ishga taqsimlash masalasiga bag‘ishlandi. Mas’ullar tomonidan bo‘lajak mutaxassislarga kelgusi mehnat faoliyatida amal qilishi lozim bo‘lgan kasbiy etika va muhim tavsiyalar tushuntirildi.
Shuningdek, ta’limni yuqori bosqichlarda davom ettirish istagida bo‘lgan yoshlar uchun yaratilgan keng imkoniyatlar alohida qayd etildi. Samimiy ruhda o‘tgan yig‘ilish yakunida bitiruvchilarning kelgusi faoliyatiga muvaffaqiyat va zafarlar tilandi.
“Xoja Buxoriy” islom ta’lim muassasasi
Matbuot xizmati
Toshkentda Malayziya xalqaro Halal Fest ko‘rgazmasi o‘kazilishi rejalashtirilmoqda
O‘zbekiston va Malayziya o‘rtasida halol sanoati yo‘nalishidagi hamkorlik yangi bosqichga chiqmoqda. Qishloq xo‘jaligi vazirligida bo‘lib o‘tgan uchrashuvda ikki mamlakat vakillari “Malaysia–Uzbekistan International Halal Fest 2027” xalqaro forumi va ko‘rgazmasini Toshkent shahrida o‘tkazish istiqbollarini muhokama qildilar.
Malayziyaning TWOJ CREATIVE SDN BHD kompaniyasi delegatsiyasi tomonidan taqdim etilgan loyiha halol sanoati ekotizimini rivojlantirish, xalqaro biznes aloqalarini mustahkamlash hamda yangi investitsiya loyihalarini shakllantirishga qaratilgani bilan ahamiyatlidir.
Rejalashtirilayotgan festival doirasida xalqaro ko‘rgazma, biznes-forum va B2B uchrashuvlari, halol oziq-ovqat, turizm, moliya hamda ishlab chiqarish yo‘nalishlariga bag‘ishlangan maxsus ekspozitsiyalar, investitsiya sessiyalari, madaniy dasturlar va mahsulotlar taqdimotlarini tashkil etish ko‘zda tutilmoqda. Ushbu tadbir O‘zbekistonning halol mahsulotlar bozoridagi salohiyatini namoyish etish va mahalliy ishlab chiqaruvchilar uchun yangi eksport imkoniyatlarini yaratishga xizmat qilishi kutilmoqda.
Muzokaralar davomida JAKIM standartlari asosida halol sertifikatlashtirish tizimini rivojlantirish, mahalliy ishlab chiqaruvchilarni xalqaro bozorlarga olib chiqish, fermer va tadbirkorlar uchun o‘quv-seminarlar hamda malaka oshirish dasturlarini tashkil etish masalalari ham muhokama qilindi.
Tomonlar festivalni yuqori saviyada tashkil etish maqsadida tegishli vazirlik va idoralar, oliy ta’lim muassasalari, biznes hamjamiyati hamda tarmoq uyushmalarini jalb etgan holda qo‘shma “Yo‘l xaritasi”ni ishlab chiqishga kelishib oldilar.
Mutaxassislarning fikricha, “Malaysia–Uzbekistan International Halal Fest 2027” nafaqat ikki mamlakat o‘rtasidagi savdo-iqtisodiy aloqalarni mustahkamlaydi, balki investitsiyalarni jalb etish, halol sanoati infratuzilmasini rivojlantirish va oziq-ovqat xavfsizligini ta’minlash yo‘nalishidagi hamkorlikni yangi bosqichga olib chiqadigan muhim xalqaro maydonga aylanishi kutilmoqda.
O‘zbekiston musulmonlari idorasi Matbuot xizmati
