"Imom Termiziy" bilim yurti bitiruvchilari ishga taqsimlandi
Shu yilning 8 aprel kuni "Imom Termiziy" o‘rta maxsus islom ta’lim muassasasida bitiruvchi kurs talabalarining kelgusi faoliyati va ishga taqsimotiga bag‘ishlangan tadbir tashkil etildi. Unda O‘zbekiston musulmonlari idorasining mas’ul xodimlari Abdunosir Bobomirzayev, Muhammadyahyo Xodjayev hamda Dilmurod Rahimov ishtirok etdi.
Ta’lim muassasasi direktori K.Islamov hamrohligida mehmonlar dastlab o‘quv jarayonlari, dars sifati va talabalar bilimini oshirishga qaratilgan metodik yondashuvlar bilan yaqindan tanishdilar. Shundan so‘ng bitiruvchi kurs talabalari bilan yuzma-yuz muloqot o‘tkazildi. Uchrashuv davomida bo‘lajak mutaxassislarga ularning ishga taqsimoti, faoliyat boshlaydigan masjid va muassasalardagi vazifalari hamda kasbiy mas’uliyati yuzasidan atroflicha ma’lumot berildi.
Tashrif yakunida mutaxassislar tomonidan ta’lim sifatini yanada oshirish, tarbiyaviy ishlarni kuchaytirish hamda talabalar uchun sharoitlarni takomillashtirish bo‘yicha muhim tavsiyalar bildirildi. Ma’lumot o‘rnida aytish joizki, 2025-2026 o‘quv yilida mazkur ta’lim muassasasini 24 nafar talaba tamomlab, diniy-ma’rifiy sohada o‘z xizmat faoliyatini boshlash arafasida turibdi.
“Imom Termiziy” O‘MITM
Matbuot xizmati
Erhan Afyonju: O‘zbekiston – turkiy sivilizatsiyaning eng go‘zal shaharlari joylashgan zamin
Turkiyaning “CNN-Türk” telekanalida efirga uzatilgan “Tafakkur doirasi” dasturida so‘zga chiqqan taniqli olim, Milliy mudofaa universiteti rektori, professor Erhan Afyonju O‘zbekistonning boy tarixiy merosi va sayyohlik salohiyati haqida fikr yuritdi, deb xabar bermoqda “Dunyo” AA.
Ko‘rsatuvda qatnashgan turk tarixchisi Erhan Afyonju O‘zbekistonni turkiy sivilizatsiyaning eng go‘zal shaharlari joylashgan alohida geografik hudud sifatida ta’riflagan.
Olimning fikricha, juda ko‘pchilik sayyohlar O‘zbekistonni o‘z ko‘zi bilan ko‘rishni istaydi. Chunki dunyoga mashhur Samarqand, Buxoro, Xiva, Toshkent kabi shaharlar ana shu zaminda joylashgan.
Turk tarixchisi yoshlarga murojaat qilib, xorijga sayohat qilishni, avvalo, Turkiy dunyo mamlakatlarini kashf etish, ajdodlar yurti bilan yaqindan tanishishdan boshlash lozim ekanini ta’kidladi.
“Yoshlarga tavsiyam shuki, hozir xorijga sayohat qilmoqchi bo‘lsangiz, avvalo Turkiy zaminni aylaning. Masalan, O‘zbekistonga borib, tarixiy shaharlarni ko‘rib keling, ajdodlaringiz yurti bilan tanishing. So‘ng Saljuqiylar davlati barpo etilgan zaminlarni ko‘ring”, – dedi professor.
Erhan Afyonjuning ta’kidlashicha, bunday sayohatlar yoshlar uchun har tomonlama foydali va qiziqarli bo‘lib, ularning tarixiy xotirasi va dunyoqarashini boyitadi.
“Masalan, Samarqandning go‘zalligini dunyoning ko‘p joylarida topa olmaysiz. Ayniqsa, turk yoshlari o‘z ajdodlari yashagan zaminni borib ko‘rishlari lozim”, – dedi olim.
Professor O‘zbekistonni turkiy sivilizatsiyaning asosiy beshiklaridan biri, ilm-fan markazi sifatida ham alohida e’tirof etgan.
Shuningdek, turk tarixchisi O‘zbekistonning nafaqat tarixiy va madaniy, balki geografik jihatdan ham yashash uchun qulay hudud ekanini ta’kidlagan.
Dastur davomida professor bildirgan fikr-mulohazalar Turkiya jamoatchiligi orasida O‘zbekistonning tarixiy shaharlari, boy madaniy merosi va turizm salohiyatiga bo‘lgan qiziqishni yanada oshirishga xizmat qiladi.
O‘zbekiston musulmonlari idorasi Matbuot xizmati