Samarqand imomlari o‘rtasida kurash musobaqasi o‘tkazildi
O‘zbekiston musulmonlari idorasi raisi, muftiy hazratlarining tashabbuslari bilan diniy soha xodimlari o‘rtasida milliy sport turi – kurash bo‘yicha Samarqand viloyati bosqichi ko‘tarinki ruhda tashkil etildi.
Tadbirning ochilish marosimida viloyat hokimi o‘rinbosari B.Karimov va viloyat bosh imom-xatibi o‘rinbosari N.Abdumannonov ishtirok etib, bu kabi musobaqalar soha xodimlari o‘rtasida sog‘lom turmush tarzini targ‘ib qilish va o‘zaro hamjihatlikni mustahkamlashda muhim ahamiyatga ega ekanini ta’kidladilar.
G‘oliblar va sovrindorlar:
Murosasiz kechgan bahslarda quyidagi polvonlar o‘z vazn toifalarida tengsiz deb topildi va respublika bosqichiga yo‘llanmani qo‘lga kiritdilar:
-
80 kg vaznda: 1-o‘rin – M.Hidoyatov (Bulung‘ur t.), 2-o‘rin – A.Yangiboyev (Qo‘shrabot t.), 3-o‘rin – Yu.Shodiyev (Tayloq t.).
-
+80 kg vaznda: 1-o‘rin – O.Saydullayev (Payariq t.), 2-o‘rin – H.Xudoyorov (Nurobod t.), 3-o‘rin – M.Toshpo‘latov (Ishtixon t.).
-
90 kg vaznda: 1-o‘rin – I.Xidirov (Jomboy t.), 2-o‘rin – O.Jumayev (Samarqand sh.), 3-o‘rin – R.Tursunov (Samarqand t.).
-
+90 kg vaznda: 1-o‘rin – M.Valiyev (Kattaqo‘rg‘on t.), 2-o‘rin – L.Xojiqurbonov (Pastdarg‘om t.), 3-o‘rin – J.Rajabov (Nurobod t.).
Musobaqa yakunida g‘olib va sovrindorlar tashkilotchilar tomonidan diplom hamda esdalik sovg‘alari bilan munosib taqdirlandi. Bu kabi tadbirlar nafaqat jismoniy chiniqish, balki milliy qadriyatlarimiz va sport an’analarimizga bo‘lgan hurmatning yaqqol ifodasi bo‘ldi.
Sammuslim.uz
“Em Insight”: Toshkentdagi xalqaro mediaforum islom sivilizatsiyasining zamonaviy qiyofasini namoyon etdi
Britaniyaning “Em Insight” jurnalida O‘zbekistonda bo‘lib o‘tgan “Islom sivilizatsiyasi: yangi nigoh, yangi kashfiyotlar” mavzusidagi xalqaro mediaforumga bag‘ishlangan maqola e’lon qilindi, deb xabar bermoqda “Dunyo” AA.
Nashrda yozilishicha, O‘zbekiston Islom sivilizatsiyasi markazi tomonidan tashkil etilgan “Islom sivilizatsiyasi: yangi nigoh, yangi kashfiyotlar” xalqaro mediaforumi xorijlik OAVda katta qiziqish uyg‘otgan.
Raqamli platformalar, sun’iy intellekt va axborot xurujlari avj olgan hozirgi zamonda ommaviy axborot vositalarining mamlakatlar, madaniyatlar va sivilizatsiyalar haqidagi tasavvurlarni shakllantirishdagi o‘rni tobora ortib bormoqda.
Maqolada ta’kidlanishicha, Al-Xorazmiy, Ibn Sino, Beruniy, Imom Buxoriy, Imom Termiziy va Mirzo Ulug‘bek kabi jahon ilm-fani rivojiga beqiyos hissa qo‘shgan buyuk mutafakkirlar yurti bo‘lmish O‘zbekiston bu kabi global muhokamalar uchun eng maqbul maydondir.
Qatarning “The Peninsula” gazetasi mas’ul muharriri Muhammad Osmon forumning raqamli axborot asridagi ahamiyatiga to‘xtalib, Imom Buxoriyning hadislarni to‘plash va ularning haqqoniyligini tekshirishdagi qat’iy yondashuvini tilga oldi.
U ushbu metodologiyani manbalarni chuqur o‘rganish va verifikatsiya qilishning o‘chmas namunasi deb atadi va bu tamoyillar feyk xabarlar hamda sun’iy intellekt mahsulotlari ko‘paygan hozirgi davrda juda ahamiyatli ekanini bildirdi.
O‘zbekiston Milliy axborot agentligi muharriri O‘tkir Alimov forumning Mustaqillikning 35 yilligi ostonasida o‘tkazilayotganiga e’tibor qaratgan. U 50 mamlakatdan 300 ga yaqin OAV vakillarining Toshkentda jamlangani O‘zbekistonning sivilizatsiyalar chorrahasi sifatidagi o‘rni ortib borayotganidan dalolat berishini ta’kidladi.
Maqolada Toshkentdagi xalqaro mediaforum jurnalistika mas’uliyati, tarixiy tadqiqotlar chuqurligi va zamonaviy texnologiyalar imkoniyatlarini birlashtirgan holda Islom sivilizatsiyasini yangi, zamonaviy qiyofada dunyoga tanitishga xizmat qilishi bayon etilgan.
O‘zbekiston musulmonlari idorasi Matbuot xizmati
- «
- »