Imom-xatiblarga KPI platformasi bo‘yicha tushunchalar berildi
Mamlakatimizda amalga oshirilayotgan raqamlashtirish islohotlari doirasida O‘zbekiston musulmonlari idorasi tomonidan diniy soha xodimlari faoliyatini yangi bosqichga ko‘tarish borasida tizimli ishlar olib borilmoqda. Xususan, imom-xatiblar va imom-noiblarining kundalik ish faoliyati hamda ma’naviy-ma’rifiy tadbirlari monitoringi KPI (samaradorlikning muhim ko‘rsatkichlari) platformasi orqali nazorat qilinmoqda.
Shu munosabat bilan, joriy yilning 9 aprel kuni Andijon viloyatida shahar va tuman bosh imom-xatiblari hamda masjid hujjatlariga mas’ul xodimlar ishtirokida yig‘ilish bo‘lib o‘tdi.
Tadbirda O‘zbekiston musulmonlari idorasi raisi o‘rinbosari Muhammadolim Muhammadsiddiqov, Masjidlar bilan ishlash bo‘limi mudiri Muzaffar Kamolov va Kadrlar bilan ishlash bo‘limi boshlig‘i Salohiddin Sherxonovlar ishtirok etdi.
So‘zga chiqqanlar imom-xatiblarning ilmiy va kasbiy mahoratini oshirish, faoliyatdagi kamchiliklarni bartaraf etish hamda ish jarayonini tizimli tashkil etishda KPI platformasidan samarali foydalanish bo‘yicha zarur ko‘rsatma va topshiriqlar berdilar.
Muslimun.uz
Registon maydonini Imom al-Moturidiy maqbarasi bilan bog‘laydigan ko‘cha rekonstruksiya qilinmoqda
Samarqandning tarixiy qismida turizm infratuzilmasini keng ko‘lamli yangilash ishlari davom etmoqda. Amalga oshirilayotgan loyihalarning asosiy maqsadi xorijiy sayyohlarning qolish muddatini uzaytirish, qulay shahar muhitini yaratish va bir vaqtning o‘zida mahalliy aholining hayot sifatini oshirishdan iborat.
“Samarkandskiy vestnik” nashriga ko‘ra, turizmni rivojlantirish dasturi doirasida eski shaharning 13 ta ko‘chasi bosqichma-bosqich zamonaviy piyodalar yo‘lagiga aylantirilmoqda. Bu yerda yangi xizmat ko‘rsatish obyektlari barpo etilmoqda, jamoat joylari obodonlashtirilmoqda, milliy me’morchilik an’analarini saqlab qolgan holda muhandislik kommunikatsiyalari va bino fasadlari yangilanmoqda.
Eng yirik loyihalardan biri Registon maydonini Imom al-Moturidiy maqbarasi bilan bog‘laydigan Buxoro ko‘chasini rekonstruksiya qilish bo‘ldi. Ko‘chaning 850 metr qismi to‘liq piyodalar hududiga aylantiriladi. Loyihani ishlab chiquvchilardan biri, Samarqand davlat texnika universiteti o‘qituvchisi Jasur Berdiqulovning ta’kidlashicha, ilgari bu yerda qatnov qismining torligi tufayli muntazam ravishda tirbandliklar yuzaga kelgan, qulay piyodalar yo‘laklarining yo‘qligi esa piyodalar uchun jiddiy noqulayliklar tug‘dirgan. Ishlar yakunlangach, ko‘cha xavfsiz jamoat maydoniga aylanadi. Aholi uchun alohida to‘xtash joyi ajratilgan bo‘lib, transport vositalarining kirishiga faqat zarurat tug‘ilganda maxsus xizmatlarga ruxsat beriladi. Shu bilan birga, suv, gaz, elektr va boshqa muhandislik tarmoqlari to‘liq modernizatsiya qilinmoqda.
Oltin asr mahallasida joylashgan Bag‘dod ko‘chasida ham ishlar davom etmoqda. Bu yerda 600 metrlik hudud obodonlashtirilmoqda. Loyiha doirasida zamonaviy turizm va xizmat ko‘rsatish infratuzilmasini yaratish, kichik biznes va xizmat ko‘rsatish sohasini rivojlantirish ko‘zda tutilgan.
O‘zbekiston musulmonlari idorasi Matbuot xizmati