Jannatning o‘rta eshigi
Bismillahir Rohmanir Rohiym
“Ota – jannat eshiklarining o‘rtasidir”.
Ya’ni: otaning itoatida bo‘lish va unga oq bo‘lmaslik insonni jannatning eng afzal, o‘rta eshiklaridan kirishiga sabab bo‘ladi. Buni Imom Iroqiy zikr qilgan.
Imom Bayzoviy rahimahulloh aytadi: "Bu yerda “o‘rta eshik” degani - eng yaxshi va eng yuksak eshik demak. Ma’nosi shuki, jannatga kirish uchun eng yaxshi vasila - otaga itoat qilish va uning haqqini ado etish".
Bu yerda “ota” degani jins ma’nosida, ya’ni ota-onani o‘z ichiga oladi. Agar ota haqida hukm shu bo‘lsa, ona haqidagi hukm bundan ham kuchliroq va ustunroqdir.
“U eshikni zoye qilish”.
Bu buyruq fe’li bo‘lib, ma’nosi: uni asrashni tark etish, ya’ni otaga itoatni yo‘qotish.
“Yoki uni saqlash”.
Ya’ni: doimiy ravishda uni qo‘lga kiritishga, ya’ni otaga yaxshilik qilish va itoatda bo‘lishga harakat qilish, sening ixtiyoringda.
Homidjon qori ISHMATBЕKOV
Turkiy davlatlar muftiylari 10 ga yaqin muhim bayonot va fatvolarni imzoladilar
Xabar berganimizdek, Ozarbayjon poytaxti Boku shahrida Turkiy davlatlar muftiylari kengashining navbatdagi VII yig‘ilishi bo‘lib o‘tdi.
Yig‘ilish yakunida O‘zbekiston, Turkiya, Ozarbayjon, Qozog‘iston va Qirg‘iziston muftiylari muhim yo‘nalishlarda 3 ta bayonot va zamonaviy masalalarga oid 6 ta yirik fatvoni imzolashdi.
Jumladan, «Islomning ilm-fan va texnologiyaga yondashuvi» mavzusidagi bayonotda Islom dinida insoniyat farovonligiga xizmat qiluvchi barcha ilmiy va texnologik yutuqlar qo‘llab-quvvatlanishi bilan birga, ular yuksak axloqiy mezonlar, adolat va mas’uliyat tamoyillari asosida rivojlanishi shartligi ta’kidlandi.
«Musulmonligi ma’lum bo‘lgan shaxsni kofirga chiqarishning hukmi» to‘g‘risidagi bayonotda Islom ta’limotiga ko‘ra, kalimai shahodat keltirib, qibla ahlidan bo‘lgan har qanday shaxs musulmon hisoblanishi hamda qilgan gunohi yoki amaldagi nuqsoni tufayli uni kufrda ayblash (takfir qilish) qat’iyan man etilishi aytildi. Shuningdek, Turkiy davlatlar ulamolari ushbu bayonotda jamiyatda fitna, qon to‘kilishi va nizolarga sabab bo‘luvchi takfirchilik oqimlariga qarshi ilmiy-ma’rifiy kurashni kuchaytirish, ummat birdamligini mustahkamlash zarurligiga e’tibor qaratishdi.
«Oila qurishga targ‘ib qilish, uni muhofaza qilish va mustahkamlashga doir umumiy mas’uliyat» bayonotida Islom ta’limotiga ko‘ra, oila nikoh asosiga quriladigan, sog‘lom avlod va jamiyat davomiyligini ta’minlovchi, insonga ruhiy xotirjamlik hamda axloqiy tarbiya beruvchi muqaddas muassasa ekaniga urg‘u qaratildi. Muftiylar oila institutini himoya qilish, yoshlarni oilaga tayyorlash va milliy-ma’naviy qadriyatlarni mustahkamlashda birdamlikka chaqirdilar.
Shuningdek, muftiylar tomonidan «Bitta qabrga birdan ortiq mayyitni dafn etishning hukmi», «Ijaraga berilgan dehqonchilik yerlarining ushri», «Fatvo so‘rash va fatvo berishda sun’iy idrokdan foydalanish masalasi», «Juma namozi durust bo‘lishining shartlari», hijriy oy boshlanishini aniqlash mezonlari va takfir masalasiga doir 6 ta fatvo matni imzolandi.
O‘zbekiston musulmonlari idorasi Matbuot xizmati
