“Sayyid Muhyiddin maxdum” bitiruvchilari bilan muloqot o‘tkazildi
Mamlakatimizda yoshlarni o‘z sohada yetuk mutaxassis etib yetishtirish, ularni mas’uliyatli va o‘z xizmatiga fidoiy qilib tarbiyalash borasida “Sayyid Muhyiddin maxdum” o‘rta maxsus islom ta’lim muassasasida muhim tadbirlar tashkil etilmoqda.
Joriy yilning 9 aprel kuni O‘zbekiston musulmonlari idorasi raisi o‘rinbosari Muhammadolim Muhammadsiddiqov, Masjidlar bo‘limi boshlig‘i Muzaffar Kamolov va Kadrlar bo‘limi boshlig‘i Salohiddin Sherxonov ta’lim muassasasida bo‘lishdi.
Dastlab talabalar uchun yaratilgan zamonaviy shart-sharoitlar bilan yaqindan tanishildi. So‘ng bitiruvchi kurs talabalari bilan ochiq muloqot o‘tkazildi.
Uchrashuv davomida 42 nafar bitiruvchi talabaning kelgusi faoliyati haqida so‘z bordi. Muloqot davomida bitiruvchi talabalar o‘z oldilariga aniq maqsadlarni qo‘yganlari namoyon bo‘ldi. Xususan, yoshlarning arab, ingliz va nemis tillarini puxta egallagani ularning nafaqat yurtimiz, balki O‘zbekiston musulmonlari idorasi tavsiyasi asosida xalqaro miqyosda ham diniy xizmat olib borish imkoniyatini kengaytirishi alohida qayd etildi.
Shuningdek, uchrashuvda ta’limni yuqori bosqichlarda davom ettirish istagida bo‘lgan yoshlar uchun yaratilgan keng imkoniyatlar haqida ma’lumot berildi.
Ma’lumot uchun, muassasaning o‘tgan yilgi bitiruvchilaridan 4 nafari Iordaniyadagi Islom ilmlari universitetida tahsilni davom ettirmoqda. Bu kabi ijobiy natijalar muassasa rahbariyati va mudarrislarning fidokorona mehnati hamda tajribali ustozlarning muntazam targ‘ibot ishlari samarasi hisoblanadi.
Samimiy ruhda o‘tgan yig‘ilish yakunida yoshlarni to‘g‘ri yo‘naltirish va ularga ustozlar tajribasini yetkazish orqali dinimiz va yurtimiz ravnaqi yo‘lida xizmat qiladigan salohiyatli kadrlar bo‘lishiga ishonch bildirildi.
O‘zbekiston musulmonlari idorasi
Matbuot xizmati
Zeki Kaymaz: Kelgusi o‘n yil ichida O‘zbekistonni turkiy dunyoda yorqin yulduz sifatida ko‘raman
Turk tili instituti Ilmiy kengashi a’zosi, filolog olim, professor Zeki Kaymaz O‘zbekiston mustaqilligining 35 yilligi arafasida “Dunyo” AA orqali yurtdoshlarimizga o‘zining samimiy tabrigi va ezgu tilaklarini yo‘lladi.
– Avvalo, O‘zbekiston xalqini istiqlolning 35 yilligi munosabati bilan chin ko‘ngildan tabriklayman. O‘ttiz besh yil oz vaqt emas. Men yuz yildan oshgan mustaqil Turkiya fuqarosi sifatida Sizlarga ham yana ko‘p asrlar mustaqillik shodiyonasini nishonlashingizni tilayman.
Tarixga nazar tashlasak, Markaziy Osiyo, xususan, O‘zbekiston bilan yaqin munosabatda bo‘lib kelganmiz. Ayniqsa, Turkiyadagi milliy ozodlik kurashi davrida bizga bu diyordan jo‘natilgan ko‘makni doimo katta minnatdorlik bilan yodga olamiz.
Qardosh o‘zbek xalqi biz uchun doimo yaqin birodar, qalin do‘st bo‘lib kelgan. O‘zbekistonning bugungi taraqqiyoti bizni juda mamnun qiladi. Ushbu zaminga har borganimda go‘zal va obod mamlakatni ko‘ramaz. Yurtingizda madaniyat va ma’rifat o‘choqlari bisyor. Albatta, bu tamaddun va sivilizatsiyaning ildizlari uzoq o‘tmishga borib taqaladi.
Markaziy Osiyodagi ilk o‘rta asrlardagi Birinchi renessans hamda Amir Temur asos solgan Ikkinchi renessans davrlarida bu zaminda buyuk sivilizatsiya shakllandi. Toshkentda bunyod etilgan Islom sivilizatsiyasi markazi, Samarqanddagi Imom Buxoriy majmuasi, Imom Moturidiy ziyoratgohi kabi madaniy-ma’naviy maskanlar islom olamida muhim ahamiyatga ega.
Geostrategik mavqei nuqtayi nazaridan, men kelgusi o‘n yil ichida O‘zbekistonni turkiy dunyo, xususan, Markaziy Osiyo davlatlari orasida yorqin yulduz sifatida ko‘raman.
Buning sabablari bor, albatta. Avvalo, mamlakatdagi kuchli iqtisodiyot. Qolaversa, chuqur ildizlarga ega bo‘lgan boy madaniyat va tarix. Turkiya bilan O‘zbekiston o‘rtasidagi mustahkam do‘stlik va yaqin hamkorlik aloqalari ham muhim ahamiyat kasb etadi.
Tilagim – do‘stlik rishtalarimiz yanada mustahkamlansin, davlatlarimiz o‘rtasidagi hamkorlik aloqalari yuqori darajaga ko‘tarilsin.
Yana bir bor mustaqillik bayrami bilan chin qalbimdan tabriklayman va o‘zbek xalqiga samimiy salomlarimni yo‘llayman.
O‘zbekiston musulmonlari idorasi Matbuot xizmati