O‘zbekiston va Turkiya: Vaqf va ziyorat turizmi yo‘nalishidagi aloqalar yangi bosqichda
Shu kunlarda O‘zbekiston Respublikasi Prezidenti administratsiyasi Diniy-ma’rifiy masalalar bo‘yicha departamenti boshlig‘i Muzaffar Komilov, O‘zbekiston musulmonlari idorasi raisi o‘rinbosari, “Vaqf” xayriya jamoat fondi raisi Zayniddin domla Eshonqulov hamda O‘zbekiston xalqaro islom akademiyasi professori Ilhom Berdiyorovdan iborat delegatsiya xizmat safari bilan Turkiya davlatida bo‘lib turibdi.
Tashrif doirasida asosiy e’tibor vaqf ishlari va ziyorat turizmi bo‘yicha hamkorlikni rivojlantirishga qaratilmoqda. Shuningdek, delegatsiya a’zolari Turkiyada ta’lim olayotgan talabalar va istiqomat qilayotgan vatandoshlarimiz bilan uchrashib, turli ma’rifiy tadbirlar o‘tkazmoqdalar.
2026 yil 21 aprel kuni Anqara shahrida Turkiya madaniyat va turizm vaziri Mehmet Nuri Ersoy hamda Turkiya «Vaqf» boshqarmasi rahbariyati bilan muhim muzokaralar bo‘lib o‘tdi.
Uchrashuv avvalida Muzaffar Komilov ikki mamlakat rahbarlari o‘rtasidagi oliy darajadagi ishonchli munosabatlar barcha tizimlarda, xususan, xayriya va diniy-ma’rifiy sohalarda hamkorlik kengayishiga xizmat qilayotganini alohida qayd etdi.
Muloqot davomida ikki qardosh mamlakat o‘rtasidagi xayriya loyihalari yangi bosqichga chiqayotgani e’tirof etilib, istiqboldagi rejalar kelishib olindi. Ushbu muzokaralar yakunida sohaviy aloqalarni yanada mustahkamlashga qaratilgan muhim kelishuvlarga erishildi.
O‘zbekiston musulmonlari idorasi
Matbuot xizmati
Buxoroda ikki yangi jome masjidi qurilishi ko‘zdan kechirildi
Buxoro viloyatida yangi jome masjidlarini barpo etish va obodonlashtirish ishlari izchil davom etmoqda. Shu munosabat bilan O‘zbekiston musulmonlari idorasi Buxoro viloyati vakili, viloyat bosh imom-xatibi Jobir domla Elov Kogon shahri va Kogon tumanida qurilayotgan ikki masjidda bo‘lib, qurilish ishlarining borishi bilan tanishdi.
Dastlab Kogon tumanidagi “Xo‘ja Ka’bul Axbor Vali” jome masjidining yangi binosida olib borilayotgan qurilish ishlari ko‘zdan kechirildi. Tashrif davomida mas’ullar bilan qurilish jarayoni muhokama qilinib, ishlarni belgilangan muddatlarda va sifatli amalga oshirish yuzasidan tegishli tavsiya hamda takliflar berildi.
Loyihaga ko‘ra, yangi masjid xonaqohi va keng hovlisi bilan birgalikda 1000 nafardan ziyod namozxonni qabul qilish imkoniyatiga ega bo‘ladi. Majmua tarkibida muhtasham gumbaz, zamonaviy tahoratxonalar, ma’muriy binolar, yangi darvoza, avtoturargoh hamda ko‘kalamzorlashtirilgan hududlar barpo etiladi. Shuningdek, masjid hududidagi tarixiy hovuz va qadimiy quduqni restavratsiya qilish ishlari ham amalga oshirilishi rejalashtirilgan.
Shundan so‘ng Kogon shahrida barpo etilayotgan “Hazrati Bilol” jome masjidida ham qurilish ishlarining borishi o‘rganildi. Mas’ullarga qurilish sifatini yanada oshirish, me’moriy yechimlarga alohida e’tibor qaratish va ishlarni o‘z vaqtida yakunlash bo‘yicha tegishli ko‘rsatmalar berildi.
Loyihaga muvofiq, mazkur masjid sharqona milliy me’moriy uslubda qurilib, 900 nafar namozxonga mo‘ljallanadi. Majmuada kutubxona, omborxona, 20 kishilik tahoratxona, ma’muriy xonalar, baland gumbaz, ikki peshtoqli kirish darvozasi hamda balandligi 33 metr bo‘lgan minora barpo etiladi. Shuningdek, avtoturargoh, hovuz va yashil hududlar tashkil etilishi rejalashtirilgan.
Qayd etilganidek, qurilish ishlari masjidlarning hisob raqamlariga tushayotgan mablag‘lar hamda saxovatpesha homiylarning xayriyalari asosida amalga oshirilmoqda.
Yangi masjidlar yurtimizda diniy-ma’rifiy muhitni yanada mustahkamlash, aholiga munosib ibodat sharoitlarini yaratish va milliy me’morchilik an’analarini asrab-avaylashga xizmat qilishi bilan ahamiyatlidir.
Alloh taolo ushbu xayrli bunyodkorlik ishlarini barakali qilib, ularning muvaffaqiyatli yakun topishini nasib etsin.
O‘zbekiston musulmonlari idorasi
Buxoro viloyati vakilligi
Matbuot xizmati
