Dunyodagi eng go‘zal inson bo‘lmog‘ingiz uchun...
Baxtsizlik haddidan oshsa bilki, u tezda ketar,
Tun zulmati shiddatlansa unga nurli tong yetar.
Siz o‘z chiroyingiz bilan Quyoshdan ham go‘zalroq, xulq-atvoringiz bilan mushk-anbardan xushbo‘yroq, kamtarligingiz bilan to‘lin oydan balandroq va muloyimligingiz bilan mayin yomg‘irdan ham yoqimliroqsiz. Shunday ekan, iymon bilan go‘zalligingizda, qanoat bilan roziligingizda va satri avrat bilan iffatingizda bardavom bo‘ling.
Shuni bilingki, sizning bezaklaringiz tilla-kumush yoki olmoslar emas, balki, sahar vaqtidagi ikki rakat namozingiz, jaziramadagi Alloh uchun tutgan ro‘zangiz, faqatgina Alloh biladigan maxfiy sadaqangiz, xatolaringizni yuvadigan qaynoq ko‘z yoshlaringiz, joynamozdagi uzundan-uzoq sajdalaringiz hamda nafsingiz va shayton sizni yomonliklarga buyurgan vaqtdagi Allohdan qilgan hayoyingiz sizning haqiqiy zeb-ziynatingizdir.
Ustingizga taqvo libosini kiying, shunda kiyimlaringiz yamoqlangan bo‘lsada dunyodagi eng go‘zal ayol bo‘lasiz. Avratlaringizni berkiting, shunda oyoq kiyimsiz bo‘lsangizda dunyodagi eng chiroyli inson bo‘lasiz. O‘zingizni axloqsiz, fahsh ishlarga berilgan, behayo va jodugar ayollar hayotidan saqlang. Chunki ular haqiqiy baxtiqaro insonlardir.
Shu’la: Hayotingizdagi zulmat vaqtlarida o‘zingizgina ko‘nglingizda umid chiroqlarini yoqishingiz mumkin.
Doktor Oiz al-Qarniyning
"Dunyodagi eng baxtli ayol" kitobidan
Tarixni buzib ko‘rsatmaslik uchun
Vazirlar Mahkamasi huzuridagi Imom Buxoriy xalqaro ilmiy-tadqiqot markazida "Islom ma’rifati, hadis ilmi va Imom Buxoriy merosi" o‘quv kursi o‘tkazildi. Mutaxassislar tomonidan yodgorlik majmuasi gid-ekskursovodlari uchun o‘tkazilgan mashg‘ulotlar doirasida ekskursiya faoliyati bilan bog‘liq huquqiy, nazariy va amaliy masalalar ko‘rib chiqildi, xabar bermoqda “Samarkandskiy vestnik” nashri.
- Bu yerga tashrif buyurgan har bir ziyoratchi faqat ibodat qilish uchun emas, balki ma’naviy "oziq" olish uchun ham borishi kerak, - deydi Imom Buxoriy xalqaro ilmiy-tadqiqot markazi direktori Sh.Ziyodov. - Bu yerda faoliyat yuritayotgan gidlarning malakasini oshirish tizimini yo‘lga qo‘yar ekanmiz, ularga Imom Buxoriyning bizga qoldirgan merosini, bu merosning tarixiy manbalarini chuqur o‘rgatishimiz shart.
Kurs doirasida majmuaga birinchi marta tashrif buyurgan mehmonlar bilan muloqotning o‘ziga xos xususiyatlari muhokama qilindi. Xorijlik ziyoratchilarga nafaqat Imom al-Buxoriy hayotidagi faktlar va diniy qadriyatlarimizni yetkazish, balki boy madaniy merosimizni asrab-avaylash va yetkazish kabi dolzarb masalalar ko‘tarildi.
Gid-ekskursovodlar ham o‘z tajribalari bilan o‘rtoqlashib, kelgusidagi ishlarni tashkil etish bo‘yicha takliflar berdilar. Bu bevosita ekskursiyalarni o‘tkazish paytida yuzaga keladigan masalalarni muhokama qilish imkonini berdi.
Kurs O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mita, Diniy ta’lim sohasida kadrlar malakasini oshirish va qayta tayyorlash instituti, Imom Buxoriy xalqaro ilmiy-tadqiqot markazi, viloyat hokimligi hamda Imom Buxoriy yodgorlik majmuasini saqlash va uning atrofini obodonlashtirish departamenti tomonidan tashkil etildi.
Tarixiy obidalar va ziyoratgohlar turizm salohiyatining muhim qismi bo‘lgan Samarqand viloyati uchun malakali mutaxassislarni tayyorlash alohida ahamiyatga ega. Mehmonga tashrif buyuriladigan joyning tarixi qanchalik to‘liq va tushunarli ochib berilishi gidning professionalligiga bog‘liq. Shuning uchun ham gid-ekskursovodlarning malakasini muntazam oshirib borish, ularning kasbiy bilim va ko‘nikmalarini takomillashtirish hamda zamonaviy xizmat ko‘rsatish standartlarini joriy etish Samarqandda turizm xizmatlari sifatini oshirishda ustuvor yo‘nalishlardan biri bo‘lib qolmoqda.
O‘zbekiston musulmonlari idorasi Matbuot xizmati
- «
- »