Alloh har bir saxiydan saxiyroq, har bir rahmlidan rahmliroq
Bismillahir Rohmanir Rohiym
Muso alayhissalom zamonida bir kambag‘al er-xotin yashar, yillar davomida qashshoqlikda kun kechirardi.
Bir kuni xotini eriga:
- Muso Allohning payg‘ambari emasmi? - dedi.
- Ha, shunday, - dedi eri.
- Uning huzuriga borib, ahvolimizni aytmaymiz? Robbiga bizning haqimizda duo qilsa, balki Alloh taolo bizga ham boylik ato etar. Shunda qolgan umrimizni farovonlikda o‘tkazarmidik?!
Eri rozi bo‘ldi.
Ertasi kuni ular Muso alayhissalom huzuriga borib, ahvollarini bayon qildi. Muso alayhissalom munojot qilib, ularning haqiga duo qildi. Shunda Alloh taolo vahiy yubordi:
- Ey Muso, ularga aytgin. Men ularni boy qilaman, ammo faqat bir yilga. Bir yildan so‘ng yana avvalgi hollariga qaytishadi.
Muso alayhissalomdan bu xabarni eshitgan er-xotin xursand bo‘lishdi. Oradan ko‘p o‘tmay rizqlari kutilmagan tomonlardan kelib, qavmining boy kishisiga aylandi.
Bir kuni xotin eriga bunday dedi:
- Esingizda bo‘lsa, bu boylik bir yilgagina.
Eri bosh irg‘ab:
- Unda kel, shu ne’matlardan muhtojlarga ulashaylik. Ular qilgan yaxshiligimizni eslab, bizni duo qilishar, - dedi.
Shu maqsadda ular karvonlar ko‘p o‘tadigan yo‘l yuzda katta uy qurib, undan yettita eshik ochdi. So‘ngra kechayu kunduz yo‘lovchilarni kutib olib, ularni mehmon qilishardi. Shu tarzda bir yil o‘tdi. Ular ehson qilishdan to‘xtamadi. Lekin ularning boyligi kamaymas edi.
Muso alayhissalom ajablanib, Robbiga munojot qildi:
- Ey Robbim. Sen ularga faqat bir yil degan eding. Muddat o‘tsa-da, hanuz boyligi kamaymasligidan ajablanyapman.
Alloh taolo marhamat qildi:
- Ey Muso, Men ularga rizq eshiklaridan bittasini ochdim. Ular esa bandalarimni rizqlantirish uchun yettita eshik ochdilar. Men ulardan hayo qildim. Mening bandam Mendan ham saxiy bo‘ladimi?..
Subhanalloh! Alloh har bir saxiydan saxiyroq, har bir rahmlidan rahmliroqdir!..
Ilyosxon Ahmedov
Tarixni buzib ko‘rsatmaslik uchun
Vazirlar Mahkamasi huzuridagi Imom Buxoriy xalqaro ilmiy-tadqiqot markazida "Islom ma’rifati, hadis ilmi va Imom Buxoriy merosi" o‘quv kursi o‘tkazildi. Mutaxassislar tomonidan yodgorlik majmuasi gid-ekskursovodlari uchun o‘tkazilgan mashg‘ulotlar doirasida ekskursiya faoliyati bilan bog‘liq huquqiy, nazariy va amaliy masalalar ko‘rib chiqildi, xabar bermoqda “Samarkandskiy vestnik” nashri.
- Bu yerga tashrif buyurgan har bir ziyoratchi faqat ibodat qilish uchun emas, balki ma’naviy "oziq" olish uchun ham borishi kerak, - deydi Imom Buxoriy xalqaro ilmiy-tadqiqot markazi direktori Sh.Ziyodov. - Bu yerda faoliyat yuritayotgan gidlarning malakasini oshirish tizimini yo‘lga qo‘yar ekanmiz, ularga Imom Buxoriyning bizga qoldirgan merosini, bu merosning tarixiy manbalarini chuqur o‘rgatishimiz shart.
Kurs doirasida majmuaga birinchi marta tashrif buyurgan mehmonlar bilan muloqotning o‘ziga xos xususiyatlari muhokama qilindi. Xorijlik ziyoratchilarga nafaqat Imom al-Buxoriy hayotidagi faktlar va diniy qadriyatlarimizni yetkazish, balki boy madaniy merosimizni asrab-avaylash va yetkazish kabi dolzarb masalalar ko‘tarildi.
Gid-ekskursovodlar ham o‘z tajribalari bilan o‘rtoqlashib, kelgusidagi ishlarni tashkil etish bo‘yicha takliflar berdilar. Bu bevosita ekskursiyalarni o‘tkazish paytida yuzaga keladigan masalalarni muhokama qilish imkonini berdi.
Kurs O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mita, Diniy ta’lim sohasida kadrlar malakasini oshirish va qayta tayyorlash instituti, Imom Buxoriy xalqaro ilmiy-tadqiqot markazi, viloyat hokimligi hamda Imom Buxoriy yodgorlik majmuasini saqlash va uning atrofini obodonlashtirish departamenti tomonidan tashkil etildi.
Tarixiy obidalar va ziyoratgohlar turizm salohiyatining muhim qismi bo‘lgan Samarqand viloyati uchun malakali mutaxassislarni tayyorlash alohida ahamiyatga ega. Mehmonga tashrif buyuriladigan joyning tarixi qanchalik to‘liq va tushunarli ochib berilishi gidning professionalligiga bog‘liq. Shuning uchun ham gid-ekskursovodlarning malakasini muntazam oshirib borish, ularning kasbiy bilim va ko‘nikmalarini takomillashtirish hamda zamonaviy xizmat ko‘rsatish standartlarini joriy etish Samarqandda turizm xizmatlari sifatini oshirishda ustuvor yo‘nalishlardan biri bo‘lib qolmoqda.
O‘zbekiston musulmonlari idorasi Matbuot xizmati
- «
- »