Hojilarning ilk guruhlari muborak safarga kuzatilmoqda
#xabar #haj2026 #safar #kuzatuv
Ayni paytda poytaxtimizdagi “Novza” masjidida yuzida quvonch, tilida shukrona bilan muqaddas zaminga oshiqayotgan “Haj – 2026” mavsumining ilk ziyoratchilarini kuzatish marosimi bo‘lib o‘tmoqda.
Yurtdoshlarimizning ko‘zlaridagi quvonch yoshlari va orzusi ushalgan qalblarning talpinishi har qanday kishini to‘lqinlantirib yuboradi.
Qalblarni hayajonga solgan ushbu damlarda Allohning bayti sari oshiqayotgan yurtdoshlarimiz muqaddas qadamjolarni ziyorat qilib, eson-omon qaytishni so‘rab duolar qilishmoqda. Ularni kuzatayotgan yaqinlarining nigohida esa havas va sog‘inch: ular ham mana shunday saodatli kunlar va Ka’batulloh ziyorati o‘zlariga ham nasib etishini chin dildan niyat qilmoqda.
Yurtimizda davlatimiz va hukumatimiz tomonidan diniy-ma’rifiy sohaga qaratilayotgan alohida e’tibor tufayli so‘nggi yillarda mo‘min-musulmonlar Islomning barcha ruknlari, xususan, haj amallarini to‘la-to‘kis ado etish baxtiga noil bo‘lmoqda.
Ta’kidlash joizki, ziyoratchilarning xavfsiz va sifatli ibodat qilishlari uchun yaratilgan tizimli shart-sharoitlar davlatimiz tomonidan ilgari surilgan “Inson qadri uchun, inson baxti uchun!” degan ezgu tamoyilning diniy-ma’rifiy sohadagi amaliy ifodasidir. Mazkur yuksak darajadagi tashkiliy ishlar hamyurtlarimizga muqaddas zaminda faqat ibodat bilan mashg‘ul bo‘lishlari uchun zamin yaratadi.
Alloh taolo muborak safarga otlanayotgan barcha yurtdoshlarimizning safarlarini xayrli, hajlarini mabrur va duolarini mustajob aylasin.
O‘zbekiston musulmonlari idorasi
Matbuot xizmati
Yaxshilik ulashib, ko‘ngillar shod bo‘lmoqda
Vatanimiz mustaqilligining 35 yillik bayrami arafasida Qoraqalpog‘iston Respublikasi bo‘yicha mehr-oqibat, oqibat va xayr-saxovat marafonlari yangicha sur’at va keng yoyilmoqda. Inson qadrini ulug‘lashni bosh maqsad qilgan ushbu ezgu tashabbuslar yurtimizdagi ijtimoiy himoyaga muhtoj oilalarga, yolg‘iz va boquvchisini yo‘qotgan farzandlarimizga mehr ulashishga qaratilgan.
"Vaqf" xayriya jamoat fondi Qoraqalpog‘iston bo‘limi tomonidan "Imom eshon Muhammad" jome masjidida yolg‘iz va boquvchisini yo‘qotgan farzandlarimiz uchun maktab formasi va o‘quv qurollarini berish tadbiri o‘tkazildi.
Ko‘ngillarga umid, yuraklarga quvonch taratgan tadbirda Qoraqalpog‘iston Respublikasi Vazirlar Kengashi Raisining o‘rinbosari Alisher Allaniyazov, Qoraqalpog‘iston musulmonlari qoziyoti qozisi Bahramaddin domla Razov va "Vaqf" xayriya jamoat fondi raisi A.Jolovshiyevlar ishtirok etib, 35 bolaga maktab formalari va bayram sovg‘alarini tantanali tarzda topshirdi.
Bunday g‘amxo‘rlik tadbiri farzandlarimizning ko‘zlarida quvonch uchqunini yoqib, ko‘ngillarida cheksiz faxr tuyg‘usini uyg‘otdi.
"Inson qadri ulug‘langan, mehr-oqibat ustuvor bo‘lgan yurtda doimo taraqqiyot va baraka bo‘ladi."
Qoraqalpog‘iston musulmonlari qoziyoti
