Har oyda bir xatm: hayotingizda nimalar o‘zgaradi?
Ko‘pchiligimiz Qur’onni faqat Ramazonda xatm qilishga odatlanganmiz. Ammo bu muborak Kalomni har oyda bir marta o‘qib chiqishni doimiy odatga aylantirsangiz, hayotingizda mo‘jizaviy o‘zgarishlar sodir bo‘la boshlaydi:
1. Uyingizga farishtalar tushadi
Hadisda kelishicha, Qur’on o‘qiladigan uyga farishtalar keladi, shaytonlar u yerni tark etadi. Xonadoningizda siz tushuntirib berolmaydigan bir xotirjamlik va sukunat qaror topadi.
2. Rizqingizga baraka kiradi
Qur’on tilovati vaqtni ham, mablag‘ni ham barakali qiladi. Oy davomida qilgan ishlaringizda unum, topganingizda esa xayr ko‘rasiz.
3. Zehningiz va xotirangiz charxlanadi
Muntazam Qur’on o‘qish miya faoliyatini yaxshilaydi, diqqatni jamlashni o‘rgatadi va sizni tushkunlik (depressiya)dan himoya qiladi. U qalbning shifosidir.
4. Duolaringiz ijobat bo‘ladi
Rasululloh sollallohu alayhi vasallam: «Kim Qur’onni xatm qilsa, uning ijobat bo‘ladigan bitta duosi bordir», deb marhamat qilganlar (Imom Tabaroniy rivoyati). Har oyda bir marta Allohdan eng muhim hojatlaringizni so‘rash uchun maxsus imkoniyatga ega bo‘lasiz.
5. Qalbingiz nurga to‘ladi
Inson dunyo tashvishlari bilan charchaydi, qalbi zanglaydi. Har oylik xatm bu zanglarni tozalab, ruhiyatingizni yangilab turadi.
BU JUDA OSON!
Qur’on taxminan 600 betdan iborat. Agar kuniga 20 bet (1 juz) o‘qisangiz, bir oyda bemalol xatm qilasiz. Bu esa har namozdan keyin bor-yo‘g‘i 4 betdan to‘g‘ri keladi.
Bugundan boshlang! O‘zingizga soat vaqtini belgilang va Allohning kalomi bilan do‘stlashing.
Mirarab.uz
Erhan Afyonju: O‘zbekiston – turkiy sivilizatsiyaning eng go‘zal shaharlari joylashgan zamin
Turkiyaning “CNN-Türk” telekanalida efirga uzatilgan “Tafakkur doirasi” dasturida so‘zga chiqqan taniqli olim, Milliy mudofaa universiteti rektori, professor Erhan Afyonju O‘zbekistonning boy tarixiy merosi va sayyohlik salohiyati haqida fikr yuritdi, deb xabar bermoqda “Dunyo” AA.
Ko‘rsatuvda qatnashgan turk tarixchisi Erhan Afyonju O‘zbekistonni turkiy sivilizatsiyaning eng go‘zal shaharlari joylashgan alohida geografik hudud sifatida ta’riflagan.
Olimning fikricha, juda ko‘pchilik sayyohlar O‘zbekistonni o‘z ko‘zi bilan ko‘rishni istaydi. Chunki dunyoga mashhur Samarqand, Buxoro, Xiva, Toshkent kabi shaharlar ana shu zaminda joylashgan.
Turk tarixchisi yoshlarga murojaat qilib, xorijga sayohat qilishni, avvalo, Turkiy dunyo mamlakatlarini kashf etish, ajdodlar yurti bilan yaqindan tanishishdan boshlash lozim ekanini ta’kidladi.
“Yoshlarga tavsiyam shuki, hozir xorijga sayohat qilmoqchi bo‘lsangiz, avvalo Turkiy zaminni aylaning. Masalan, O‘zbekistonga borib, tarixiy shaharlarni ko‘rib keling, ajdodlaringiz yurti bilan tanishing. So‘ng Saljuqiylar davlati barpo etilgan zaminlarni ko‘ring”, – dedi professor.
Erhan Afyonjuning ta’kidlashicha, bunday sayohatlar yoshlar uchun har tomonlama foydali va qiziqarli bo‘lib, ularning tarixiy xotirasi va dunyoqarashini boyitadi.
“Masalan, Samarqandning go‘zalligini dunyoning ko‘p joylarida topa olmaysiz. Ayniqsa, turk yoshlari o‘z ajdodlari yashagan zaminni borib ko‘rishlari lozim”, – dedi olim.
Professor O‘zbekistonni turkiy sivilizatsiyaning asosiy beshiklaridan biri, ilm-fan markazi sifatida ham alohida e’tirof etgan.
Shuningdek, turk tarixchisi O‘zbekistonning nafaqat tarixiy va madaniy, balki geografik jihatdan ham yashash uchun qulay hudud ekanini ta’kidlagan.
Dastur davomida professor bildirgan fikr-mulohazalar Turkiya jamoatchiligi orasida O‘zbekistonning tarixiy shaharlari, boy madaniy merosi va turizm salohiyatiga bo‘lgan qiziqishni yanada oshirishga xizmat qiladi.
O‘zbekiston musulmonlari idorasi Matbuot xizmati
