Bugungi imkoniyatlarning qiyosi yo‘q
Menga mustaqillikning dastlabki yillarida ham haj safariga kelish nasib etgan edi. O‘sha paytlardagi sharoit bilan bugungi imkoniyatlarni solishtirsam, rostdan ham yer bilan osmoncha farq bor. U vaqtlarda xizmat ko‘rsatish, joylashish va tashkiliy ishlar ancha qiyin kechardi.
Bugun esa hojilar uchun barcha qulayliklar yaratilgan, keksalarga alohida g‘amxo‘rlik ko‘rsatilmoqda. Hojilarga e’tibor yuqori darajaga chiqibdi. Buni yurtimiz aeroportidayoq his qildim. Xizmat ko‘rsatish juda tartibli, sifatli tashkil etilibdi. Bugungi imkoniyatlarning qiyosi yo‘q!
Ko‘zimda yosh bilan Madinai munavvaraga, Payg‘ambarimiz alayhissalom masjidlariga kirib bordim. Makkai mukarramada ham ibodatlarimizni ko‘nglimiz to‘q, xotirjam ado etyapmiz.
Biz keksalarning tillarimizda faqat duo: ilohim, yurtimizda mana shunday keng imkoniyat va yuksak e’tiborni ta’minlab berayotgan muhtaram Prezidentimiz sog‘-salomat bo‘lsinlar, el-yurt tinchligi va xalqimiz farovonligi yo‘lidagi ishlarida Alloh yor bo‘lsin».
No‘monjon SHOKIROV,
Toshkent shahri
Diniy ta’limda yangi bosqich: Toshkentda nufuzli anjuman bo‘lib o‘tmoqda
Toshkent shahridagi Islom sivilizatsiyasi markazining Katta majlislar zalida O‘zbekiston musulmonlari idorasi tasarrufidagi oliy va o‘rta maxsus diniy ta’lim muassasalari professor-o‘qituvchilarining «Zamonaviy diniy ta’lim: pedagogika, ilm-ma’rifat va innovatsiya» mavzusidagi I ilmiy-amaliy anjumani boshlandi.
O‘zbekiston musulmonlari idorasi tarixida ilk bor o‘tkazilayotgan ushbu nufuzli tadbirda Prezident maslahatchisi Muzaffar Komilov, Din ishlari bo‘yicha qo‘mita raisi Sodiqjon Toshboyev, muftiy Shayx Nuriddin Xoliqnazar hazratlari, Islom sivilizatsiyasi markazi direktori Firdavs Abduxoliqov, shuningdek, diniy ta’lim muassasalari rahbarlari, bosh imom-xatiblar va OAV vakillari ishtirok etmoqda. Anjumanga jami 700 nafarga yaqin pedagog va soha vakillari jalb etilgan bo‘lib, ularning 300 nafari bevosita zalda, 400 nafari esa hududlardan videoselektor orqali qatnashmoqda.
So‘zga chiqqan notiqlar so‘nggi yillarda Prezidentimiz tashabbuslari bilan diniy-ma’rifiy sohani takomillashtirish va zamonaviy kadrlar tayyorlash borasida amalga oshirilayotgan tizimli islohotlarga to‘xtalib o‘tmoqda. Ta’kidlanganidek, Mir Arab oliy madrasasi, Hadis ilmi maktabi, Imom Termiziy islom instituti va madrasasi hamda 4 ta xalqaro ilmiy-tadqiqot markazining tashkil etilishi ilm ahliga keng imkoniyatlar eshigini ochdi. Toshkent islom institutida magistratura ochildi, tizimdagi 510 nafar pedagogning 50 nafardan ortig‘i PhD va DSc ilmiy darajalariga ega bo‘ldi.
Shuningdek, yurtimizdagi diniy ta’lim muassasalariga Misrning Al-Azhar majmuasi ustozlari jalb etildi. 90 ta fan dasturi va yangi avlod darsliklari yaratildi. Mir Arab, Xadichai Kubro, Hidoya va Ko‘kaldosh madrasalari zamonaviy binolarga ega bo‘lib, Iordaniya, Misr va Birlashgan Arab Amirliklarining yetakchi oliy ta’lim muassasalari bilan hamkorliklar rivojlanmoqda.
Ushbu nufuzli anjumandan ko‘zlangan maqsad ham professor-o‘qituvchilar uchun ilmiy-amaliy muloqot maydonini yaratish, pedagoglarning kasbiy salohiyatini yuksaltirish, ta’lim jarayoniga raqamli va innovatsion usullarni keng joriy etishdir.
O‘zbekiston musulmonlari idorasi Matbuot xizmati
