"Bobo Arab" masjidiga ilk g‘isht qo‘yildi
O‘zbekiston musulmonlari idorasi tizimidagi xayrli islohotlar va yurtimizdagi obodonlashtirish ishlarining uzviy davomi o‘laroq, Buxoro viloyati Peshku tumanidagi «Bobo Arab» jome masjidining yangi binosiga ilk g‘isht qo‘yish marosimi bo‘lib o‘tdi.
Zamonaviy loyiha asosida qayta qurilayotgan ushbu muazzam maskan bir vaqtning o‘zida 2200 nafar namozxonni o‘z bag‘riga sig‘dirishga mo‘ljallangan bo‘lib, hudud aholisiga cheksiz quvonch bag‘ishladi.
Tantanali tadbirda Peshku tumani hokimi Hayot Davlatov, Buxoro viloyati bosh imom-xatibi Jobir Elov hamda keng jamoatchilik vakillari, nuroniylar va homiylar ishtirok etib, ezgu niyatlar bilan poydevorga ilk g‘ishtlarni qo‘yishdi.
Muqaddas qadamjoning yangi qiyofasi milliy me’morchilik an’analari va zamonaviy qulayliklarni o‘zida mujassam etgan bo‘lib, hozirda mohir ustalar va saxovatpesha insonlar ushbu xayrli qurilishga o‘zlarining munosib hissalarini qo‘shmoqdalar. Zero, masjidlarni obod etish — kelajak avlod uchun qoldirilgan eng go‘zal ma’naviy merosdir.
O‘zbekiston musulmonlari idorasi
Buxoro viloyati vakilligi
Matbuot xizmati
Registon maydonini Imom al-Moturidiy maqbarasi bilan bog‘laydigan ko‘cha rekonstruksiya qilinmoqda
Samarqandning tarixiy qismida turizm infratuzilmasini keng ko‘lamli yangilash ishlari davom etmoqda. Amalga oshirilayotgan loyihalarning asosiy maqsadi xorijiy sayyohlarning qolish muddatini uzaytirish, qulay shahar muhitini yaratish va bir vaqtning o‘zida mahalliy aholining hayot sifatini oshirishdan iborat.
“Samarkandskiy vestnik” nashriga ko‘ra, turizmni rivojlantirish dasturi doirasida eski shaharning 13 ta ko‘chasi bosqichma-bosqich zamonaviy piyodalar yo‘lagiga aylantirilmoqda. Bu yerda yangi xizmat ko‘rsatish obyektlari barpo etilmoqda, jamoat joylari obodonlashtirilmoqda, milliy me’morchilik an’analarini saqlab qolgan holda muhandislik kommunikatsiyalari va bino fasadlari yangilanmoqda.
Eng yirik loyihalardan biri Registon maydonini Imom al-Moturidiy maqbarasi bilan bog‘laydigan Buxoro ko‘chasini rekonstruksiya qilish bo‘ldi. Ko‘chaning 850 metr qismi to‘liq piyodalar hududiga aylantiriladi. Loyihani ishlab chiquvchilardan biri, Samarqand davlat texnika universiteti o‘qituvchisi Jasur Berdiqulovning ta’kidlashicha, ilgari bu yerda qatnov qismining torligi tufayli muntazam ravishda tirbandliklar yuzaga kelgan, qulay piyodalar yo‘laklarining yo‘qligi esa piyodalar uchun jiddiy noqulayliklar tug‘dirgan. Ishlar yakunlangach, ko‘cha xavfsiz jamoat maydoniga aylanadi. Aholi uchun alohida to‘xtash joyi ajratilgan bo‘lib, transport vositalarining kirishiga faqat zarurat tug‘ilganda maxsus xizmatlarga ruxsat beriladi. Shu bilan birga, suv, gaz, elektr va boshqa muhandislik tarmoqlari to‘liq modernizatsiya qilinmoqda.
Oltin asr mahallasida joylashgan Bag‘dod ko‘chasida ham ishlar davom etmoqda. Bu yerda 600 metrlik hudud obodonlashtirilmoqda. Loyiha doirasida zamonaviy turizm va xizmat ko‘rsatish infratuzilmasini yaratish, kichik biznes va xizmat ko‘rsatish sohasini rivojlantirish ko‘zda tutilgan.
O‘zbekiston musulmonlari idorasi Matbuot xizmati