BO‘LG‘USI HOJILAR MUQADDAS ZAMINDA EHTIROM ILA KUTIB OLINMOQDA
Makkai mukarramaga yetib kelgan navbatdagi ziyoratchilarni O‘zbekiston musulmonlari idorasi raisi, muftiy Shayx Nuriddin Xoliqnazar hazratlari, Ishchi guruhi a’zolari, “Haj” va “Umra” ishlari bo‘yicha attashe Shuhrat Amoniy hamda mas’ul mutasaddilar tomonidan alohida ehtirom va samimiyat bilan kutib olindi.
Yurtdoshlarimiz zamonaviy va yangi qurilgan mehmonxonalarga kirishlari bilanoq, ularga zam-zam suvi, xurmo, turli shirinliklar, guldastalar hamda esdalik tuhfalari taqdim etildi.
Ko‘rsatilayotgan bunday g‘amxo‘rlik va e’tibordan mamnun bo‘lgan ziyoratchilar Alloh taologa hamdu sanolar aytib, bu kabi mehr va ehtiromni muqaddas Makkai mukarramada ham chuqur his qilayotganlarini izhor etdilar.
Shu tariqa, yurtimizda ustuvor ahamiyat kasb etayotgan inson qadri va insonga e’tibor tamoyili nafaqat O‘zbekistonda, balki uzoq yurtlarda ham amaliy ifodasini topayotganiga yana bir bor guvoh bo‘ldilar.
O‘zbekiston musulmonlari idorasi
Matbuot xizmati
Indoneziya Haj va Umra vaziri Buxoroga tashrif buyurdi
7–8 sentabr kunlari Indoneziya Haj va Umra vaziri Muhammad Irfon Yusuf boshchiligidagi delegatsiya Buxoro viloyatiga tashrif buyurdi.
Mehmonlarni temir yo‘l vokzalida viloyat hokimi o‘rinbosari B.Shahriyorov, A.Qalandarovlar boshchiligidagi mutasaddilar kutib oldi.
Hokim o‘rinbosari B.Shahriyorov, A.Qalandarov , turizm boshqarmasi boshlig‘i A.Rajabov va bosh imom-xatib J.Elov ishtirokidagi uchrashuvda Buxoroning islom sivilizatsiyasi tarixidagi o‘rni, muqaddas qadamjolar va allomalar merosini targ‘ib qilish, ziyoratchilar oqimini oshirish hamda yangi ziyorat turizmi yo‘nalishlarini shakllantirish masalalari muhokama qilindi.
Jakarta–Buxoro yo‘nalishida charter va to‘g‘ridan to‘g‘ri aviaqatnovlar yo‘lga qo‘yish imkoniyatlari ham ko‘rib chiqildi.
Imom al-Buxoriy, Abduxoliq G‘ijduvoniy va Bahouddin Naqshband merosini Indoneziyada targ‘ib qilish maqsadida Jakartadagi oliy ta’lim muassasalari va turistik kompaniyalarda ma’ruza hamda targ‘ibot tadbirlarini tashkil etish taklif qilindi.
Delegatsiya Bahouddin Naqshband majmuasi va Buxoroning tarixiy markazlari bilan tanishib, shaharning ziyorat turizmi salohiyati haqida ma’lumot oldi.
Tashrif — Buxoro va Indoneziya o‘rtasidagi ziyorat turizmi, diniy-ma’rifiy hamda madaniy aloqalarni yangi bosqichga olib chiqish yo‘lidagi muhim qadam bo‘ldi.
O‘zbekiston musulmonlari idorasi Matbuot xizmati