"Prezident hojilari"ga ehtirom ko‘rsatilmoqda
#xabar #haj2026 #prezident_hojisi
Ayni kunlarda yurtimizda "Haj – 2026" mavsumi qizg‘in pallasiga kirdi. Islom dinining beshinchi arkonini ado etish ishtiyoqida bo‘lgan minglab hamyurtlarimizni muborak diyorga kuzatish ishlari tizimli ravishda yuqori darajada amalga oshirilmoqda.
Kuni kecha muhtaram Prezidentimiz tomonidan el-yurt koriga yarayotgan, fidoiy va jonkuyar 100 nafar vatandoshimizni "Prezident hojisi" sifatida Haj safariga jo‘natish haqidagi xushxabar butun mamlakatimiz bo‘ylab katta quvonch va shukronalik bilan kutib olindi.
Shu kunlarda ana shunday yuksak baxt va e’tirofga musharraf bo‘lgan Qoraqalpog‘iston Respublikasi va viloyatlardan kelgan ziyoratchilar Toshkentda yuqori darajada kutib olinmoqda. Tadbirlarda mutasaddi vakillar ishtirok etmoqda. Xususan, Din ishlari bo‘yicha qo‘mita raisining birinchi o‘rinbosari Davronbek Maxsudov hamda O‘zbekiston musulmonlari idorasi raisi o‘rinbosari Zayniddin domla Eshonqulov ushbu ziyoratchilarni iliq so‘zlar, ezgu tilaklar va esdalik hadyalari bilan qarshi oldi.
Ma’lumot o‘rnida, ulug‘ haj ibodati oldidan Toshkentga kelgan ushbu ziyoratchilar uchun poytaxtimizdagi diqqatga sazovor joylar, muqaddas qadamjolar va tabarruk maskanlarga ziyoratlar tashkil etilishi rejalashtirilgan.
O‘zbekiston musulmonlari idorasi
Matbuot xizmati
Turkiy davlatlar muftiylari 10 ga yaqin muhim bayonot va fatvolarni imzoladilar
Xabar berganimizdek, Ozarbayjon poytaxti Boku shahrida Turkiy davlatlar muftiylari kengashining navbatdagi VII yig‘ilishi bo‘lib o‘tdi.
Yig‘ilish yakunida O‘zbekiston, Turkiya, Ozarbayjon, Qozog‘iston va Qirg‘iziston muftiylari muhim yo‘nalishlarda 3 ta bayonot va zamonaviy masalalarga oid 6 ta yirik fatvoni imzolashdi.
Jumladan, «Islomning ilm-fan va texnologiyaga yondashuvi» mavzusidagi bayonotda Islom dinida insoniyat farovonligiga xizmat qiluvchi barcha ilmiy va texnologik yutuqlar qo‘llab-quvvatlanishi bilan birga, ular yuksak axloqiy mezonlar, adolat va mas’uliyat tamoyillari asosida rivojlanishi shartligi ta’kidlandi.
«Musulmonligi ma’lum bo‘lgan shaxsni kofirga chiqarishning hukmi» to‘g‘risidagi bayonotda Islom ta’limotiga ko‘ra, kalimai shahodat keltirib, qibla ahlidan bo‘lgan har qanday shaxs musulmon hisoblanishi hamda qilgan gunohi yoki amaldagi nuqsoni tufayli uni kufrda ayblash (takfir qilish) qat’iyan man etilishi aytildi. Shuningdek, Turkiy davlatlar ulamolari ushbu bayonotda jamiyatda fitna, qon to‘kilishi va nizolarga sabab bo‘luvchi takfirchilik oqimlariga qarshi ilmiy-ma’rifiy kurashni kuchaytirish, ummat birdamligini mustahkamlash zarurligiga e’tibor qaratishdi.
«Oila qurishga targ‘ib qilish, uni muhofaza qilish va mustahkamlashga doir umumiy mas’uliyat» bayonotida Islom ta’limotiga ko‘ra, oila nikoh asosiga quriladigan, sog‘lom avlod va jamiyat davomiyligini ta’minlovchi, insonga ruhiy xotirjamlik hamda axloqiy tarbiya beruvchi muqaddas muassasa ekaniga urg‘u qaratildi. Muftiylar oila institutini himoya qilish, yoshlarni oilaga tayyorlash va milliy-ma’naviy qadriyatlarni mustahkamlashda birdamlikka chaqirdilar.
Shuningdek, muftiylar tomonidan «Bitta qabrga birdan ortiq mayyitni dafn etishning hukmi», «Ijaraga berilgan dehqonchilik yerlarining ushri», «Fatvo so‘rash va fatvo berishda sun’iy idrokdan foydalanish masalasi», «Juma namozi durust bo‘lishining shartlari», hijriy oy boshlanishini aniqlash mezonlari va takfir masalasiga doir 6 ta fatvo matni imzolandi.
O‘zbekiston musulmonlari idorasi Matbuot xizmati
