“HAJ – 2026”: SO‘NGGI ZIYORATCHILAR MUBORAK SAFARGA KUZATILDI
Bugun, 18 may kuni “Haj – 2026” mavsumining so‘nggi guruh ziyoratchilari Toshkent xalqaro aeroportidan muqaddas safarga kuzatildi.
Kuzatuv marosimida davlat va jamoat tashkilotlari mas’ul vakillari, taniqli ulamolar, soha mutasaddilari va ommaviy axborot vositalari xodimlari ishtirok etdi.
Fayzli tadbirda ziyoratchilarga Haj amallarini bekamu ko‘st ado etishlari, Haq taolodan yurtdoshlarimizning safarlarini bexatar, ibodatlarini maqbul aylashini so‘rab xayrli duolar qilindi.
Muborak safar oldidan mavsumning yakuniy guruhlari, xususan, “Prezident hojisi” maqomiga sazovor bo‘lgan 100 nafar yurtdoshimizning quvonch va hayajoni qalblarni to‘lqinlantirdi. Ularni kuzatayotgan yaqinlari esa havas bilan shunday saodatli kunlar o‘zlariga ham nasib etishini so‘rashdi.
Bo‘lg‘usi hojilar ko‘rsatilayotgan bunday g‘amxo‘rlik uchun Davlat Rahbari hamda tashkilotchilarga samimiy minnatdorlik bildirdi. Muqaddas zaminda Vatanimiz tinchligi, xalqimiz farovonligi va yurtimiz ravnaqi uchun duoda bo‘lishlarini ta’kidlashdi.
Shunday qilib, “Haj – 2026” mavsumining so‘nggi guruhlari Toshkent xalqaro aeroportidan Saudiya Arabistoniga ko‘tarinki kayfiyatda jo‘nab ketdi.
Alloh taolo muborak safarga otlangan barcha yurtdoshlarimizning hajlarini mabrur aylab, ona-Vatanimizga sog‘-salomat qaytishlarini nasib etsin!
O‘zbekiston musulmonlari idorasi Matbuot xizmati
«Asrlarni birlashtiruvchi meros»: mediaforumda Qur’on, qo‘lyozmalar va sun’iy intellektga oid loyihalar taqdim etiladi
«Islom sivilizatsiyasi: yangi nigoh — yangi kashfiyotlar» Xalqaro mediaforumining uchinchi yalpi sessiyasi 26 avgust kuni «Asrlarni birlashtiruvchi meros. Islom sivilizatsiyasining ma’naviy mazmun-mohiyati» mavzusida bo‘lib o‘tmoqda. Sessiyada Qur’on merosi, qadimiy qo‘lyozmalar, xattotlik, hujjatli kino hamda tarixiy manbalarni o‘rganishda sun’iy intellektdan foydalanish masalalari o‘rin olgan, xabar bermoqda iccu.uz.
Asosiy loyihalardan biri — «114 Qur’on: islom olami xattotligining 114 durdonasi» bo‘ladi. Uni Mueller & Schindler nashriyot uyi vitse-prezidenti Aleksandr Vilgelm taqdim etdi. Shuningdek, sessiyada «Katta Langar Qur’oni: haqiqat va afsonalar» xalqaro loyihasi taqdimoti bo‘lib o‘tdi. Uni Islom sivilizatsiyasi markazi ilmiy kotibi Rustam Jabborov taqdim qildi.
Sankt-Peterburg hujjatli filmlar studiyasi bosh direktori Aleksey Telnov «Yagona tarixiy meros sahifalari» loyihasi doirasida yaratilgan «Masjid» filmining treylerini namoyish etdi. Islomshunos va madaniyat arbobi Ketlin Gyobel ishtirokchilarni «Allohning 99 ismi: Uning go‘zal ismlari orqali Yaratganni anglash» noshirlik loyihasi bilan tanishtirdi.
Alohida blok yangi texnologiyalarga bag‘ishlanadi. Sberbank Istiqbolli texnologiyalarni rivojlantirish boshqarmasi ijrochi direktori Vladimir Kox hamda Islom sivilizatsiyasi markazi professori, bosh ilmiy xodimi Zohidullo Munavvarov «Sun’iy intellekt — qadimiy qo‘lyozmalarni o‘qishning raqamli kaliti» loyihasini taqdim etadi. Dasturdan, shuningdek, «Payg‘ambarning fazilatlari» kitobi va «O‘zbekiston tarix xaritasida: imperiyalar, sivilizatsiyalar, davrlar» loyihasi ham o‘rin olgan.
Xalqaro munozara «Jaholatdan ma’rifat sari: stereotiplar va islomofobiyani bartaraf etishda medianing o‘rni» mavzusida o‘tkaziladi. Unda Islom hamkorlik tashkiloti, shuningdek, Jazoir, Ummon, Pokiston, Saudiya Arabistoni, Iroq, Mali va O‘zbekistonning davlat va xalqaro ommaviy axborot vositalari vakillari ishtirok etadi.
Bundan tashqari, O‘zbekiston Jurnalistlar uyushmasi raisi Shuhrat Orif «Jurnalistikada tarix va sun’iy intellekt: merosni onlayn makonda qanday saqlash mumkin?» loyihasini, Islom sivilizatsiyasi markazi media bo‘limi rahbari O‘ktam Usmanov esa «O‘zbekistonni dunyoga mashhur qilgan olimlar» kitobini taqdim etadi. Sessiya «Dunyo Qur’oni: xattotlik an’analaridan — kelajak merosi sari» taqdimoti bilan yakunlanadi. Islom sivilizatsiyasi markazi huzuridagi Xattotlik maktabi direktori Habibullo Solih turli mamlakatlar va islom xattotlik maktablari an’analarini birlashtiruvchi noyob Qur’onni yaratish bo‘yicha xattotlar o‘rtasidagi Jahon tanlovini e’lon qiladi.
Forumning asosiy maydoni O‘zbekistondagi Islom sivilizatsiyasi markazi bo‘ladi. Unda deyarli 50 mamlakatdan media va ekspertlar hamjamiyatining 300 nafar vakili — mediakompaniyalar, axborot agentliklari va telekanallar rahbarlari, jurnalistlar, prodyuserlar, olimlar hamda kreativ industriya mutaxassislari ishtirok etadi.
O‘zbekiston musulmonlari idorasi Matbuot xizmati