Qurbon hayitiga qizg‘in tayyorgarlik ko‘rilmoqda
Viloyatda Qurbon hayitini munosib kutib olish, bayram kunlarida aholi xavfsizligi, jamoat tartibi hamda kommunal tizimlar barqarorligini ta’minlash maqsadida imom-xatiblar va mutasaddi tashkilotlar vakillari ishtirokida kengaytirilgan yig‘ilish bo‘lib o‘tdi.
Tadbirda Ichki ishlar, Favqulodda vaziyatlar boshqarmalari, Milliy gvardiya, Sog‘liqni saqlash tizimi, Sanitariya-epidemiologiya xizmati hamda gaz va elektr ta’minoti korxonalari mas’ullari ishtirok etdi.
Yig‘ilishda Hayit namozi o‘qiladigan masjidlarda yong‘in xavfsizligi qoidalariga rioya etish, tez tibbiy yordam xizmatining shayligini ta’minlash, yo‘l harakati xavfsizligini nazorat qilish va kommunal sohada nosozliklarning oldini olish bo‘yicha aniq chora-tadbirlar muhokama qilindi.
Shuningdek, imom-xatiblarga bayram kunlari aholi o‘rtasida bag‘rikenglik, mehr-oqibat, hamjihatlik va ehtiyojmandlarga yordam ko‘rsatish kabi ezgu qadriyatlarni keng targ‘ib qilish, namozxonlar uchun qulay va xavfsiz sharoitlar yaratish yuzasidan tegishli tavsiyalar berildi.
Tadbir yakunida barcha soha vakillari bilan hamkorlikni kuchaytirgan holda Qurbon hayitini yuqori saviyada va osoyishta o‘tkazish bo‘yicha ustuvor vazifalar belgilab olindi.
Qashqadaryo viloyati vakilligi
Matbuot xizmati
O‘zbekiston Islom sivilizatsiyasi markazi noyob Qur’oni karim nusxasini yaratish bo‘yicha jahon xattotlar tanlovini e’lon qildi
26 avgust kuni O‘zbekistondagi Islom sivilizatsiyasi markazida “Islom sivilizatsiyasi: yangi nigoh, yangi kashfiyotlar” xalqaro mediaforumning “Asrlarni birlashtiruvchi meros. Islom sivilizatsiyasining ma’naviy mazmun-mohiyati” mavzusidagi uchinchi yalpi sessiyasi bo‘lib o‘tdi, deb xabar qilmoqda “Dunyo” AA.
Sessiya doirasida Qur’oni karim merosi, qadimiy qo‘lyozmalar, islom xattotligi, hujjatli kino hamda tarixiy manbalarni o‘rganishda sun’iy intellektdan foydalanishga bag‘ishlangan xalqaro loyihalar taqdim etildi.
Xususan, “114 Qur’on: islom olami xattotligining 114 durdonasi”, “Katta Langar Qur’oni: haqiqat va afsonalar”, “Allohning 99 ismi: Uning go‘zal ismlari orqali Yaratganni anglash”, “Sun’iy intellekt – qadimiy qo‘lyozmalarni o‘qishning raqamli kaliti” loyihalari hamda “Yagona tarixiy meros sahifalari” loyihasi doirasida yaratilgan “Masjid” hujjatli filmi namoyish etildi.
Xalqaro muhokamalarda Islom hamkorlik tashkiloti, shuningdek, Jazoir, O‘mon, Pokiston, Saudiya Arabistoni, Iroq, Mali va O‘zbekistonning yetakchi ommaviy axborot vositalari vakillari ishtirok etib, islomofobiya va mavjud stereotiplarni bartaraf etishda medianing o‘rni haqida fikr almashdi.
Sessiya yakunida turli mamlakatlar va xattotlik maktablarining an’analarini birlashtiruvchi noyob Qur’oni karim nusxasini yaratish bo‘yicha Xattotlar umumjahon tanlovi e’lon qilindi.
Eslatib o‘tamiz, mazkur xalqaro mediaforumning asosiy tadbirlari O‘zbekiston Islom sivilizatsiyasi markazida o‘tkazilib, unda qariyb 50 mamlakatdan media va ekspert hamjamiyatining 300 nafarga yaqin vakili — media kompaniyalar, axborot agentliklari va telekanallar rahbarlari, jurnalistlar, prodyuserlar, olimlar hamda kreativ industriya mutaxassislari ishtirok etmoqda.
O‘zbekiston musulmonlari idorasi Matbuot xizmati
