“Rektor kubogi” futbol musobaqasi g‘oliblari aniqlandi (foto+)
Toshkent islom instituti professor-o‘qituvchilari va xodimlari o‘rtasida an’anaviy “Rektor kubogi” futbol musobaqasi bo‘lib o‘tdi. “25 may – Xalqaro futbol kuni” arafasida O‘FA maydonida o‘tkazilgan final bahslari keskin va do‘stona ruhda kechdi.
Musobaqa yakuniga ko‘ra, sovrinli o‘rinlarni quyidagi jamoalar band etdi:
-
1-o‘rin — “Baroqxon” jamoasi (Kubok sohibi)
-
2-o‘rin — “Shoshiy” jamoasi
-
3-o‘rin — “Fuqaho” jamoasi
Shuningdek, turnir davomida ajralib turgan ishtirokchilar maxsus nominatsiyalar bilan taqdirlandi. Institut prorektori Xoshimjon Amanov «Eng yaxshi o‘yinchi», katta o‘qituvchi Elyor Ahmatqulov «Eng yaxshi to‘p urar» va institut psixologi Oybek Ismoilov «Eng yaxshi darvozabon» deb topildi.
Musobaqa so‘ngida g‘oliblarga sovrinlar topshirildi. Turnirni tashkil etishda yaqindan ko‘maklashgan O‘zbekiston futbol assotsiatsiyasi va homiy tashkilotlarga institut rahbariyati tomonidan minnatdorlik bildirildi.
O‘zbekiston musulmonlari idorasi
Matbuot xizmati
Qabul jarayonida murojaatlarga amaliy yechim berildi
#xabar #murojaat #qabul
O‘zbekiston musulmonlari idorasi rahbariyati tomonidan aholi bilan o‘tkazilayotgan ochiq va samimiy muloqotlar fuqarolarning muammolarini bartaraf etishda muhim omil bo‘lmoqda. Har bir murojaatga alohida e’tibor qaratilishi natijasida ko‘plab masalalar joyida va ijobiy hal etilmoqda.
Xususan, bugun, 1 iyul kuni O‘zbekiston musulmonlari idorasi raisining birinchi o‘rinbosari Homidjon domla Ishmatbekov navbatdagi fuqarolar qabulini o‘tkazdi. Muloqot davomida imom-xatiblar faoliyati, haj va umra ziyoratlari, diniy ta’lim tizimi, oilaviy munosabatlar hamda moddiy yordamga oid murojaatlar ko‘rib chiqildi.
Qabulda oilaviy masalalar yuzasidan kelganlarga shar’iy yechimlar va zarur maslahatlar berilgan bo‘lsa, moddiy yordam so‘ragan fuqarolarga belgilangan tartibda amaliy ko‘mak ko‘rsatildi.
Bunday e’tibor va g‘amxo‘rlikdan yurtdoshlarimiz mamnunligini bildirishdi. Zero, Rasululloh sollallohu alayhi va sallam: "... Kim birodarining hojatini ravo qilsa, Alloh uning hojatini ravo qiladi. Kim bir musulmonning tashvishni aritsa, Alloh uning Qiyomat kunidagi tashvishlaridan birini aritadi", deb marhamat qilganlar (Imom Buxoriy rivoyati).
Shu kabi qabul jarayonlari har haftaning chorshanba kuni O‘zbekiston musulmonlari idorasining barcha hududiy vakilliklari va jome masjidlarida imom-domlalar tomonidan muntazam ravishda o‘tkazib kelinmoqda.
O‘zbekiston musulmonlari idorasi
Matbuot xizmati
