Qurbon hayiti arafasida saxovat tadbirlari o‘tkazildi
Muborak Qurbon hayiti munosabati bilan yurtimizning barcha hududlarida mehr-muruvvat, xayriya va saxovat tadbirlari keng ko‘lamda tashkil etilmoqda. Xususan, O‘zbekiston musulmonlari idorasi hamda “Vaqf” xayriya jamoat fondi vakillari joylarda bo‘lib, ehtiyojmand va kam ta’minlangan oilalar holidan xabar olmoqda hamda ularning ko‘ngillarini ko‘tarishga alohida e’tibor qaratmoqda.
Shunday xayrli tadbirlardan biri Buxoro viloyatida ham yuqori saviyada tashkil etildi. “Vaqf” xayriya jamoat fondi Buxoro viloyati filiali rahbari, Buxoro shahridagi “Mohitobon” masjidi imom-xatibi Azizbek domla Ashurov boshchiligida hududdagi bir qator ehtiyojmand xonadonlarga bayramona kayfiyat ulashildi.
Muruvvat tadbiri doirasida quyidagi xayrli ishlar amalga oshirildi:
-
Ijtimoiy reyestrga kiritilgan 50 ta ehtiyojmand oila vakillari uchun maxsus ehson dasturxoni yozilib, ularga bayram sovg‘alari topshirildi.
-
Hududda istiqomat qiluvchi ko‘makka muhtoj oilalarning yashash joylariga bevosita tashrif buyurilib, kundalik ehtiyoj uchun zarur bo‘lgan ozi-ovqat mahsulotlari to‘plami yetkazib berildi.
Saxovat tadbirlari davomida tashkilotchilar xonadon egalarini yaqinlashib kelayotgan qutlug‘ ayyom — Qurbon hayiti bilan muborakbod etib, ularning haqqiga xayrli duolar qilishdi. Bu kabi tadbirlar yurtimizda insoniylik, oqibat va mehr-muruvvat tuyg‘ularini yanada mustahkamlashga xizmat qilmoqda.
O‘zbekiston musulmonlari idorasi
Buxoro viloyati vakilligi
Matbuot xizmati
Bir guruh diniy-ma’rifiy soha fidoyilariga "O‘zbekiston Respublikasi mustaqilligining 35 yilligi" esdalik nishonlari topshirildi
27 avgust kuni O‘zbekiston Respublikasi mustaqilligining 35 yilligi munosabati bilan diniy-ma’rifiy sohada samarali mehnat qilib kelayotgan fidoyi yurtdoshlarimizni taqdirlashga bag‘ishlangan tantanali tadbir bo‘lib o‘tdi.
Tadbirda O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov kirish so‘zi bilan ishtirok etdi.
Kirish nutqida mamlakatimizda mustaqillik yillarida, ayniqsa, so‘nggi yillarda diniy-ma’rifiy sohani rivojlantirish, jamiyatda tinchlik-totuvlik, millatlararo hamjihatlik va diniy bag‘rikenglikni mustahkamlash borasida amalga oshirilayotgan islohotlar, shuningdek, sohada faoliyat yuritayotgan ulamolar, imom-xatiblar, mudarrislar va fidoyi xodimlarning munosib hissasi haqida alohida ta’kidlandi.
Tantanali tadbir davomida diniy-ma’rifiy sohada ko‘p yillardan buyon samarali mehnat qilib, yurtimizda ma’naviy barqarorlikni ta’minlash, yosh avlodni milliy va umuminsoniy qadriyatlar ruhida tarbiyalash, aholi o‘rtasida ma’rifiy tushuntirish ishlarini olib borishga munosib hissa qo‘shib kelayotgan bir guruh fidoyi yurtdoshlarga "O‘zbekiston Respublikasi mustaqilligining 35 yilligi" esdalik nishonlari tantanali ravishda topshirildi.
Esdalik nishonlarini topshirish marosimida O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov, Din ishlari bo‘yicha qo‘mita raisi Sodiq Toshboyev, O‘zbekiston musulmonlari idorasi raisi, muftiy Shayx Nuriddin Xoliqnazar hazratlari, O‘zbekistondagi Islom sivilizatsiyasi markazi direktori Firdavs Abduhalikov, O‘zbekiston Respublikasi Vazirlar Mahkamasi mas’ul xodimi Orifxon Zokirovlar ishtirok etdilar.
Taqdirlash marosimida ta’kidlanganidek, mazkur esdalik nishoni mamlakatimiz taraqqiyotiga, uning tinchligi va barqarorligiga, jamiyatda millatlararo totuvlik va diniy bag‘rikenglik muhitini mustahkamlashga, yosh avlodni milliy va umuminsoniy qadriyatlar ruhida tarbiyalashga munosib hissa qo‘shayotgan fidoyi insonlarga bildirilgan yuksak ehtirom va e’tirof ramzidir.
Tadbir yakunida taqdirlanganlar o‘zlariga bildirilgan yuksak ishonch va e’tibor uchun minnatdorlik bildirib, mamlakatimiz tinchligi va ravnaqi yo‘lidagi ezgu faoliyatlarini yanada sidqidildan davom ettirishlarini ta’kidladilar.
Barcha mukofot sohiblarini samimiy muborakbod etamiz!
Mustaqilligimizning 35 yilligi muborak bo‘lsin!
O‘zbekiston musulmonlari idorasi Matbuot xizmati