Buxoroda ma’rifiy suhbat surdo tarjimada tushuntirildi
Buxoro shahridagi «Abu Bakr as-Siddiq» jome masjidida gapirish va eshitishida nuqsoni bo‘lgan fuqarolar uchun "Farzand tarbiyasi va himoyasi — katta mas’uliyat" mavzusida ma’rifiy suhbat bo‘lib o‘tdi.
O‘zbekiston musulmonlari idorasi Buxoro viloyati vakilligi tashabbusi bilan tashkil etilgan tadbirda masjid imom-noibi Dilshod domla Hodiyev ishtirokchilarga mavzuning diniy va ijtimoiy ahamiyatini tushuntirib berdi. Ma’lumotlar imkoniyati cheklangan yurtdoshlarimizga malakali surdo tarjimon Dilfuza A’lamova tomonidan imo-ishora tilida mahorat bilan yetkazildi.
Uchrashuv davomida ishtirokchilar o‘zlarini qiziqtirgan aqida, fiqh va kundalik ijtimoiy hayotga doir savollariga atroflicha javob oldilar.
Tadbir yakunida Buxoro viloyati vakilligi tomonidan qatnashchilarga bayram tuhfalari ulashildi.
Alloh taolo bunday xayrli va savobli ishlarni bardavom aylab, ehson sohiblaridan rozi bo‘lsin!
Buxoro viloyati vakilligi
Matbuot xizmati
35 bolaning sunnat to‘yi o‘tkazib berildi
Mustaqilligimizning 35 yilligi arafasida Chirchiq shahrida kam ta’minlangan hamda boquvchisini yo‘qotgan oilalar farzandlariga quvonch ulashishga qaratilgan saxovat tadbiri o‘tkazildi.
Toshkent viloyati bosh imom-xatibi Doniyor domla Ikromov tadbirda ishtirok etib, bolajonlarga samimiy tilaklar bildirdi.
«Vaqf» xayriya jamoat fondi Toshkent viloyati filiali ko‘magida 35 nafar bolaning har biriga velosiped va turli sovg‘alar berildi. Shuningdek, tadbirda saxovatpesha homiylar tomonidan bayramona dasturxon yozilib, bolajonlar uchun ko‘ngilochar va bayramona dastur tashkil etildi.
Bunday xayrli tashabbuslar yurtimizda inson qadri, oila va bolalar manfaatlariga yuksak e’tibor qaratilayotganining yana bir amaliy ifodasidir.
Saxovat tadbiri bolajonlarga unutilmas quvonch bag‘ishlab, ularning qalbida Vatanga muhabbat va ertangi kunga ishonch tuyg‘ularini yanada mustahkamlashga xizmat qildi.
Toshkent viloyati vakilligi Matbuot xizmati
