O‘zbekistonlik hojilar 2-19 iyun kunlari yurtimizga qaytadi
Bugun, 2 iyun kuni "Haj – 2026" mavsumining ilk ziyoratchilarini olib keladigan dastlabki samolyotlar Jidda-Toshkent yo‘nalishi bo‘yicha Islom Karimov nomidagi Toshkent xalqaro aeroportiga qo‘nadi.
Ushbu dastlabki aviareyslar orqali Toshkent shahri ziyoratchilari yurtimizga qaytib kelishadi. Shuningdek, hojilarimiz respublikamizning 10 ta hududidagi xalqaro aeroportlarda tantanali ravishda kutib olish reja qilingan.
Ma’lumot o‘rnida, haj safarini yakunlagan yurtdoshlarimizni Jidda shahridan olib kelish ishlari joriy yilning 19 iyun kuniga qadar izchil davom ettiriladi.
Alloh taolo yurtdoshlarimizning haj ibodatlarini mabrur aylab, o‘z uylariga eson-omon yetib kelishlarini nasib qilsin!
O‘zbekiston musulmonlari idorasi
Matbuot xizmati
Ma’naviy-ma’rifiy soha fidoyilari taqdirlandi
Vatanimiz mustaqilligining 35 yilligi munosabati bilan Surxondaryo viloyati Qumqo‘rg‘on tumanida diniy-ma’rifiy sohada samarali faoliyat yuritayotgan, jamiyatda sog‘lom ma’naviy muhitni mustahkamlash va yoshlarni yot g‘oyalardan asrash yo‘lida fidokorona mehnat qilayotgan bir guruh soha xodimlari taqdirlandi.
Tadbirda Qumqo‘rg‘on tumani hokimining birinchi o‘rinbosari Z.Eshqobilov ishtirok etib, yig‘ilganlarni qutlug‘ bayram bilan samimiy muborakbod etdi hamda ularning el-yurt osoyishtaligi va ma’naviy-ma’rifiy ishlar samaradorligini oshirishdagi xizmatlarini yuqori baholadi.
Marosimda fidoyi soha xodimlariga tuman hokimligining tashakkurnomalari va bayram esdalik sovg‘alari tantanali ravishda topshirildi.
O‘zbekiston musulmonlari idorasi
Matbuot xizmati
