Talaba-yoshlar uchun ilmiy safar uyushtirildi
Shu yil 2-3 iyun kunlari Qashqadaryo viloyatidagi «Xoja Buxoriy» o‘rta maxsus islom ta’lim muassasasi mudiri O‘tkir G‘uzarov boshchiligida ustoz va talabalarning Samarqand va Toshkent shaharlariga ilmiy-ma’rifiy sayohati tashkil etildi.
Imom Buxoriy merosi va Hadis ilmi maktabi
Safarning ilk kunida jamoa Imom Buxoriy yodgorlik majmuasini ziyorat qilib, u yerdagi ulkan bunyodkorlik ishlari bilan tanishdilar. Shundan so‘ng, Samarqanddagi Hadis ilmi maktabiga tashrif buyurildi. Rektor Barot Amonov hamda institut doktori Saloh Iso bilan o‘tgan ma’rifiy uchrashuvda talabalarga ilm olish odoblari, vaqt qadri va mutolaaning ahamiyati haqida qimmatli tavsiyalar berildi. Mehmonlar maktabdagi zamonaviy ta’lim sharoitlari bilan ham yaqindan tanishishdi.
Islom sivilizatsiyasi markazi
Ilmiy safarning ikkinchi kuni poytaxtimizda davom etdi. Ustoz va talabalar muhtasham O‘zbekistondagi Islom sivilizatsiyasi markazida bo‘lib, markazning ilmiy-ma’rifiy faoliyati, boy ekspozitsiyalari hamda ajdodlarimiz merosini targ‘ib etish borasidagi ishlarni ko‘zdan kechirishdi.
Yuqori kayfiyatda o‘tgan ushbu safar talabalarning ilmiy dunyoqarashini boyitish va o‘zaro tajriba almashishda muhim qadam bo‘ldi.
O‘zbekiston musulmonlari idorasi
Matbuot xizmati
Malayziya telekanalida O‘zbekistonning ziyorat turizmi imkoniyatlari keng yoritildi
Malayziyaning “Berita RTM” telekanalida O‘zbekistonda ziyorat turizmi sohasida amalga oshirilayotgan islohotlarga bag‘ishlangan maxsus dastur namoyish etildi, deb xabar bermoqda “Dunyo” AA.
Mamlakatimiz mustaqilligining 35 yilligi arafasida efirga uzatilgan ushbu ko‘rsatuvda malayziyalik professorlar – Badrul Isa va Norfadilah Kamaruddin tomonidan ishlab chiqilgan “O‘zbekiston–Malayziya: kreativ turizm” nomli loyiha taqdim etildi.
Olimlar tashabbusi bilan yaratilgan mazkur loyiha mamlakatimizning Malayziyadagi elchixonasi, Turizm qo‘mitasi va Islom sivilizatsiyasi markazi hamkorligida amalga oshirildi.
Tashabbus O‘zbekistonning turizm imkoniyatlari haqida “Visual storytelling” formatida professional raqamli kontent yaratishni nazarda tutadi.
Loyihaga ko‘ra, 17–31 avgust kunlari Malayziya UiTM texnologiya universitetining professional fotograflari va dizaynerlaridan iborat ijodiy jamoa Toshkent, Samarqand, Buxoro va Xorazmda suratga olish ishlarini olib boradi.
Malayziyalik ijodkorlar yurtimiz haqida tayyorlagan foto va videomateriallar “Instagram”, “Facebook”, “TikTok”, “YouTube” kabi internet platformalarda joylashtirilishi rejalashtirilgan. Loyihada yurtimiz oliy o‘quv yurtlarining dizayn, san’at, turizm va mehmonxona biznesi yo‘nalishidagi talabalari ham ishtirok etadi. Bu akademik, turizm va ijodiy sohalarda tajriba almashishni tashkil etish imkonini beradi.
Dasturda fikr bildirgan Badrul Isa loyiha ASЕAN mamlakatlari va musulmon olamida O‘zbekistonni yanada kengroq tanitishga xizmat qilishini ta’kidladi. Uning fikricha, raqamli platformalar orqali mamlakatimiz tarixiy merosi, ziyorat turizmi va amalga oshirilayotgan so‘nggi o‘zgarishlari keng yoritiladi.
“Biz boy tarixiy meros, yuksak madaniyat va mehmondo‘st xalqqa ega bo‘lgan O‘zbekistonni ASЕAN mintaqasi aholisi tomonidan qayta kashf etilishini istaymiz”, – dedi professor.
Shuningdek, u O‘zbekiston xalqini mustaqillikning 35 yilligi bilan tabriklab, loyiha natijalari ushbu sanaga munosib sovg‘a bo‘lishini qayd etdi.
Ushbu tashabbus O‘zbekistonning ziyorat turizmini ommalashtirish va ASЕAN mamlakatlaridan ko‘proq sayyohlarni jalb qilishga xizmat qilishi kutilmoqda.
O‘zbekiston musulmonlari idorasi Matbuot xizmati
- «
- »