Ikki diniy muassasa memorandum imzoladi
Bahouddin Naqshband ilmiy-tadqiqot markazi hamda “Xadichai Kubro” ayol-qizlar o‘rta maxsus islom ta’lim muassasasi o‘rtasida o‘zaro ilmiy-ma’rifiy hamkorlikni rivojlantirishga qaratilgan memorandum imzolandi.
Mazkur hujjat yurtimizda islomshunoslik, hadisshunoslik va manbashunoslik sohalaridagi tadqiqotlarni qo‘llab-quvvatlash, boy milliy-ma’naviy merosimizni chuqur o‘rganish hamda yosh avlodni milliy qadriyatlar va bag‘rikenglik ruhida tarbiyalash maqsadida tuzildi.
Hamkorlik doirasida birgalikda ilmiy-amaliy konferensiyalar, seminarlar va davra suhbatlari tashkil etish, tarixiy manbalar va qo‘lyozmalarni o‘rganib, ularni ilmiy tavsiflash hamda keng targ‘ib qilish rejalashtirilmoqda. Shuningdek, tadqiqotchilar va talabalar uchun o‘zaro tajriba almashish imkoniyatlarini kengaytirish, qo‘shma ilmiy loyihalarni amaga oshirish orqali milliy merosimizni xalqaro miqiyosda keng namoyish etishga alohida e’tibor qaratiladi.
Ushbu kelishuv ilm-fan va ma’rifat yo‘lidagi izchil hamkorlikni yanada mustahkamlash, boy ilmiy-ma’naviy xazinamizni asrab-avaylash hamda uni xalqimizga tizimli yetkazish borasida muhim qadam bo‘lib xizmat qiladi.
O‘zbekiston musulmonlari idorasi
Matbuot xizmati
Tarixni buzib ko‘rsatmaslik uchun
Vazirlar Mahkamasi huzuridagi Imom Buxoriy xalqaro ilmiy-tadqiqot markazida "Islom ma’rifati, hadis ilmi va Imom Buxoriy merosi" o‘quv kursi o‘tkazildi. Mutaxassislar tomonidan yodgorlik majmuasi gid-ekskursovodlari uchun o‘tkazilgan mashg‘ulotlar doirasida ekskursiya faoliyati bilan bog‘liq huquqiy, nazariy va amaliy masalalar ko‘rib chiqildi, xabar bermoqda “Samarkandskiy vestnik” nashri.
- Bu yerga tashrif buyurgan har bir ziyoratchi faqat ibodat qilish uchun emas, balki ma’naviy "oziq" olish uchun ham borishi kerak, - deydi Imom Buxoriy xalqaro ilmiy-tadqiqot markazi direktori Sh.Ziyodov. - Bu yerda faoliyat yuritayotgan gidlarning malakasini oshirish tizimini yo‘lga qo‘yar ekanmiz, ularga Imom Buxoriyning bizga qoldirgan merosini, bu merosning tarixiy manbalarini chuqur o‘rgatishimiz shart.
Kurs doirasida majmuaga birinchi marta tashrif buyurgan mehmonlar bilan muloqotning o‘ziga xos xususiyatlari muhokama qilindi. Xorijlik ziyoratchilarga nafaqat Imom al-Buxoriy hayotidagi faktlar va diniy qadriyatlarimizni yetkazish, balki boy madaniy merosimizni asrab-avaylash va yetkazish kabi dolzarb masalalar ko‘tarildi.
Gid-ekskursovodlar ham o‘z tajribalari bilan o‘rtoqlashib, kelgusidagi ishlarni tashkil etish bo‘yicha takliflar berdilar. Bu bevosita ekskursiyalarni o‘tkazish paytida yuzaga keladigan masalalarni muhokama qilish imkonini berdi.
Kurs O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mita, Diniy ta’lim sohasida kadrlar malakasini oshirish va qayta tayyorlash instituti, Imom Buxoriy xalqaro ilmiy-tadqiqot markazi, viloyat hokimligi hamda Imom Buxoriy yodgorlik majmuasini saqlash va uning atrofini obodonlashtirish departamenti tomonidan tashkil etildi.
Tarixiy obidalar va ziyoratgohlar turizm salohiyatining muhim qismi bo‘lgan Samarqand viloyati uchun malakali mutaxassislarni tayyorlash alohida ahamiyatga ega. Mehmonga tashrif buyuriladigan joyning tarixi qanchalik to‘liq va tushunarli ochib berilishi gidning professionalligiga bog‘liq. Shuning uchun ham gid-ekskursovodlarning malakasini muntazam oshirib borish, ularning kasbiy bilim va ko‘nikmalarini takomillashtirish hamda zamonaviy xizmat ko‘rsatish standartlarini joriy etish Samarqandda turizm xizmatlari sifatini oshirishda ustuvor yo‘nalishlardan biri bo‘lib qolmoqda.
O‘zbekiston musulmonlari idorasi Matbuot xizmati
- «
- »